Torǵaı murajaılar kesheniniń dırektory Gúlbaný Sársekeıdiń aıtýynsha, bul patefondy Aqań Lenınmen kezdesýge barǵan saparynda Máskeý qalasynan satyp alyp kelgen.
1988 jyly Alash arystary aqtalǵannan keıin sol kezdegi Torǵaı oblystyń partııa komıtetiniń ıdeologııa jónindegi hatshysy О́zbekáli Jánibekov, aýdan hatshysy Jaqan Qosabaev pen ólke tarıhynyń bilgiri Ǵazız Ámirqanuly syndy azamattar bastap, qalyń jurt qoshtap, búkil el bolyp aqshalaı-maldaı qor jınap, Torǵaıda Ahań men Jaqańa arnalǵan mýzeıdi ashady. Aqańnyń patefony sol kezde Almatydan kelgen alǵashqy jádigerlerdiń biri bolsa kerek.
– Qarjy jınalyp, mýzeı ǵımaraty daıyn bolǵan soń, ár jaqqa arnaıy adamdar jiberilip, kimde ne bar ekenin surastyryp, jádiger izdestirý, mýzeı qoryn tolyqtyrý jumystary bastalady. Sol kezde Sholpan apamyzdan eń birinshi kelgen dúnıe – osy aıaýly Aqańnyń alaqanynyń taby qalǵan kóne patefon edi. Ahmet Baıtursynuly Lenınge dala qazaqtaryna jańa ókimette bolyp jatqan jańalyqtardy bilip otyrý úshin qural kerek qoı. Ol úshin, eń birinshi kezekte, el tyńdaıtyn grammofondar men patefondar, kúıtabaqtar bolý kerek degen talap qoıyp, qazaq dalasyna tuńǵysh ret radıony ákelgenin jaqsy bilesizder. Sholpan Ahmetqyzy saqtap, jetkizgen bul patefon keıin biraz ýaqyt Almatydaǵy qazirgi Ahmet Baıtursynulynyń mýzeı-úıinde turǵan, – dedi Gúlbaný Sársekeı.
Mýzeıde patefon sóıletip, mýzyka tyńdap otyrǵan Aqań men Bádrısapa ananyń, olardyń ortasynda turǵan Sholpannyń da músini tur.
Qostanaı oblysy
