Ázilhan Nurshaıyqov soǵystan keıingi jyldary KazGÝ-di aıaqtaǵan soń «Qazaqstan pıoneri» jáne «Sosıalıstik Qazaqstan» gazetterinde jumys istegeni málim. Halyq sharýashylyǵyn qaıta qalpyna keltirýdiń aýyrtpalyǵy mol kezeńde de óz ortasyna oraı sándi kıiný sol zamannyń ıntellıgensııa ókilderine buljymas zańdylyq edi. Qara tústi kostıým-shalbar, aq kóılek, basyna shilápi kııý zııaly adam ekenin tanytyp turatyn.
Oblystyq Buqar jyraý atyndaǵy ádebıet jáne óner mýzeıine jýyqta Almatydan Ázaǵanyń zattary ákelindi. Qalamger ómirden óter aldynda kıgen kostıým-shalbary, kóılegi, áıgili qalpaǵy men qalamsabyn, sırek kitaptaryn qyzy Janar Nurshaıyqova mýzeı qyzmetkerlerine arnaıy tabystaǵan. Mekemedegi negizgi qor bóliminiń basshysy Meıramǵalı Esmuqanov bul jádigerler jazýshynyń mereıtoıynda Kereký jurtshylyǵy úshin úlken syı bolǵanyn aıtady.
Janar apaımen telefon arqyly tildeskenimizde qalamger basynan tastamaǵan shilápiniń birnesheýi bolǵanyn bildik.
– Elýinshi jyldardyń basynda bizdiń otbasymyz Pavlodarǵa kóship bardy. Ákemiz oblystyq «Qyzyl tý» gazetine redaktorlyq etip, basylymdy damytýǵa kóp eńbek sińirdi. Sonda baıqaıtynymyz, jergilikti ıntellıgentter arasynda shilápi kıgen aǵalar az bolatyn. Ákemiz sý jańa kostıým-shalbar, salqyn kúni basyna qara shilápisin kıgende elden erekshelenip turýshy edi. Baskıimdi anamyz dúkennen arnaıy satyp ápergen. Ol kezde er adamdarǵa arnalǵan sándi kıim shyqsa, anamyz jurttyń aldy bolyp baryp, ákeme satyp alýǵa tyrysatyn. Eriniń ústi-basy muntazdaı taza bolýyn, qaltasyndaǵy bet oramalynyń kún saıyn aýystyrylyp turýyn qadaǵalaıtyn. Anam ómirden ótip bara jatqanda da ákeme jáne bizge tazalyqty úlgi etip ketti. Keıin kelini Sveta atasynyń kútimine jaýap berdi. Oǵan degen alǵysymyz da sheksiz. Ákemiz ómirden ótkenshe kıiminiń óńirine qylshyq turmaıtyn. Respýblıkalyq telearnalar suhbatqa shaqyrǵanda ákemiz efırge jarqyrap shyǵa keletin, bet-júzi ádemi bolyp kórinip otyratyn, – dep eske aldy Janar apaı.
Atap óterligi, jazýshy-jýrnalıst Pavlodar oblystyq «Qyzyl tý» (qazirgi «Saryarqa samaly») gazetin 1953-56 jyldar aralyǵynda basqardy. Basylym taralymyn kóbeıtý úshin gazette Muhtar Áýezov, Sábıt Muqanov sekildi áıgili qalamgerlerdiń týyndylarynan úzindiler berip, rýhanııatqa sýsap júrgen oqyrmannyń shólin qandyrdy. Sol ýaqytta óńirlik basylymnyń taralymy ósip, abyroı-bedeli qalyptasty. Ázaǵanyń osy ýaqytta shyǵarmashylyq turǵydan tolysyp, kórkem dúnıelerdi qolǵa ala bastaǵan ýaqyty da bolǵan eken. Halyq jazýshysy bul týraly: «Pavlodar meni ádebıet aspanyna kótergen kosmodromym boldy», dep jazyp ketken.
PAVLODAR
