Senatorlar elimizdegi qolaıly ınvestısııalyq ahýaldy damytýǵa jáne eksportqa baǵdarlanǵan jobalardy iske asyrý úshin otandyq jáne sheteldik ınvestısııa tartýǵa baǵyttalǵan «Aqtaý teńiz porty» AEA-da boldy. Depýtattarǵa ekonomıkalyq aımaqtyń jalpy aýmaǵy 9 sýbaımaqtan turatyny jáne aýdany 2 140 gektardy quraıtyny týraly aqparat berildi.
Parlamentshiler jol bıtýmyn óndirý jónindegi kásiporynnyń jumysymen tanysyp, «Quryq porty» men «Aqtaý teńiz saýda portyn» aralady.
«Bizdiń kelýimizdiń maqsaty – arnaıy ekonomıkalyq aımaq qyzmetimen tanysý, qurylystyń aıaqtalmaýy jáne ınfraqurylymdy júrgizý, óńdeý ónerkásibine jeke ınvestısııalardy tartý deńgeıi boıynsha máselelerdi talqylaý, sondaı-aq arnaıy ekonomıkalyq aýmaqtarynda qoldanystaǵy jáne iske asyrylyp jatqan jobalardy qarastyrý», dedi komıtet tóraǵasy Serikbaı Trumov.
Depýtattar komıtet músheleriniń óńirlerge saparynyń qorytyndysy boıynsha «Arnaıy ekonomıkalyq aımaqtardyń naqty jaı-kúıi jáne jumys isteýiniń aldaǵy perspektıvalary» taqyrybynda keńeıtilgen dóńgelek ústel ótkiziletinin aıtty. Onda osy saparda kóterilgen barlyq problemalyq máseleler talqylanbaq.
