«Qyzyljar sý» JShS sýmen jabdyqtaý uıymynyń bas dırektory Jeńis Sultanov jaqyn arada sheshimin tabýdy qajet etetin máselelerdiń qatarynda, ásirese, jekemenshik ıgerilgen aýmaqtarda ortalyqtandyrylǵan káriz jelilerin keńeıtýdi atady.
«Turǵyn úılerge sý tartýdyń artýy baıqalady, biraq káriz joq. Eń jaqsy jaǵdaıda septıkter salynyp jatyr. Munyń barlyǵy jer asty sýlarynyń kóterilýine jáne aýmaqtardyń batpaqtanýyna ákelip soǵady», dedi Jeńis Sultanov.
Qala ákimi Rýslan Anbaev máselemen kelisip, sýly-batpaqty jerlerdi jan-jaqty zertteýge nıetti ekenin jetkizdi. Ákimniń aıtýynsha, tehnıkalyq tapsyrma daıyn. О́tken jyly konkýrs jarııalandy, biraq bul jumysty atqarýǵa nıettiler bolmady.
«Biz almatylyq mamandarǵa habarlastyq. Qala aýmaǵyna irgeles jatqan sýly-batpaqty jerlerdi nóser aǵyndaryn ornatý úshin jobany daıyndaýǵa konkýrs ótkizemiz. Aldaǵy ýaqytta sý sorǵy stansııalaryna jiberiletin bolady», dedi R.Anbaev.
Josparlardy oblys ákimi Qumar Aqsaqalov qoldady. Ol qazir aldaǵy úsh jyldyń bıýdjeti qarastyrylyp jatqanyn, onda sýly-batpaqty jerlerdi qurǵatýǵa ketetin shyǵyn da qarastyrylýy tıis ekenin aıtty.
«Qalanyń aınalasyndaǵy ındýstrııalyq aımaq damıdy. Biz aýmaqty keptirýimiz kerek. «Qazý» yqsham aýdany turǵyzyla bastady, ol jer batpaqty bolǵandyqtan sýdy aǵyzý qajet. Sý jınalatyn jerler kóp», dedi Q.Aqsaqalov.
