Jýyrda Shym qalada HQO qyzmetin odan saıyn jetildire túsý maqsatynda halyqqa zamanaýı júıede qyzmet kórsetetin sıfrlyq keńse ashyldy. Sıfrlyq mazmundaǵy bólimsheniń resmı ashylý saltanaty táýelsiz dırektorlar keńesiniń músheleri Zaǵıpa Balıeva men Erǵalı Begimbetov, «Azamattarǵa arnalǵan úkimet» memlekettik korporasııasynyń basshysy Súıenish Ábdildın jáne Shymkent qalasy ákiminiń birinshi orynbasary Shyńǵys Muqan men fılıal dırektory Balmeıir Sansyzbaıulynyń qatysýymen ótti.
Sıfrlyq formattaǵy keńse Kaıdzen tujyrymdamasy boıynsha qyzmet kórsetedi. Sondaı-aq Shyǵys ádistemesi negizinde jumys isteıdi. Iаǵnı memlekettik qyzmet kórsetý sapasynyń, korporatıvtik mádenıettiń jáne jumys ónimdiligin arttyrý maqsatyn kózdeıdi. Aldaǵy ýaqytta osy baǵytta júıeli jumys atqarylatyn bolady. Jańa bólimsheniń taǵy bir ereksheligi, kelýshiler keńsedegi qyzmet kórsetý aýmaǵyn arnaıy dızaında jasalǵan túster arqyly ajyratyp biledi.
«Azamattarǵa arnalǵan úkimet» Shymkent qalalyq fılıalynyń dırektory Balmeıir Sansyzbaıulynyń málimdeýinshe, shyǵys úlgisindegi keńseniń qujatty qabyldaý jáne ony tapsyrý aımaǵynda 38 jumys orny bolady. Sonymen birge munda 101 ınspektor qyzmet etedi.
– Budan bólek Halyqqa qyzmet kórsetý sıfrlyq keńselerinde túrli qyzmet aımaǵy qarastyrylǵan. Olardyń qatarynda resepshn, qujat berý, jyldam qyzmet kórsetetin aımaǵy, keńes berý, óz-ózine qyzmet kórsetý sekildi ózge de oryndardy ataýǵa bolady. Zamanaýı úlgidegi sıfrlyq keńse qaladaǵy Mádeli qoja kóshesindegi 1/16 mekenjaıyndaǵy HQO bazasynda ornalasqan, – dedi fılıal basshysy Balmeıir Sansyzbaıuly.
Eske sala ketken jón, búginde Shymkentte halyqqa qyzmet kórsetetin 10 ortalyq jumys isteıdi. Onyń ishinde 3 halyqqa mamandandyrylǵan qyzmet kórsetý ortalyǵy da bar.
Sonymen qatar jyl basynan beri megapolıstegi HQO-larda qala turǵyndaryna 900 myńnan astam qyzmet kórsetilgen. Jalpy, búgingi tańda «bir tereze» qaǵıdaty aıasynda halyqqa qyzmet kórsetý isi áldeqaıda jeńildegen. Tipti sıfrlyq múmkindikter arqyly azamattar úıinde otyryp-aq kóptegen memlekettik qyzmet túrin ózderi ala alady. Máselen, keıbir anyqtamalar men qujattardy alý úshin qazir Halyqqa qyzmet kórsetý ortalyǵyna kelip áýre bolýdyń qajeti joq. Kez kelgen azamattyń ony smartfon kómegimen shyǵaryp alýǵa múmkindigi bar.
Osy rette Eńbek jáne halyqty áleýmettik qorǵaý mınıstri Tamara Dúısenova Shymkent qalasyndaǵy «Teń qoǵam» áleýmettik qorǵaý ortalyǵynda ótken kezdesýde de sıfrlyq áleýettiń múmkindikteri týraly málimdegen edi.
«Memleket basshysy Qasym-Jomart Toqaevtyń tapsyrmasyna sáıkes otbasynyń sıfrlyq kartasy túzildi. Endi Qazaqstannyń árbir otbasy ózine memleket tarapynan qandaı kepildendirilgen kómek bar ekeninen aldyn ala habardar bolyp otyrady. Iаǵnı belgilengen statýsyna qaraı áleýmettik kómekti jyldam alatyn bolady. Sondyqtan burynǵydaı ár áleýmettik organǵa júgirip áýrege túspeıdi. Máselen, kópbalaly ana nemese zeınetker bolsa, «Sizdiń 1 jasqa tolmaǵan balańyz bar. Osyǵan oraı balańyz 1,5 jasqa tolǵanǵa deıin áleýmettik járdemaqy ala alasyz» degen syndy habarlama kelip turady», dedi mınıstr.
Aldaǵy kezde otbasynyń sıfrlyq kartasyn qalyptastyrǵan soń, múmkindigi shekteýli azamattardy da ár memlekettik organ arasynda áýrege salmaý úshin «bir tereze» qaǵıdaty boıynsha qujatyn rásimdeý qolǵa alynbaq. Iаǵnı emhanaǵa barǵanda tıisti málimetterdi alyp, qujatyn sol jerde rásimdeı alady.
ShYMKENT
