«Orta bilim berýdiń ózekti máselesi – bilim mazmuny men sapasy. Orta bilim berýde 2016-2021 jyldar aralyǵynda barlyq mektepter jańartylǵan mazmunǵa kóshti. Krıterıaldy baǵalaý júıesi engizildi. Sonymen qatar monıtorıngtik zertteýler jekelegen pánder boıynsha oqý baǵdarlamalaryn jetildirýdi qajet etetinin kórsetti. Búgingi tańda jumys toptary qurylyp, jańa memlekettik standart pen oqytý baǵdarlamalary daıyndalýda», dedi Ashat Aımaǵambetov.
Mınıstrdiń aıtýynsha, akademııalyq avtonomııa mektepterge kezeń-kezeńimen engiziledi.
«Mektepti attestattaý júıesi repressııalyq mazmunnan dıagnostıkalyq baǵytqa kóshedi. Mektepterdegi qorytyndy attestattaýdyń nátıjelerin halyqaralyq deńgeıde taný jumystary júrgiziledi», dedi mınıstr.
Sondaı-aq ol balalardy úıirmege tartý bilim salasy úshin mańyzdy ekenin atap ótti.
«Oqýshylar saraıy, jas tehnıkter stansııalary, mýzyka jáne óner mektepteri, balalar tehnoparkteri ashylady. Bilim berý uıymdarynda pikirtalas qozǵalysy, mektep jáne oqýshylardyń ózin-ózi basqarýy belsendi túrde damyp keledi. Bul balalardyń synı jáne analıtıkalyq oılaý qabiletin damytýǵa múmkindik beredi. Biz barlyq mektepterde debat qozǵalysy men mektep parlamentterin damytamyz», dep qosty A. Aımaǵambetov.
Ol oqý oryndarynda shahmat oıyndaryn damytýǵa qoldaý kórsetiletinin aıtty.
«Mektepterdegi shahmat seksııalaryna 200 myńnan astam bala tartylǵan. Federasııa bul baǵytta, ıaǵnı oqý-ádistemelik keshenderdi daıyndaý jáne jattyqtyrýshylar men muǵalimderdiń biliktiligin arttyrý jumystaryn júrgizedi», dedi A. Aımaǵambetov.
