«Elordada 16 eldi mekenderde shamamen 345 myń adam turady – ıaǵnı, Astananyń árbir 4-shi turǵyny. Abattandyrý máselelerimen qatar júıeli máseleler de bar: elektr, sý, káriz, nóser, jylytý, áleýmettik nysandardyń qurylysy jáne t.b.
Memleket basshysynyń tapsyrmasyna sáıkes eldi mekenderdi júıeli túrde damytýdamyz. Máselen, turǵyn alaptardy 42 km sýmen, 17 km nóser, 11 km káriz, 3,2 km astam elektr jáne 680 km gazben jabdyqtaý jelilerin saldyq. Eldi mekenderde 4 bilim berý nysanyn, 2 sport keshenin, 300 aýla men qoǵamdyq keńistik jáne uzyndyǵy 117 km-den asatyn 250 kósheni jóndep, saldyq, sonymen qatar 3,7 myń jaryqtandyrý tiregin ornattyq», dedi A.Kólginov.
Onyń aıtýynsha, eldi mekenderdi damytý boıynsha jumystar áli de jalǵasýda.
«Kezdesýlerdiń birinde «Úrker» eldi mekeniniń turǵyndary «sol jaǵalaýdyń jaryǵyna tamsanamyz» degen bolatyn. Bizdiń maqsatymyz – shet aımaqtardy ómir súrýge qolaıly etý. Bul baǵyttaǵy jumystarymyzdy da júrgizýdemiz. «Aǵash otyrǵyzý ýchaskesi» (LPÝ) eldi mekenine jeke toqtalyp ketsem. Bul eldi mekende 400-den astam adam turady. Kezdesýde sý máselesi kóterildi, óıtkeni bul eldi meken paıda bolǵaly turǵyndarǵa ortalyqtandyrylǵan sý qubyry tartylmaǵan. Turǵyndar sýdy tasýǵa májbúr, árıne, bul kóptegen qolaısyzdyqtardy týdyrady. Buǵan deıin jobany jasap, qazir ortalyq sý qubyry men káriz jelileriniń qurylysyn bastadyq», dedi ol.
Sonymen qatar kelesi jyldan bastap atalǵan eldi mekendi gazdandyrý boıynsha jobany daıyndaý josparlanyp otyr.
