«2016-2020 jyldary jumys kúshi jylyna orta eseppen 36,4 myń adamǵa ósse, bul kórsetkish byltyr 2 ese ósip, 76 myńǵa jetti. Olardy jumyspen qamtý máselesine kelsek, atalǵan kezeńde jaldamaly jumyskerler sany 68,8 myń adamnan 23,5 myń adamǵa deıin azaıdy. Bul jaǵdaı jumys oryndardyń jetkiliksiz bolýyna baılanysty týyndap otyr», dedi T.Dúısenova.
Sondaı-aq mınıstr 10 Ulttyq jobanyń aıasynda qurylyp jatqan jumys oryndaryna toqtalyp ótti.
«Búgingi tańda bul jospar 75,6%-ǵa oryndaldy. Memleket tarapynan sýbsıdııa beriletin jumys oryndaryn eskergende 203,3 myń jumys orny quryldy. Sharýamyzdyń oıdaǵydaı atqarylýyna «Kásipkerlikti damytý», «Qýatty óńirler – el damýynyń draıveri» jáne «Agroónerkásip keshenin damytý» sııaqty Ulttyq jobalardyń tabysty júzege asýy septigin tıgizdi. Jańadan ashylǵan jumys oryndarynyń 92%-y osy 3 jobanyń enshisinde. Al, basqa jobalarda eń azy 492, eń kóbi 6,2 myń jumys orny quryldy», dedi mınıstr.
Mınıstrdiń aıtýynsha, sýbsıdııa beriletin jumys oryndaryn qurý arqyly jastar turaqty jumysqa ornalasatyn bolady.
«Qazir bul baǵyttaǵy josparly kórsetkishter oryndaldy. Sýbsıdııa beriletin jumys oryndaryna qamtylǵan 152 myńnan astam azamattyń 41%-y – jastar. Osy sharalardyń nátıjesinde jastar naqty mashyqtar men daǵdylardy ıgerip, ári qaraı turaqty jumysqa ornalasady. Alaıda, óńirlerdiń kópshiligi bul baǵdarlamalarǵa qatysqan turǵyndardy turaqty jumysqa ornalastyrmaǵan. Elimiz boıynsha jospar 34,8%-ǵa ǵana oryndaldy. Eń joǵary kórsetkishter Aqmola, Jambyl, Qyzylorda jáne Almaty oblystarynyń enshisinde. Al, eń tómengi kórsetkishter Shymkent qalasynda, Túrkistan jáne Pavlodar oblysynda. Jastardy jumysqa ornalastyrý máselesi boıynsha da ahýal dál osyndaı sıpatta bolyp otyr. Jańa ǵana aıtylǵan 3 oblys munda da kóshtiń sońynda tur», dedi T.Dúısenova Úkimet otyrysynda.
