Joba «Teatr óneri», «Horeografııalyq óner», «Mýzykalyq-oryndaýshylyq óner», «Beıneleý jáne sándik-qoldanbaly óner» sııaqty 4 nomınasııa boıynsha 19 syılyqty qamtıdy. Sonymen qatar balalar jylyna oraılastyrylǵan «Úzdik balalar spektakli úshin» arnaıy júlde jarııalandy.
Vıse-mınıstr UMAI ulttyq syılyǵy Qazaqstannyń shyǵarmashylyq ujymdary men jekelegen óner qaıratkerlerin eleýli kásibı jetistikteri úshin qoldaýǵa baǵyttalǵanyn atap ótti.
«Qatysýshylardyń ótinimderi osy jyldyń 9 jeltoqsanyna deıin qabyldanady. Nomınanttardyń jumysyn quramyna Qazaqstannyń belgili mádenıet jáne óner qaıratkerleri kiretin saraptama komıssııasynyń músheleri baǵalaıdy. UMAI Ulttyq syılyǵynyń jalpy júlde qory - 54 mln teńge. Aıta ketý kerek, syılyq shyǵarmashylyq ujymdarǵa jáne jekelegen óner qaıratkerlerine 2020 jyldyń qyrkúıeginen 2022 jyldyń shildesine deıin eki teatr, konsert, óner maýsymynda jasalǵan spektaklder, konsertter, shyǵarmashylyq jobalar, óner týyndylary úshin beriledi», dedi Nurǵısa Dáýeshov.
Nomınanttardyń ótinimderi UmaiAstanaOpera@gmail.com elektrondy poshtasy arqyly qabyldanady.
