Kegen aýdanynyń turǵyndaryn qazir jer máselesi tolǵandyryp otyr. Tórt túlik malǵa arqa súıegen, egin egip jer emgen aǵaıynǵa qajeti – jer ǵana. Osy máseleni aýdan turǵyndary aýdan, oblys bıliginiń aldyna kóldeneńinen qoıyp kelgen edi. Búgin Qonaev qalasyndaǵy kezdesýinde Prezıdent oblystaǵy osy jer máselesine toqtaldy. «Aımaqta taǵy bir ózekti másele bar. Bul – turǵyndardyń malyn jaıatyn jerdiń tapshylyǵy. Bıyl oblysta bos jatqan 300 myń gektar jer anyqtalǵan. Onyń basym bóligi – jaıylym. Jer ıeleri 100 myń gektar jerdi óz erkimen memleket menshigine qaıtardy. Onyń 50 myń gektary qazirdiń ózinde halyqtyń ıgiligine berildi», dedi Qasym-Jomart Toqaev. Osy ıgilikke Kegen aýdanyndaǵy sharýalardyń da qoly jetti.
Sondaı-aq Memleket basshysy Qasym-Jomart Toqaev óńirdiń týrıstik áleýeti zor ekenin aıtty. Osyǵan oraı bizdiń aýdanymyzdyń týrıstik áleýeti týraly maqtanyshpen aıtýǵa bolady. Kegen aýdany oblysymyzdaǵy týrızmniń bir otany ǵoı. Bıyl kórikti Kólsaıǵa deıingi respýblıkalyq mańyzy bar jol asfalttalyp, jasalǵaly óńirge kelýshilerdiń sany eki eselep artty. Aýdanda 3 qonaqúı, 61 qonaqtardy qabyldaıtyn úıler bar. Ústimizdegi jyldyń 8 aıynda 175 778 týrıst kelip, aýdannyń bıýdjetine 54 809 myń teńge salyq quıyldy. Aýdan memlekettiń týrıstik salasyn damytýdyń 2019-2025 jyldarǵa arnalǵan memlekettik baǵdarlamasynyń basym aýmaqtarynyń ondyǵyna kiretin Almaty taý klasterine engizilgen. Ekologııalyq týrızm aýdannyń negizgi týrıstik ónimi bolyp tabylady. Onyń damýy aýdan aýmaǵynda ornalasqan «Kólsaı kólderi» Ulttyq tabıǵı memlekettik parkiniń áleýetine negizdelgen. О́tken jyly «Kólsaı Grand» jáne «Kólsaı Nomad» qonaqúıleri paıdalanýǵa berilip, 143 mıllıon teńgeniń ınvestısııasy tartyldy.
Aldaǵy ýaqytta Qazaqstan Respýblıkasy ekologııa, geologııa jáne tabıǵı resýrstar mınıstrligimen birlesip, «Kólsaı kólderi» parkiniń aýmaǵynda ekologııalyq týrızmdi damytý úshin Ulttyq parkke 5 mıllıard teńgege ınvestısııalyq jobalardy iske asyrý josparlanyp otyr. Ulttyq park aýmaǵyna jol jáne ınjenerlik ınfraqurylym júrgizý maqsatynda bıyl 2,1 mıllıard teńge bólindi. Osylaısha 19 shaqyrym jol jóndeýden ótkizilip, 17,2 shaqyrym elektr jelileri qaıta jańǵyrtylady. Bul óz kezeginde týrızmniń, shaǵyn jáne orta bıznestiń damýyna jarqyn jol ashady.
Qanat BIRJANSAL,
aqyn, jýrnalıst,
Qazaqstan jazýshylar jáne jýrnalıster odaǵynyń múshesi
Almaty oblysy
