Sportty damytý dıreksııasynyń aqparaty boıynsha, bes kúnge sozylǵan dúbirli dodada Qazaqstan quramasy 2 altyn, 1 kúmis jáne 1 qola medal oljalap, jalpykomandalyq esepte 5-satydan kórindi. Jarystyń sońǵy kúnindegi jasóspirimder básekesinde Bella Samasheva (55 kılo) fınalda jeńilip, kúmispen kúptelse, onyń aldynda kadetter arasyndaǵy dodada Álıhan Qadyrǵalı (70 kılo) men jasóspirimder arasynda Maksım Moskvıchev (61 kg) chempıon atanǵan bolatyn. Sondaı-aq Álisher Taıjanov (+76 kılo) qolany moınyna taqqan edi.
Jalpykomandalyq esepte Japonııa quramasy 11 medalmen (8 altyn, 3 qola) jeke-dara kósh bastasa, jarys qojaıyny – Túrkııa (4 altyn, 4 kúmis, 3 qola) 2-oryn aldy. Odan keıingi oryndarǵa Mysyr men Aljır sportshylary jaıǵasty.
