Ult sportynyń úmiti

Áıtse de, keıingi jyldary sportshylardyń jańa býyny tyńnan túren salyp, jańa sport túrlerin meńgere bastady. Olar jaı meńgerip qana qoımaı, sanaýly jyldyń ishinde óz qatarlastary arasynda alpaýyt elderdiń ókilderin júldesiz qaldyryp júr. Máselen, orta ǵasyrlarda Fran­sııada paıda bolǵan tennıs sportynda keıingi bir-eki jyldyń kóleminde Alashtyń órenderi jarqyrap óner kórsete bastady. Alysqa barmaı-aq tennısten Qazaqstannyń 14 jasqa deıingi jasóspirimder quramasynyń bıylǵy álem chempıonatyndaǵy jetistigin aıtsaq jetip jatyr.

Aqsúıekterdiń oıyny sanalatyn tennıs sporty federasııasy elimizde 1992 jyly quryl­ǵany­men, 30 jyldan bergi qajyrly eń­bektiń jemisi endi kórine bas­tady. Ten­nısten Qazaqstannyń 14 jasqa deıingi jasóspirimder quramasy bıyl Chehııanyń Prosteev qalasynda uıymdastyrylǵan álem chempıonatyna el tarıhynda tuńǵysh ret qatysyp, álemniń eń úzdik tórt quramasynyń qata­rynan kórindi.

Qazaqstandyq jasóspirimder mundaı deńgeıdegi jarysqa alǵash ret qatysqanyna qaramastan, álemdegi úzdik quramalarmen te­rez­esi teń óner kórsetti. Jerles­teri­miz jahandyq birinshilik ba­ry­synda byltyrǵy álem chempıony – Italııa, sonymen qa­tar Argentına, Slovenııa sekildi qura­malardy jarys jolynan yǵys­tyrdy. Dúnıejúzilik dodada el namysyn qazaqtyń talantty uldary – Zańǵar Nurlanuly, Damır Jal­ǵasbaı jáne Danıel Ta­za­be­kov qorǵaǵanyn aıta ke­teıik.

Sondaı-aq qyzdarymyz da uldardan qalysqan joq. Jýyrda ǵana Taılandta 14 jasqa deıingi tennısshiler arasyndaǵy Azııa chem­pıonaty aıaqtaldy. Sary qur­lyq básekesiniń jekeleı synynda qazaqtyń eki qyzy – Arıana Gogýlına men Albına Kákenova barlyq qarsylasyn tize búktirip, Azııanyń úzdik tennısshileri atan­dy. Komandalyq saıysta da Qazaqstan quramasynyń ókilderi top jardy. Azııa birinshiliginde óreli ónerimen kózge túsken Al­bına Kakenova 14 jasqa deıin­gi tennısshiler arasynda Azııa reıtınginde kósh bastady. Bul da bir tarıhı kórsetkish.

Oılylar oıyny sanalatyn shahmat sportynda Dınara Sá­dýaqasova, Jansaıa Ábdimálik, Bıbisara Asaýbaeva sekildi áıel­der jáne erler arasyndaǵy gross­meısterlerdiń jaqyn arada ornyn basatyn myqty býyn qalyptasyp keledi. Máselen, qazan aıynyń alǵashqy onkúndiginde Ázerbaıjanda 16 jasqa deıingi jasóspirimder arasyndaǵy dúnıe­júzilik shahmat olımpıadasy uıymdastyryldy. Bul dodaǵa Qazaqstan quramasynyń 12 jáne 14 jastaǵy sportshylary qatyssa da, ózderinen úlken shahmatshylarymen teń dárejede óner kórsetti. Tipti erler arasyndaǵy jarysta synǵa túsken Saýat Nurǵalıev jeke esepte barlyq partııada úzdik nátı­je kórsetip, olımpıadanyń altynyn jeńip aldy. Sondaı-aq taǵy bir zerek shahmatshy Iman­ǵalı Aqylbaı qola júldeger atan­dy.

Qazaqstan quramasynyń sportshylary ózderinen úlken jastaǵy shahmatshylarmen oınasa da, jalpykomandalyq esepte shahmat sportynyń úzdikteri sanalatyn Úndistan men Irannyń komandalaryn basyp ozyp, úzdik tórttiktiń qatarynan kórindi.

Keńes ókimeti tusynda qazaq jeńil atletteriniń aty ozǵan-dy. KSRO quramynda Olımpıadaǵa qatysqan tuńǵysh qazaq jelaıaǵy Ǵusman Qosanovtyń 1960 jyly Rım Olımpıadasynda kúmis me­dalǵa ıe bolǵanyn sport jan­kúıerleri jaqsy biledi. Ǵ.Qo­sanovtyń izin ala Ámın Tuıaqovtyń esimi jeńil atletıka sportynda jańǵyrdy. Ámın aǵamyz alty dúrkin KSRO chempıo­ny, óz zamanynda 100 jáne 200 metr qashyqtyqqa júgirýden KSRO-nyń birneshe rekordyn jańartqan dańqty jelaıaq bolatyn. О́kinishke qaraı, keıinnen Ǵusmandaı, Ámın­deı jelaıaq aǵalardyń jeńisti joly birazǵa deıin úzilip qalǵan­daı edi. Áıtse de, egemendi elde dúnıege kelgen jas daryndy sportshylar jeńil atletıkadaǵy úmitimizdi qaıta jaqqandaı boldy.

Osydan birer kún buryn Ký­veıttiń bas shahary – ál-Ký­veıt­te jeńil atletıkadan jasós­pi­rimder arasyndaǵy Azııa birin­shiliginde Qazaqstannyń sportshylary aýyz toltyryp aıtar­lyqtaı jetistikke qol jet­kizdi. Nátıjesinde, 3 altyn, 3 kúmis jáne 1 qola medal enshilegen óren­derimiz jalpykomandalyq esepte besinshi orynǵa taban tiredi. Bul – Qazaqstannyń jas­óspi­rimder arasyndaǵy Azııa birin­shi­lik­te­rindegi eń úzdik nátı­jeleriniń biri.

Mine, bul – qazaq sportynyń bolashaǵyna balaǵan jas sport­shy­larymyzdyń tek bir jarys­ta ǵana qol jetkizgen tolaıym tabysy. Sa­naýly jyldardan keıin elimizdiń negizgi quramyna qabyldanatyn bul býynǵa el namysyn qorǵaýdy Olım­pıada, álem, Azııa chempıonattarynda senip tapsyra berýge bolady degen senimdemiz.