Qurylǵanyna kóp ýaqyt ótpese de «Astana Balet» teatry búginde elimizdiń jetekshi horeografııalyq ujymdarynyń birine aınalyp, dúnıejúzi boıynsha san myńdaǵan jankúıeri bar ordaly óner mekeni retinde shartarapty moıyndatyp úlgerdi. Gastroldik-konserttik qyzmetin óz elimizde de, shetelderde de belsendi atqaryp kele jatqan teatr ártisteri Beıjiń men Shanhaı (Qytaı), Parıj (Fransııa), Vena (Aýstrııa), Seýl (Koreıa), Býdapesht (Majarstan), Baký (Ázerbaıjan), Nıý-Iork (AQSh), Tokıo (Japonııa), Varshava (Polsha), Mınsk (Belarýs), Brıýssel (Belgııa), Mılan (Italııa), Monte-Karlo (Monako), Dýbaı (BAÁ) qalalarynyń áıgili sahnalarynda joǵary deńgeıde óner kórsetip qaıtty. Grýzııa eline alǵash ret josparlanyp otyrǵan kezekti óner sapary sol tabysty jobanyń sátti jalǵasy desek, artyq aıtqandyq emes.
– Biz úshin Grýzııaǵa sapar óte mańyzdy. Áıgili sahnada óner kórsetý – orasan jaýapkershilik. Sondyqtan balet ónerindegi sheberligimizdi kórsetkimiz keledi. Gastrol baǵdarlamasyn tańdaýǵa da asa yjdahattylyqpen qaradyq. Sóıtip, ózimizdiń negizgi baǵyt-baǵdarymyz – qazirgi zaman jáne neoklassıka baletimen repertýarymyzdyń maqtanyshy, otandyq jáne sheteldik kórermenniń kózaıymyna aınalǵan ulttyq dıvertısmentti tańdadyq. Ártister men teatr ujymynyń óneri umytylmas áser qaldyryp, kórermen júreginen oryn alaryna úmittimiz. Grýzııalyq kórermenmen kezdesýimizdi taǵatsyzdana kútip júrmiz, – deıdi aldaǵy óner sapary jóninde teatr dırektory Aleksandr Sovostıanov.
Mádenıet jáne sport mınıstrliginiń qoldaýymen ótetin gastroldik sapardyń alǵashqy kúni talǵampaz kórermenniń nazaryna L.Shıfrın, A.Pıassollo, K.Gardel jáne S.Kosýgıdiń mýzykasyna Rıkardo Amarante qoıǵan «A Fuego Lento» neoklassıkalyq baleti usynylady. Bul – baletmeısterdiń mahabbat pen qushtarlyq jaıly erkin qııaly. Bir aktili balettiń ár epızody – qýatty ári sezimtal tango áýezine qoıylǵan horeografııalyq mınıatıýralar. Oryndaýshylyqtyń asqan sheberligi men albyrt sezim ushqyny úndestik tapqan balet shynaıy sezimdi sýretteıdi.
Al keshtiń ekinshi bóliminde Oskar Ýaıldtiń pesasy boıynsha Fazyl Saı mýzykasyna teatrdyń bas baletmeısteri Mýkaram Avahrı qoıǵan «Salomeıa» baleti kórsetiledi. Avtorlyq ınterpretasııadaǵy Bıblııa sıýjeti sezim arpalysyn sýretteıdi. Bas keıipkerlerdiń kúrdeli, qarama-qaıshy beıneleri kórermen qaýym úshin adam janynyń jumbaǵynyń shymyldyǵyn ashqandaı bolady. Baletmeıster zulymdyq pen jaqsylyqtyń máńgilik kúresi jaıly oı tolǵap, árqaısymyzǵa óz tańdaýymyzdy jasaýdy usynady. Spektakldiń shyrqaý shyńy – Salomeıanyń bıi. Bul oqıǵa sýretshilerdiń, músinshiler men kompozıtorlardyń shyǵarmalary arqasynda kópshilikke belgili.
Gastroldik sapardyń ekinshi kúni astanalyq ujym Qazaqstannyń eńbek sińirgen qaıratkerleri Aıgúl Tátı men Mýkaram Avahrı qoltańbasynda usynylǵan «Uly dala murasy» ulttyq dıvertısmentin kórsetedi. Etnografııalyq materıal men zamanaýı horeografııa sátti úndestik tapqan týyndy grýzııalyq kórermendi de beıjaı qaldyrmasy anyq.
