Ishki ister mınıstri Marat Ahmethanov jyl basynan beri elimizde apattar boıynsha barlyq kórsetkishterdiń óskenin aıtty: JKO (9 429), qaza tapqandar (1 478) jáne jaralanǵandar (12 394) sany artty. Taldaý jumystary avtomektepte oqymaı, kólik aıdaýdy «óz betinshe úırengender» adam ólimine alyp keletin JKO-nyń 50%-na jaýapty ekenin kórsetip otyr.
Almaty qalasynda, Almaty, Jambyl jáne Túrkistan oblystarynda joldar asa qaýipti. Atalǵan óńirlerge Qazaqstan boıynsha barlyq JKO-nyń 56%-y, jaraqat alǵandardyń 55%-y jáne qaza tapqandardyń 41%-y tıesili. Jalpy esepti kezeńde polısııa 4,5 mln-ǵa jýyq jol qozǵalysy erejelerin buzý faktisiniń jolyn kesti, 17,5 myńnan astam mas júrgizýshi ustaldy, 20 myń júrgizýshi kólik basqarý quqyǵynan aıyryldy.
Mınıstr tehnıkalyq tekserý ortalyqtaryn ashýǵa qoıylatyn talaptar tómendegennen keıin tekserýden ótý týraly jalǵan talondar berile bastaǵanyn atap ótti. Máselen, 106 myń júrgizýshi tehnıkalyq reglamentterdiń talaptaryna saı kelmeıtin kólikti basqarǵany úshin jaýapqa tartyldy, taǵy 80 myń júrgizýshige jalpy tehnıkalyq tekserýden ótpegeni úshin aıyppul salyndy.
Úkimet otyrysynda Jambyl oblysynyń ákimi Nurjan Nurjigitov, Túrkistan oblysynyń ákimi Darhan Satybaldy jáne Almaty oblysy ákiminiń orynbasary Nurjan Qudaıbergenov baıandama jasady.
Premer-Mınıstrdiń aıtýynsha, Qazaqstan jol qaýipsizdigi boıynsha álemdik reıtıngte 107-orynda tur: damyǵan elderge qaraǵanda, bizde jol apattarynan qaza tabý yqtımaldyǵy 11 ese joǵary.
«Jalpy bizdiń elimizde jol qaýipsizdigine qatysty jaǵdaı óte kúrdeli: 8 aıda jol apattarynyń sany 14%-ǵa, qaza tapqandardyń sany 18%-ǵa kóbeıdi. Orta eseppen jolda táýligine 5-6 adam qaza tabady. Bul óte aýyr jaǵdaı», dedi Álıhan Smaıylov.
Úkimet basshysy elimizde júrgizýshiler arasynda kólik júrgizý mádenıeti óte tómen ekenin atap ótti. Jol erejesin jıi buzatyn shamamen 71 myń júrgizýshi anyqtaldy. Olardyń keıbiri bıyl jol erejesin 150 ret buzǵan.
«Árıne, mundaı júrgizýshilerdi qatań jazaǵa tartý kerek», dedi Álıhan Smaıylov.
Sonymen qatar Premer-Mınıstr júrgizýshilerdi daıarlaý sapasy da kúmán týdyratynyna nazar aýdardy. Úkimet basshysynyń oıynsha, avtomektepter jumysyndaǵy tásilderdi ózgertý qajet, sebebi búginde olardy baqylap jatqan eshkim joq, lısenzııa berilmeıdi.
«Kólik júrgizýge arnalǵan avtodromdar jetkiliksiz. Ákimdikter bul máseleni bıznespen birge qaraýy tıis», — dedi ol.
Álıhan Smaıylov mektepterde balalarǵa jol júrý erejesi oqytylmaıtynyn jáne avtokólikterdi tehnıkalyq tekserý sapasyna qatysty suraqtar kóp ekenin aıtyp ótti.
Osyǵan oraı Úkimet basshysy jol apattarynyń kóbeıýine qatysty jan-jaqty taldaý júrgizýdi, jol apattary jıi bolatyn ýchaskelerdegi qozǵalysty qadaǵalaý jumystaryn kúsheıtýdi, qaýipsiz jol ınfraqurylymyn jasaý boıynsha qosymsha sharalar qabyldaýdy, joldaǵy kameralardy kóbeıtýdi tapsyrdy.
Odan bólek, Indýstrııa jáne ınfraqurylymdyq damý mınıstrligine kólik quraldaryn tehnıkalyq tekserý sapasyn tıimdi baqylaý tetigin jasaý, joldardyń jaı-kúıin baqylaýdy kúsheıtý, al Ádilet jáne Ishki ister mınıstrlikterine sapasyz júrgizýshilerdi daıarlaıtyn avtomektepterdiń jaýapkershiligi máselesin qaraý tapsyryldy.
