Bul – árıne, elimiz, halqymyz eleńdep tosyp otyrǵan zań. Keshegi qańtar oqıǵasy el tarıhyndaǵy asa aýyr, júregimizge úlken júk salǵan, kóńilimizge oı salǵan oqıǵa bolǵany belgili.
Qujattyń mańyzy mynada. Zań jobasy myńdaǵan adamnyń taǵdyryna áser etedi. Osy qujat boıynsha 1 500 adamǵa raqymshylyq jarııalanady. Asa aýyr jáne aýyr kinási barlardyń jazasy jeńildetiledi. Aýyr kinási bar adamdarǵa jazasynyń tórtten úsh bóligi, asa aýyr kinási bar adamdardyń jazasynyń jartysy qysqarady. Bul raqymshylyq qańtar oqıǵasyn uıymdastyrǵandarǵa, terrorısterge, resıdıvısterge, sondaı-aq qańtar oqıǵasyna qatysqandardy azaptaǵandarǵa qoldanylmaıdy.
Árıne, bul – el taǵdyry. Jastardyń taǵdyry. Memlekettiń bolashaǵy – jastar. Prezıdenttiń jappaı tártipsizdikke erip ketken jastarymyzǵa raqymshylyq jasaý jónindegi zańǵa jedeldetip qol qoıýy halyqtyń kóńiline qýanysh uıalatady. Aldaǵy ýaqytta memleketimizdiń bolashaǵy nyq, senimdi, aıqyn bolýy úshin jastarymyzdy memleketshildikke, otansúıgishtikke, memlekettiń árbir qundylyǵyna úlken súıispenshilik kózqaraspen qaraýǵa tárbıeleýimiz kerek.
Amanjol ÁLTAI,
Májilis depýtaty
