«Atyraý – Qazaq eliniń Eýropaǵa shyǵar qaqpasy. Uly Jibek jolynyń soltústik tarmaǵy osy ólke arqyly ótkeni tarıhtan belgili. Qala ortalyǵyndaǵy kópir Azııa men Eýropany jalǵap tur. Munyń zor sımvoldyq máni bar. Bir sózben aıtqanda, elimiz túrli órkenıetter toǵysqan toǵyz joldyń torabynda ornalasqan. Sondyqtan, qazaqtyń jerin ejelgi zamannan túrli dinı nanym ókilderi mekendegen», dep atap ótti Prezıdent.
Bul rette Memleket basshysy álemde bolyp jatqan túrli qaqtyǵystarǵa dinı alaýyzdyq negizgi sebep bolatynyn aıtty.
«Halqymyz dinı ustanymyna qarap eshkimdi kemsitpegen. Bári tatýlyqta ómir súrgen. Jaqynda Astanada ótken Álemdik jáne dástúrli dinder basshylarynyń sezine qatysýshylar da muny aıryqsha atap ótti. Tipti, Rım papasy uly Abaı jáne dombyranyń qudireti týraly tereń oılaryn aıtty.
«Men muny bekerge aıtyp otyrǵan joqpyn. Qazir jer júzinde bolyp jatqan túrli qaqtyǵystardyń negizgi sebepteriniń biri – dinı alaýyzdyq. Biz elimizde tynyshtyq pen turaqtylyq bolǵanyn tileımiz. Sol sebepti, bul máseleni nazardan tys qaldyrmaýymyz kerek», dep qosty Memleket basshysy.
Prezıdenttiń aıtýynsha, Qazaqstan Konstıtýsııasynda din bostandyǵyna kepildik berilgen. Alaıda elimizde radıkaldy aǵymdar men dinı separatızmniń taraýyna jol berilmeý qajet.
«Qazaqstan – zaıyrly memleket. Konstıtýsııamyzda din bostandyǵyna kepildik berilgen. Biraq, zaıyrly jáne tózimdi, tolerantty bolý degenimiz bárine kóz juma qarap, jaıbaraqat otyrý degen sóz emes. Biz eldiń qaýipsizdigi men tutastyǵyna nuqsan keltirýge eshqashan jol bermeımiz. Radıkaldy aǵymdar men dinı separatızmge ortamyzda oryn joq. Babalarymyz ǵasyrlar boıy ıslam dinin ustanǵan. Sharıǵattyń sharttary men halqymyzdyń ádet-ǵurpy úndesken dástúrli ata dinimiz bar. Onyń asyl qundylyqtary osy kúnge deıin ultymyzdy uıystyryp, birligimizdi bekemdep keledi. Ata jolyn saqtap, dinimiz ben salt-dástúrimizdi berik ustaý – bizdiń perzenttik paryzymyz. Osy oraıda, jastarǵa durys baǵyt-baǵdar berý asa mańyzdy», dep qosty Qasym-Jomart Kemeluly.
Prezıdenttiń aıtýynsha, qandaı jaǵdaı bolmasyn, qazaqtyń bolmysyna tán qasıetter eshqashan umyt bolmaýǵa tıis.
«Ulttyq qundylyqtarymyzdy aıaqasty etýge bolmaıtynyn jastarǵa baıyppen túsindirý kerek. El aǵalary jáne din adamdary bul máselege aıryqsha mán bergeni jón dep sanaımyn. Men ulttyń jańa sapasyn qalyptastyrý týraly únemi aıtyp júrmin. Mańyzdy iste ar-uıat, meıirimdilik pen janashyrlyq sııaqty izgi uǵymdar umyt qalmaýǵa tıis. Bul – qazaqtyń bolmysyna tán qasıetter. Ál-Farabı «Tárbıesiz berilgen bilim – adamzattyń qas jaýy» dep beker aıtpaǵan. Atom bombasy da, atom energııasy da – adamzattyń aqyl-oıynyń jemisi. Iаǵnı, qansha jerden bilimdi bolsa da, izgilikke umtylmaǵan adam elge paıdasyn tıgizbeıdi. Sondyqtan, ozyq bilim men ónegeli tárbıeni urpaqtyń boıyna qatar sińirýimiz qajet», dep paıymdady el Prezıdenti.
Sózin qorytyndylaı kele, Qasym-Jomart Kemeluly óskeleń urpaqtyń tárbıesine erekshe nazar aýdarý qajet ekenin qadap aıtty.
«Qoǵamda durys qundylyqtar ornyqpasa, jemqorlyq, masyldyq, ysyrapshyldyq sııaqty áleýmettik keselder tamyr jaıady. Munyń bári memleketimizdi álsiretedi. Qoǵamdy ishten iritedi. Zańdylyq pen tártipti buzady. Bir sózben aıtqanda, búkil eldi daǵdarysqa ushyratady. Biz buǵan jol bermeımiz. Sol úshin adamgershilik qundylyqtaryna negizdelgen saıasatqa basa mán beremiz. Sondaı-aq, óskeleń urpaqtyń tárbıesine erekshe nazar aýdaramyz. Jastarymyz adal eńbek etýdiń, bilimge qushtarlyqtyń mán-mańyzyn jete túsinýi qajet. Myqty memleket quramyz desek, budan basqa jol joq», dep túıindedi Memleket basshysy.
