Dese de keıingi úsh álem chempıonatynyń fınalynda óner kórsetken jerlesterimiz Lıverpýldegi dodada da bas júlde úshin talasyp kórdi. Biraq fınalǵa shyqqan eki jerlesimizge de álem chempıonatynyń júldesi buıyrmady. Máselen, erler arasyndaǵy erkin jattyǵý baǵdarlamasynyń irikteý kezeńinde 14,733 upaı jınap, úshinshi orynmen fınaldyq saıysqa joldama alǵan Mılad Karımı bas júlde úshin ótken saıysta óz múmkindigin tolyq paıdalana almaı, sońǵy orynda qalyp qoıdy. Ol tipti irikteýdegi jetistigin de qaıtalaı almaı, 12,100 upaımen 8-satydan kórindi.
Erkin jattyǵý baǵdarlamasynda jergilikti sportshy Djarnnı Regını-Morannyń baǵy jandy. 2014 jylǵy jastar arasyndaǵy Olımpıada jeńimpazy atanǵan ol álem chempıonatynyń fınalynda 14,533 upaı jınap, altynnan alqa taqty. Bir aıta keterligi, Regını-Morannyń bul altyny Ulybrıtanııa quramasynyń osy álem chempıonatyndaǵy alǵashqy altyny boldy. Al kúmis júlde Tokıo Olımpıadasynyń eki baǵdarlamasynda (kópsaıys pen mańdaısha) top jarǵan japonııalyq Daıkı Hasımotoǵa (14,500 upaı) buıyrsa, qola medal taǵy bir japonııalyq Doı Rıosýkekeniń (14,266 upaı) enshisinde ketti.
Al fınaldyq saıysta baq synaǵan taǵy bir qazaqstandyq Narıman Qurbanov at snarıady baǵdarlamasynda júldege synyq súıem qalǵanda súrinip, álem chempıonatyn tórtinshi orynmen aıaqtady. Jerlesimiz irikteý saıystarynda 15,033 upaı jınap, fınalǵa úshinshi orynmen joldama alǵan bolatyn. Al senbi kúni ótkizilgen fınalda Qurbanov ta irikteý saıysyndaǵy jetistigin qaıtalaı almaı, 14,533 upaımen tórtinshi satyda qalyp qoıdy. Eń ókinishtisi, osy baǵdarlamada qola júldeger atanǵan 38 jastaǵy armenııalyq Arýtıýn Merdınıan jerlesimizden nebári 0,200 upaıǵa ozyp, úshinshi orynǵa taban tiredi.
At jattyǵýynda 15,300 upaı jınaǵan ırlandııalyq sportshy Rıs Mak Klenagannyń aty ozdy. Ol 2019 jyly Germanııanyń Shtýtgart qalasynda uıymdastyrylǵan álem chempıonatynda qola júldeger atanǵan bolatyn. Iordanııalyq Ahmad Ábý Ál-Sýd 14,866 upaımen ekinshi orynnan kórinip, óz eline álem chempıonatynyń alǵashqy medalin syılady.
Bıylǵy Azııa chempıonaty men 2019 jylǵy jazǵy Ýnıversıada oıyndarynyń kúmis júldegeri, birtalaı Álem kýbogi kezeńinde olja salǵan Narıman Qurbanov osymen úshinshi márte álem chempıonatynda fınalda óner kórsetti. 2018 jylǵy Dohadaǵy jahandyq dodada at jattyǵýynda besinshi orynnan kórinse, 2021 jyly Japonııanyń Kıtakıýsıý qalasynda ótken álem birinshiliginde Stıven Nedorosık (AQSh), Ven Hao (Qytaı) jáne Kadzýma Kaııany (Japonııa) alǵa ozdyrǵan Qurbanov tórtinshi oryndy qanaǵat tutty.
Qurbanovtyń bul jetistigi qazaqstandyq gımnasttardyń 1997 jyldan bergi álem chempıonattaryndaǵy eń úzdik kórsetkishi bolyp tur. Sol jyly Lozannada uıymdastyrylǵan básekede Sergeı Fedorchenko aǵash attan sekirýden chempıon atanǵan. Bul – Qazaqstan quramasynyń álem chempıonattarynyń tarıhynda sporttyq gımnastıkadan alǵan alǵashqy altyny jáne ázirge deıingi jalǵyz júldesi bolyp tur.
