Mazmundy mýzyka keshinde teatr solısteri, Astana Opera Halyqaralyq opera akademııasynyń tyńdaýshylary jáne oblystyq fılarmonııalardyń shaqyrylǵan ártisteri, atap aıtsaq, Qazaqstannyń eńbek sińirgen ártisi Sholpan Dúkimbaeva (Kókshetaý), Qazaqstannyń eńbek sińirgen ártisi, mádenıet qyzmetkeri Nurııash Ospanova (Atyraý), maestro Marat Áıtimov (Aqtóbe) bastaǵan talantty mýzyka maıtalmandary óner kórsetti. Kórermen nazaryna daryndy ártisterdiń oryndaýynda Kúlásh Baıseıitovanyń repertýarynan ásem de áýezdi ánder usynyldy.
Konsert ajaryn ashqan sondaı biregeı oryndaýdyń biri – Qazaqstannyń eńbek sińirgen ártisi Ǵalııa Baıǵazınova áýeletken ánshi repertýaryndaǵy ásem ánder kelgen kórermenniń qulaq quryshyn qandyrdy.
– Men úshin bul konserttiń mańyzy óte zor, oǵan asqan jaýapkershilikpen daıyndaldym. Shyǵarmashylyq jolymda Kúlásh Baıseıitovanyń repertýaryndaǵy «Qyz Jibek» operasyndaǵy áıgili partııasynan bastap barlyq ánderdi aıtyp shyqtym. Sondaı-aq ańyzǵa aınalǵan ánshi birneshe márte shyrqaǵan polıaktyń halyq ánin Polshada tanystyrdym. Bul mýzykalyq shyǵarmalardyń barlyǵy maǵan óte qymbat, sebebi janyma ystyq estelikter solarmen baılanysty. Al ánshiniń talantty ǵumyry biz úshin qashanda ǵumyrlyq taǵylym, dep tebirene tolǵandy ánshi.
Eske sala ketsek, qazaqtyń bulbulyna arnalǵan keremet keshtiń negizgi uıymdastyrýshysy – «Qazaqstan vokalıster odaǵynyń» qurylǵanyna bıyl 5 jyl tolady. Onyń tóraǵasy – «Astana Opera» opera trýppasynyń dırektory, Qazaqstannyń eńbek sińirgen qaıratkeri Azamat Jyltyrkózovtiń bastamasymen odaq elimizdiń túkpir-túkpirindegi oryndaýshylardyń basyn biriktirip, vokal ónerin nasıhattaýǵa qomaqty úles qosyp keledi.
– «Vokalıster odaǵy» respýblıkalyq uıym bolǵanymen, onyń geografııasy ýaqyt óte kele keńeıip, halyqaralyq birlestik deńgeıine kóterildi deýge bolady. Qazirgi tańda oǵan 100-den astam adam múshe. Olardyń barlyǵy kásibı bilikti vokalıster. Men de osy birlestiktiń quramyndamyn, onda aǵa býyn men jas mýzykanttar da jemisti eńbek etýde. Jas býyn bizben keńesip, osylaısha tájirıbe almasamyz. Birneshe ret «Vokalıster odaǵynyń» konsertin ótkizdik. Osy rette birlestik tóraǵasy Azamat Jyltyrkózovtiń eleýli eńbegin atap ótkim keledi. 2020 jyldan bastap «Vokalıster odaǵy» aıtýly datalarǵa oraı daryndy ánshilerdi Kúlásh Baıseıitova atyndaǵy medalmen marapattaýdy qolǵa aldy. Mundaǵy negizgi maqsat qazaq operasynyń negizin qalaǵan Kúlásh Baıseıitovanyń esimin dáripteý bolyp tabylady. О́zin ánshilik jolda synap júrgen ónerpazdar úshin bul shynymen de joǵary marapat, – dep atap ótti Qazaqstannyń eńbek sińirgen qaıratkeri, pıanıst Raýshan Beskembırova.
Buǵan deıin «Vokalıster odaǵy» Bıbigúl Tólegenova, Horlan Qalılambekova, Qanat Omarbaev, Shahımardan Ábilov, Barseg Týmanıan, Eva Marton sekildi ataqty qazaqstandyq jáne sheteldik opera ánshilerin osy medalmen marapattaǵan bolatyn. Olardyń barlyǵy da atalǵan birlestiktiń mártebeli múshesi. Sondaı-aq Úlken teatr solısi, Reseıdiń eńbek sińirgen ártisi Pavel Chernyh pen basqa da tanymal sheteldik ártister odaq músheleri atanǵanyn aıta ketkenimiz jón.
Al qazaq operasynyń ańyzy, bulbul ánshi Kúlásh Baıseıitovaǵa arnalǵan búgingi kesh shyn máninde tulǵanyń ónerdegi taǵylymdy jolyn dáripteýge arnalǵan tamasha shyǵarmashylyq sharyqtaý bolǵany sózsiz. Ánshi izin jalǵar qazaqtyń talantty ul-qyzdary men talǵampaz tyńdarmany barda Kúlásh Baıseıitova esimi áste óshpeıdi. Ǵasyrdy ǵasyrǵa jalǵap Bulbul áýezi máńgi shyrqala bermek. Kórermen kóńilin serpiltken «Kúláshtiń áni» jobasy sonyń aıqyn dáleli.
