Bul týraly Premer-Mınstrdiń baspasóz qyzmeti aqparat taratty.
Oqý-aǵartý mınıstrligi halyqtyń áleýmettik osal toptarynan shyqqan balalarǵa memlekettik tapsyrys sheńberinde jekemenshik mektepterde oqý kezinde Jappaı oqytý qorynan kómek alýǵa múmkindik berýdi usyndy. Bul qarajat balalardy mektep formasymen, tamaqpen qamtamasyz etý sııaqty jumystarǵa jumsalmaq. Qazirgi ýaqytta bul norma memlekettik mektepterde ǵana qoldanylady. Premer-Mınıstr bul usynysty qoldady.
Sondaı-aq qıyn jaǵdaıǵa tap bolǵan jáne memlekettik tapsyrys alatyn balabaqshalarǵa barýǵa múmkindigi joq otbasylardan shyqqan balalar úshin tamaqtanýǵa aqy tóleý tetigin iske asyrý máselesi qaraldy. Bul sharany 2023 jyldyń basynda iske qosylatyn «Otbasynyń sıfrlyq kartasy» servısi arqyly júzege asyrý usynyldy. Aldaǵy ýaqytta azyq-túlik shyǵyndaryn tóleý úshin daǵdarys jaǵdaıyndaǵy otbasylardan shyqqan balalar anyqtalady.
Álıhan Smaıylov memlekettik organdardyń qajetti aqparattyq júıelerin ıntegrasııalaýdy aıaqtaýdy jáne osy bastamany qarjylandyrý tetigin pysyqtaýdy tapsyrdy. Bul rette ol qarajatty maqsatsyz paıdalanýdy boldyrmaý úshin olardyń tıimdi ıgerilýin baqylaýdy qamtamasyz etý qajettigine nazar aýdardy.
«Prezıdenttiń tapsyrmasy boıynsha biz bilim berýge qomaqty qarajat bólemiz jáne jańa bastamalardy iske asyrýǵa qosymsha aqsha bólýge daıynbyz, biraq sapa men tıisti baqylaýdy qamtamasyz etý qajet», dedi Álıhan Smaıylov.
Sonymen qatar keńeske qatysýshylar ortalyqtandyrylǵan deńgeıde balabaqshalarǵa biryńǵaı kezekti iske qosý máselesin talqylady, bul bıýdjet qarajatyn únemdeýge jáne oryndardy bólý kezinde sybaılas jemqorlyqty boldyrmaýǵa múmkindik beredi. Atap aıtqanda, ekinshi deńgeıdegi bankter qosymshalary men Egov arqyly kezekke turý jáne tıisti joldama alý qarastyrylǵan.
Álıhan Smaıylov bul bastamany qoldap, jańa júıede uıymdastyrýshylyq tártipti, onyń ishinde qosarlanǵan kezekti boldyrmaýdy, balalardyń derekterin tekserýdi jáne tolyq qamtamasyz etýdiń mańyzdylyǵyn atap ótti.
Sondaı-aq keńeste mektepterde aǵylshyn tilin oqytýdyń sapasyn jaqsartýdyń jańa tásilderi, muǵalimderdiń biliktiligin arttyrý, bilim berý uıymdaryn sapaly ınternetpen qamtamasyz etý, pedagog-assıstentterdiń arnaıy shtattaryn engize otyryp, erekshe bilim berý qajettilikteri bar balalar úshin balabaqshalardyń qoljetimdiligin keńeıtý, mektep pedagogterin Jappaı oqytý qory boıynsha tólemderdi belgileý bóliginde kásibı quzyretine jatpaıtyn fýnksııalardan bosatý, kolledjderdiń tehnıkalyq bazasyn jańartý, tárbıeshilerdiń mártebesin jáne jalaqysyn kóterý máseleleri, sondaı-aq basqa da birqatar bastama qaraldy.
