Baıqaý qorytyndysynda «Egemen Qazaqstan» gazetiniń ardageri, tanymal jýrnalıst Gúlzeınep Sádirqyzy bas júldege laıyq dep tanylsa, belgili jazýshy Qýandyq Túmenbaı birinshi oryn bıiginen kórindi. Abaı atyndaǵy Memlekettik syılyqtyń laýreaty, aqyn Serik Aqsuńqaruly men Halyqaralyq «Alash» ádebı syılyǵynyń ıegeri, qalamger Kósemáli Sáttibaıulyna ekinshi oryn buıyrsa, jazýshy-dramatýrg, Halyqaralyq «Alash» ádebı syılyǵynyń laýreaty Elen Álimjan men Anar Qonys úzdik úshtikten kórindi.
Uıymdastyrýshylar júldege laıyqty shyǵarmalardyń kóptigin eskergen bolýy kerek, ózge de birneshe avtor júldegerler qatarynan kórindi. Atap aıtar bolsaq, Úmit Bıtenova, Kaıym-Munar Tabeev, Aqyljan Mamyt, Kóshkinbaı Elikbaev syndy tórt avtorǵa yntalandyrý júldesi tabystaldy. Júldegerlerdiń barlyǵy qomaqty qarjylaı syılyqqa ıe boldy.
Sonymen qatar Sherhan Murtaza atyndaǵy «Rýhanııat jáne tarıhtaný» ortalyǵy uıymdastyrǵan respýblıkalyq «Shynnyń júzi – Sheraǵa» atty aqyndar músháırasy qorytyndylanyp, úzdik shyqqan shyǵarma avtorlary baǵaly syılyqtarmen marapattaldy.
Músháıraǵa elimizdiń ár qıyrynan jalpy sany otyz toǵyz avtordan shyǵarmalar kelip túsken bolatyn. Qazylar alqasynyń suryptaýynan ótken bes aqynnyń óleńderi júldege laıyq dep tanylǵan eken. Nátıjesinde, bas júlde ardager jýrnalıst, aqyn Baıhamanbet Ahmetke buıyrsa, «Egemen Qazaqstan» gazetiniń Jambyl oblysyndaǵy menshikti tilshisi Tabıǵat Abaıldaev birinshi oryn ıegeri atandy. Araıly Jaqsylyq ekinshi orynǵa, Birjan Ahmer men Baltabek Nurǵalıev úshinshi orynǵa taban tiredi.
