Atalǵan jıyndy uıymdastyrýdaǵy kózdelgen maqsat – Nazarbaev zııatkerlik mektepteriniń tárbıe júıesindegi tájirıbemen bólisý, deıdi uıymdastyrýshylar.
«Nazarbaev zııatkerlik mektepteri jeke tulǵany tárbıeleý baǵytynda túrli baǵdarlamalar men jobalardy júzege asyryp kele jatyr. Solardyń ishinde «100 án», «100 kúı», «100 kitap», «Berik otbasy», «Týǵan elge taǵzym», «Danalyq beısenbi» syndy jobalar men «Shańyraq» qaýymdastyǵynyń atqaryp otyrǵan jumystary ár oqýshyny el men jerdi súıýge, ulttyq óner men qundylyqtardy baǵalaýǵa, úlkenge qurmetpen qaraýǵa tárbıeleıdi.
Osy semınar-praktıkýmda jyldar boıy jınalǵan tájirıbemizben jańadan qurylǵan Abaı oblysynyń ustazdarymen bólistik. Ekijaqty tyǵyz qarym-qatynas arqyly elimizdiń keleshegi jastarǵa sapaly bilim ǵana berip qoımaı, sanaly tárbıe bersek utarymyz kóp. Sharaǵa qatysqan ár ustaz ózine qajetti, paıdaly aqparatty meńgerip, tájirıbede paıdalanatynyna senimdimin», dedi Nazarbaev zııatkerlik mektepterin damytý departamenti dırektorynyń orynbasary Aıda Aǵadil.
Semınar-praktıkýmnyń barysynda Pavlodar, О́skemen qalalaryndaǵy zııatkerlik mektep ustazdarynyń túrli taqyrypta ár pánge kiriktirilgen sabaqtary ótti.
«Tárbıe salasyndaǵy túrli jobalarymyz qalalyq mektepterge buǵan deıin de tanystyrylyp, ekijaqty birlesken jumystar iske asyrylyp júrdi. Olarmen jyl boıy birneshe márte kezdesip, áli tájirıbe almasamyz. Endi tájirıbemen bólisý aýmaǵyn keńeıtip, aýyl mektepterine de bilgenimizben bólisýdi qolǵa aldyq. Semınar-praktıkýmge qatysýǵa 200-den astam ustaz nıet bildirdi. Biz munymen ǵana toqtap qalmaımyz. Osy baǵyttaǵy jumys aldaǵy ýaqytta da júıeli júrgiziledi», dedi Semeı qalasyndaǵy fızıka-matematıka baǵytyndaǵy Nazarbaev zııatkerlik mektebi dırektorynyń orynbasary Larısa Abylqasymova.
Semınar-praktıkýmge Úrjar aýdanynyń Maqanshy aýylynan kelgen jas ustaz Darhan Mamythanov bul basqosýdyń tájirıbelik paıdasyn aıtty.
«Ár kúni jańalyqqa toly qazirgi qoǵamda bala tárbıesi erekshe nazar aýdarýdy qajet etedi. Osy rette mekteptiń de róli erekshe. Qazir oqýshyny erteden kele jatqan dástúrli oqý prosesimen tárbıeleý múmkin emes. Jańasha kózqaras, jańa baǵyt kerek. Mine, osy baǵytty búgingi semınar-trenıngten kórip otyrmyn. Oqýshyny azamattyq kózqarasy qalyptasqan, ultjandy, patrıot bolyp ósýine yqpal etetin túrli jobalardy úırenip, óz mektebimizde qoldanysqa engizýdi josparlap otyrmyn», dedi Áset Naımanbaı atyndaǵy orta mektep dırektorynyń tárbıe isi jónindegi orynbasary.
Joǵary deńgeıde uıymdastyrylǵan semınar-praktıkým aýyl mektebi ustazdarynyń tájirıbe almasyp, tárbıe salasyndaǵy bilimderin molaıtýǵa septigi tıetin tıimdi alańǵa aınaldy.
Abaı oblysy
