Jankúıerler qos altyn ıelengen astanalyq para sportshylardy qushaq jaıa qarsy alyp, erekshe qurmet kórsetti.
«Eń aldymen qoldaý bildirgen jaqyndaryma, dostaryma, jankúıerlerime alǵys bildiremin. Bul úlken jeńisterge jol ashatyn jetistik dep bilemin. Arman-maqsatymyz qashanda osyndaı iri halyqaralyq jarystardyń arenalarynda kók baıraǵymyzdy jelbiretip, bıikten kóriný», dedi álem chempıonatynyń jeńimpazy Dıdar Muhamedjanov.
Dúnıejúzilik doda Italııanyń Bergamo qalasynda ótken edi. Jarysqa álemniń 16 eliniń sportshylary qatysty.
Jarys qorytyndysy boıynsha, karateniń kata túrinen kórý qabileti zaqymdanǵan sportshylar sanatynda jerlesimiz Lázzat Júsipova qarsylastarynan ozyq boldy. Al tirek-qımyl apparaty zaqymdanǵan sportshylar sanatynda otandasymyz Dıdar Muhamedjanov álem chempıony ataǵyn ıelendi.
Endi ulttyq qurama sportshylary jeltoqsan aıynda ótetin Tashkent qalasyndaǵy Azııa chempıonatynda baq synaıdy.
