Abaısha aıtqanda, «ónerge árkimniń-aq bar talasy». Temirjolshy Imanbek Zeıkenov mýzykamen maqsatty túrde aınalyspasa da yqylasy bala kezinen bar-tyn. 2000 jyly Pavlodar oblysynda dúnıege kelgen jas talanttyń ónerge degen alǵashqy qyzyǵýshylyǵy segiz jasynda ákesi syılaǵan gıtaradan bastalypty. Al keıinnen Joǵary elektronıka jáne kommýnıkasııalar kolledjinde oqyp júrip, Aqsý temirjol stansasynda qatar jumys istegen Imanbek, árıne, dál búgingideı ataq-dańqqa ıe bolaryn ol kezde sezgen joq. Sonda da bos ýaqytynda mýzykamen áýestendi: izdendi, oqydy, úırendi, eń bastysy, talantyna talaby saı keldi.
Mýzykada remıks degen janr bar. Iаǵnı mýzykalyq shyǵarmanyń bastapqy túpnusqadan keıinirek jáne qazirgi zamanǵy tehnıkanyń kómegimen jazylǵan nusqasy. Keıde ol túpnusqa shyǵarmanyń birneshe bóligin «aralastyrý», ony ártúrli dybyspen qabattaý, arnaıy effektiler, yrǵaqty, perneni jáne basqa elementterin ózgertý arqyly jasalady. Imanbek 17 jasynan bastap osy remıks jasaýdy qolǵa alady. Alǵashqyda reseılik Effective Records leıbli arqyly ataqty amerıkalyq reperdiń «Roses» ánine beıresmı remıks jasaǵan (ánniń ózi 2016 jyly jaryqqa shyqqan). Remıks Saint Jhn qatysýynsyz jasaldy, óıtkeni repermen baılanysa almady. Bul 2019 jyl edi.
Remıks jasalǵan án Reseı, Ýkraına, Belorýssııanyń hıt-sherýlerin jaryp shyǵady, otandyq arnalar birinen keıin biri jańa juldyz týraly sıýjetter jasaı bastaıdy. Budan soń «Roses» Shazam álemdik reıtıngisinde №1 oryndy ıelendi. Amerıkalyq Billboard chartynda TOP-25 ánniń qataryna kirdi. Árıne, bul – qazaqstandyq mýzykanttar úshin úlken jańalyq. О́ıtkeni Imanbek – bul chartqa ilingen alǵashqy qazaq.
«Roses», aldymen, TMD kóleminde ǵana tanymal boldy. 2019 jyldyń sońyna qaraı Grekııa, Polsha, Túrkııaǵa jetti. Al 2020 jyly trek Batys Eýropa men Amerıkany bıletti. Germanııa men Ulybrıtanııada 1-orynda tursa, Amerıkada úzdik TOP-50 qataryna kiredi. Osylaısha, jas qazaq jazǵan remıks án tyńdaıtyn túgel jurtty sharlap kete berdi. Ataq ta, dańq ta, qoshemet te dúnıe júziniń ár tarapynan jaýyp jatty.
«Ánniń baǵyn ánshi ashady» nemese «ánshiniń baǵyn án ashady» degen osy bolar, sirá. Bir suhbatynda: «Shyndyǵyn aıtý kerek, meniń mýzykalyq bilimim joq. Biraq ándi jan-júregimmen tyńdap, oǵan remıks jazamyn. Ata-anam árbir jetistigime qýanyp, tilekshi bolyp júredi. Ol kisilerdiń rızashylyǵy meni shabyttandyrady. Maǵan ártúrli memleketten túrli usynys túsip jatady. Kóbine dostarymmen, jaqyndarymmen aqyldasyp bir sheshim qabyldaımyn. Alǵashqy jazǵan remıksim ózin-ózi tanytty dep aıta alamyn. О́ıtkeni ol túrli tanymal toptardyń bólisýimen keń tarady», degen Imanbek qazir mýzykaǵa tolyǵymen bet burdy. Kásibı túrde aınalysady. Ol óziniń avtorlyq trekterin de shyǵaryp úlgerdi. Qazaqstanda, Reseıde, Ýkraınada Imanbek Music leıblimen belgili qazaq prodıýseri jáne haýs-mýzyka remıkseri jasaǵan týyndylardyń ishinde shoqtyǵy bıigi de az emes. Máselen, «Take Me» (O’Neill-men birge), «Hot» (Parah Dice-pen birge), «Smoke It Up» (Stephanskiy-men birge), «Dope», «Clandestina» (with FILV & Edmofo featuring Emma Peters), «Romantic Dance» (DJ DmimixeR feat. MURANA) jáne taǵy da basqalary.
Keıipkerimiz 2019 jyly «Qazaqstannyń 100 jańa esimi» memlekettik jobasynyń jeńimpazy atanyp, «Mádenıet» atalymynda birinshi orynǵa ıe bolǵany esimizde.
Baıqasaq, Imanbektiń esimimen birge alǵashqy degen sózdi jıi aıtady ekenbiz. Iá, onyń Saint JHN oryndaıtyn «Roses» ánine jasaǵan remıksi amerıkalyq dybys jazý óneri jáne ǵylym akademııasy uıymdastyratyn «Gremmı» syılyǵyna usynylyp, «Best Remixed Recording» atalymyn jeńip aldy. «Gremmıdi» alǵan alǵashqy qazaq.
«Gremmıge» usynylǵan «Roses» 20 apta boıy Billboard chartynda, Apple Music reıtıngisinde TOP-10 ishine kirdi. The Weeknd, Dua Lipa, Billie Eillish, Roddy Ricch, Justin Bieber syndy áıgili ánshilerdi basyp ozyp, birneshe chartta oq boıy ozyq turdy. Munda da chartqa ilingen alǵashqy qazaq.
