Baǵdat Mýsın bul sala boıynsha ózi basqaratyn mınıstrlik tek zań men standarttar jazatynyn, al kıbershabýyl men qorǵanysqa arnalǵan Ulttyq qaýipsizdik komıtetiniń arnaıy memlekettik uıymy bar ekenin jetkizdi.
«Ol – Memlekettik tehnıkalyq qyzmet. Biz jalpy zań talaptaryn jáne basqa da talaptardy bekitemiz, olar sol boıynsha jumys isteıdi. Qazir eldegi ınternet júıelerine aýyrtpashylyq tústi, onyń jyldamdyǵy baıaýlady. Memlekettik tehnıkalyq qyzmet ári qaraı jumystaryn jalǵastyrýda», dedi mınıstr.
Sondaı-aq Mýsın aqparattyq qaýipsizdik – kúrdeli máselelerdiń birine aınalǵanyn atap ótti.
«Dúnıejúzinde túrli memlekettik uıymdar kún saıyn kıbershabýyldarǵa toıtarys beredi. Jańa ınternet dáýiri keldi. Internet ekonomıkaǵa jańa tásilder, jańa múmkindikter beredi, sonymen qatar qaýipsizdik jaǵynan da jetildirýdi qajet etedi», dedi ol.
Eske salaıyq, keıingi kúnderi memlekettik organdardyń ınternet resýrstaryna tolassyz kıbershabýyl jasalyp jatyr.
