Is-sharanyń qonaqtary arasynda Qyrǵyz Respýblıkasynyń memlekettik qurylymdarynyń basshylary, Bishkekte tirkelgen sheteldik elshilikter men halyqaralyq uıymdardyń basshylary, qoǵam qaıratkerleri, bıznes, ǵylymı jáne shyǵarmashylyq zııaly qaýym, BAQ ókilderi, sondaı-aq qazaqstandyq dıaspora qatysty.
Qabyldaýda sóz alǵan Qazaqstannyń Qyrǵyzstandaǵy elshisi Rápil Joshybaev Qazaqstannyń táýelsizdik jyldaryndaǵy basty jetistikterine toqtaldy. Elimizdiń ishki jalpy ónimi osy jyldar ishinde 18 ese óskeni, tikeleı sheteldik ınvestısııa kólemi 350 mıllıard AQSh dollarynan astamǵa jetkeni aıtyldy. Elimizdiń Eýrazııalyq ekonomıkalyq odaq, Ujymdyq qaýipsizdik sharty uıymy, Shanhaı yntymaqtastyq uıymy, Túrki memleketteri uıymy, Azııadaǵy ózara is-qımyl jáne senim sharalary keńesi sııaqty uıymdardy qurýdaǵy sheshýshi róli erekshe atap ótildi.
О́ziniń quttyqtaý sózinde Qyrǵyz Respýblıkasy Syrtqy ister mınıstriniń birinshi orynbasary N.Nııazalıev Qazaqstan Respýblıkasynyń áleýmettik-ekonomıkalyq damýdaǵy, kelisimdi qoǵam men turaqtylyqty qalyptastyrýdaǵy, onyń halyqaralyq arenadaǵy orny men bedelin nyǵaıtýdaǵy tańǵalarlyq tabystaryn atap ótti.
Qyrǵyzstannyń birqatar memlekettik, qoǵamdyq-saıası jáne mádenı qaıratkerin, bıznes jáne BAQ ókilderin ekijaqty yntymaqtastyqty damytýǵa qosqan úlesi úshin nagradalarmen marapattaý shara baǵdarlamasynyń erekshe bóligi boldy.
Sondaı-aq qonaqtar nazaryna Qazaqstannyń jetistikteri men qazaq-qyrǵyz qarym-qatynasynyń damýy týraly beıne jáne fotokórme usynylyp, qazaq jáne qyrǵyz halyq mýzykasyn oryndaǵan ónerpazdardyń óner kórsetýi, qazaqtyń ulttyq taǵamdary da usynyldy.
