Búginde elordanyń eldi mekenderindegi birqatar áleýmettik nysan avtonomdy jylý kózderi arqyly, ıaǵnı, kómir nemese birneshe ese qymbat dızel otyny arqyly jylytylyp keledi.
«20 áleýmettik nysannyń (Almaty jáne Saryarqa aýdany) 13 nysany gazǵa aýystyryldy, qalǵan 7 nysan boıynsha iske qosý-jóndeý jumystary júrgizilýde. Olardyń qatarynda eldi mekenderdegi birqatar kópqabatty turǵyn úılerdi jylytqan 3 aýdandyq jylý qazandyǵy da bar. Bul obektilerdi gazǵa aýystyrý esebinen jalpy únemdeý jylyna 1 mlrd teńgeden asady. Mysaly, buryn №40 mektep dızeldik otynmen jylytýǵa jylyna 160 mıllıon teńgege jýyq qarjy jumsasa, gazben bul soma shamamen 4 esege azaıdy. Al, «Sharapat» áleýmettik qyzmet kórsetý ortalyǵynyń únemdeýi jylyna 60 mıllıon teńgeden asady», dep jazdy qala ákimi.
Osy tusta Altaı Kólginov úılerin gazǵa aýystyrǵan Kóktal-1 aýdanynyń turǵyndarymen kezdesti. Turǵyndardyń aıtýynsha, endi kómir satyp alýdyń, kúldi tazalaýdyń, úıde kúni boıy otyndy qadaǵalaýdyń qajeti joq.
«Kún saıyn gazǵa qosylǵan úılerdiń sany artýda. Búgingi kúni gazǵa 6 myńnan astam úı qosyldy. Saryarqa jáne Almaty aýdandary gazben tolyq qamtamasyz etildi. Ol úshin 680 km astam gaz taratý jelileri salynyp, oramishilik jeliler jóndeldi. Baıqońyr jáne Esil aýdandarynda gaz qubyryn salý jumystary júrgizilýde (2023 j. oramishilik jeliler). Osy jyly aýdan qazandyqtaryna «Turan», «Telman» jáne «Ilınka» (Úrker), «О́ndiris», «Telman», «Prıgorodnyı», «Family Village», «Garden Village» shaǵyn aýdandaryna gaz tartý jelileriniń qurylysy bastaldy. «Shubar» shaǵyn aýdanynda jobalaý jumystary júrgizilýde», dep qosty Altaı Kólginov.
Qala ákimi turǵyn úılerdi gazǵa qosýdy jeńildetý úshin birqatar shara qabyldanǵanyn atap ótti.
«Máselen, úılerdi gazǵa qosý úshin qujattar tizimin eki ese qysqarttyq, halyqtyń muqtaj sanattaryna bóletin somany eki ese ulǵaıttyq (430 myńǵa deıin), gazdy esepteý aspaptary (eseptegishter) tegin beriledi, úıdi gazdandyrý úshin bólip tóleý jáne bankter arqyly paıyzsyz nesıe berý múmkindigi qarastyrylady. Elordany gazdandyrý Memleket basshysynyń baqylaýynda. Gazdandyrý qalanyń ekologııasyn edáýir jaqsartyp qana qoımaı, jeke sektor turǵyndary úshin qolaıly jaǵdaı jasaýǵa múmkindik beredi», delingen habarlamada.
