Zamanaýı kórme-konferensııa

Astanada Baılanys jáne aq­pa­rat agenttigi, «Zerde» ulttyq ınfo­kom­mý­nıkasııalyq holdıngi» AQ pen «AKT-ny damytý qory» KQ uıymdastyrýymen ASTEX-2014 halyqaralyq kórme-kon­ferensııasy ótti. Bul kórme elimizde jyl saıyn elektrondy kommersııany, elektrondy úkimetti damytýǵa arnalyp ótkiziledi. Bıylǵy sharaǵa otandyq kompanııalarmen birge sheteldik iri kásiporyndardyń basshylary da qatysyp, Qazaqstannyń elektrondy kommersııany damytýda atqaryp jatqan jumystarymen keńirek tanysty. Kórmeniń ashylý saltanatyna Baılanys jáne aqparat agenttiginiń tóraǵasy Asqar Jumaǵalıev qatysyp, sheteldik kompanııalar jetekshilerine, mamandaryna elimizde elektrondy kommersııany damytýǵa arnalǵan keshendi sharalar týraly aıtyp berdi. Onda agenttik tóraǵasy búgingi kúni elimiz BUU-nyń derekterine sáıkes, elektrondy úkimetti damytý boıynsha álemniń 190 eliniń arasynda 38-shi orynǵa ornalasqanyn, al 2010 jyly budan 16 orynǵa tómen bolǵanyn, sondyqtan tórt jyldyń ishinde osynshama orynǵa kóterilgeniniń ózi elimiz úshin úlken jetistik ekenin aıtty. Osydan keıin sheteldik mamandar kórmemen tanysa júrip, Qazaqstannyń sońǵy kezderi atqarǵan jumystaryn joǵary baǵalaıtyndaryn atap ótti. Konferensııa barysynda Ońtústik Koreıa prezıdentiniń janyndaǵy keńes múshesi Iаng Im Cho, Cybersecurity Malaysia kompanııasynyń bas dırektory A.Ohab, Management Development Group Inc. kompanııasynyń negizin qalaýshy jáne basqarýshy áriptesi D.Potapenko, TeliaSonera departamentiniń basshysy Dj.Oberg pen basqa da sheteldik mamandar otandyq kompanııalardyń jumysyna óz baǵalaryn berdi. Osy jerde kórmeniń birinshi kúni «AKT-ny damytý qory» KQ bas dırektory Sanjar Kettebekov pen «Skolkovo» tehnoparkiniń bas dırektory Renat Batyrov zııatkerlik qyzmettiń nátıjelerin ınnovasııalyq damytý jáne kommersııalandyrý salasyndaǵy yntymaqtastyq týraly memorandýmǵa qol qoıdy. Sonyń nátıjesinde endi «Skolkovo» tehnoparkimen ınvestısııalyq jobalardy iske asyrýdyń tıimdiligin arttyrý, ınnovasııalyq kompanııalardyń shetel rynogyna shyǵýyna jaǵdaı jasaý úshin uzaq merzimdi áriptestik qarym-qatynas ornatylatyn bolady. Sonymen birge, qazaqstandyq qor men Muckerlab atty amerıkalyq kompanııa­sy­nyń arasynda aqparattyq tehnologııalar salasyndaǵy startap-kompanııalardy damytý jónindegi memorandým jasaldy. Atalǵan amerıkalyq kompanııaǵa kelsek, qazaqstandyq qor endi onymen tehnologııa men aqparat salasynda birigip jumys isteıdi. Osyndaı jumystardyń nátıjesinde ekijaqty usynystar qaralyp, mamandar tájirıbelerimen bólisedi. Kórmeniń ekinshi kúni de elektrondy kommersııany damytýǵa arnalǵan birqatar mańyzdy jumystar atqaryldy. Máselen, Baılanys jáne aqparat agenttiginiń mamandary sheteldik kompanııalardyń basshylary S.Franzen, Iаng Im Cho, R. Bellak, E.Rannala jáne R.Batyrovpen elimizde elektrondy kommersııany damytý jáne IT-klaster qurý boıynsha eki jaqty kezdesýler ótkizdi. Sonymen birge, otandyq IT-kompanııalar qaýymdastyǵynyń dóńgelek ústeli, memlekettik organdar men bıznes-qurylymdardyń qatysýymen ınnovasııalyq klasterdi damytý jónindegi Qadaǵalaýshy keńestiń májilisi ótti. Jalpy, «Zerde» ulttyq ınfokom­mý­nı­ka­sııalyq holdıngi» AQ tóraǵasynyń oryn­basary Bıkesh Qurmanǵalıevanyń aıtýyn­sha, ASTEX-2014 halyqaralyq kórme-kon­ferensııasyna 3 200 adam kelip, 41 spı­ker sóz sóılegen. Eki kúnde 9 sessııa, eki sheberlik sabaq, úsh dóńgelek ústel, star­tap-jobalardyń kórsetilimi, 17 ekijaqty kezdesýler ótken. Dastan KENJALIN, «Egemen Qazaqstan».