Alǵys arqalaǵan jaýynger

Jas jaýynger Tótenshe jaǵdaılar mınıstri Ilıa Ilınniń qolynan Memleket basshysy qol qoıǵan «Erligi úshin» medalin aldy. Otan aldyndaǵy boryshyn 31 775 áskerı bóliminde abyroıly atqaryp júrgen Aleksandrdy áńgimege tarttyq. 18 jastaǵy Aleksandr bala kezinen jaýapkershiliktiń salmaǵy qandaı ekenin bilip ósken úıdegi tórt balanyń úlkeni eken.

«Otbasyda alty janbyz, – dep áń­gi­mesin qazaqsha bastady Aleksandr. – Qazaq aýylynda týyp-óstim, anam – qazaq, mektepti de, kolledjdi de qazaqsha oqyp bitirdim, onyń ústine memlekettik tildi bilý – mindetimiz».

Shyǵys Qazaqstan oblysynyń Úrjar aýdanyna qarasty Jańa tilek aýylynda týyp-ósken Aleksandrdyń traktor júrgizip úırengenine eki jyl bolypty. Tipti áskerde júrgen az ǵana ýaqytta BMP (jaıaý ásker mashınasy) kóligin júrgizýdi úırenip alǵan. 9-synypty bitirgen soń Úrjardaǵy aýylsharýashylyq kolledjin támam­dap, birden áskerge attanǵan. «Ge­ne­ral bolýdy armandamaıtyn sarbaz joq», demekshi Aleksandr da «Otan al­dyn­da­ǵy boryshyn ótegen soń min­det­ti túrde áskerı joǵary oqý ornyna tú­sip, ofıser bolamyn», deıdi.

«Áskerge kelgende maǵan qoldaý kórsetken komandırim maıor Rýstam Sıtıa­kovten kóp nárse úırendim. Bola­shaqta komandırim sııaqty ofıser bolyp, áskerde qyzmet jasaǵym kele­di. Qazirgi kezde áskerge barǵysy kel­meı­tin jigitter bar. Sonda eldi, jerdi kim qorǵaıdy? El basyna kún týsa, kez kelgen mamandyq ıesi Otandy qor­ǵaý­ǵa tıis. Beıbit kúnniń ózinde órt sóndirýge qanshama adam, neshe tehnıka jumyldyryldy? О́rtke oranǵan dala, birneshe shaqyrymǵa sozylǵan tútinge qaramastan, sol sátte órt sóndirýden basqa basyma eshqandaı qorqynyshty oı kelgen joq», deıdi Aleksandr.

Alty jyl grek-rım kúresimen aına­lys­qan Aleksandr áskerı bólim ishin­degi sporttyq jarystarda nátı­jeli óner kórsetip júr. Otan aldyn­daǵy boryshyn ótegen soń bilimdi ofıser bolýdy armandaıtynyn aıtyp qaldy. Bilimdi azamat – eldiń keleshegi. Bolashaqta otbasyna kómektesip qana qoımaı, el qorǵany bolar myqty ofıser bolar degen úmit te joq emes. Aıtpaqshy, Aleksandr bólim basshylyǵy bergen 10 kún demalysty paıdalanyp, týǵan aýylyna baryp qaıtypty. «Jańa tilekte birge ósip, birge oqyǵan dostarymmen, aýyldastarymmen kezdesip, saǵynyshymdy bastym», deıdi. Aleksandrdyń alǵan marapatyna ata-anasy men aýyldastary, sabaq bergen muǵalimderi qatty qýanǵan kórinedi.