Kezinde kúres túrlerimen kásibı túrde aınalysyp, talaı dodada tomaǵasy sypyrylǵan ardager balýandardyń tartysty kúresi sport keshenine jınalǵan jankúıerlerdiń kóńilinen shyqty deýge bolady. О́ıtkeni bozkilemmen qoshtassa da, burynǵy balýandar áli de babynda eken.
Qara teńiz jaǵalaýynda ótken qara kúsh ıeleriniń beldesýinde qazaqstandyq balýandardyń birqatary tuǵyr bıiginen kórindi. Atap aıtar bolsaq, grek-rım kúresinen Qazaqstan chempıonatynyń birneshe dúrkin júldegeri, halyqaralyq týrnırlerde tabysty óner kórsetken shymkenttik balýan Joldybaı Toqbaev álem chempıonatynda altynnan alqa taǵyp, Bolgarııada Ánuranymyzdy shyrqatty. 62 kılo salmaqta beldesken otandasymyz er jigitke tán jiger kórsetip, chempıonattaǵy kózdegen maqsatyna jetti.
«Bıylǵy álem chempıonatyna tyńǵylyqty daıyndalyp, naǵyz sporttyq babymda bardym. Birinshilikke deıin «osy balýanmen beldesip qalam-aý» dep ár qarsylasyma jeke-jeke taktıka quryp, daıyndaldym. Mine, tynymsyz eńbektiń arqasynda osyndaı jeńiske jetip otyrmyn. Fınalda ardagerler arasyndaǵy byltyrǵy álem chempıonatynyń jeńimpazy mysyrlyq balýandy bir upaı aıyrmashylyǵymen tize búktirip, altyn júldege qol jetkizdim», deıdi J.Toqbaev.
