Ispanııaǵa ese jiberdik

Ispanııa quramasynyń ataǵy alysqa taraǵan. Kezinde olar Bıllı Djın Kıng kýbogin bes márte oljalap, taǵy alty ret fınalda oınady. Atalǵan jarysta qol jetkizgen tabysy jaǵynan Pıreneı túbegi tennısshileriniń aldyn orap turǵan úsh memleket qana bar. Olar – AQSh (18 jeńis), Chehııa (11 jeńis) jáne Aýstralııa (7 jeńis). Desek te keıingi kezderi ıspanııalyqtardyń shabysy biraz báseńdep qalǵany baıqalady. Olaı deýge negiz, sońǵy ret olar bas júldeni sonaý 1998 jyly oljalasa, fınalǵa shyq­paǵandaryna baqandaı 14 jyldyń júzi boldy jáne de álemniń burynǵy birinshi raketkasy Garbıne Mýgýrýsa Blankonyń Shotlandııadaǵy týrnırge kelmeıtinin estigende, kádimgideı qýan­dyq. Sebebi ol – tym azýly qar­sylas. Mýgýrýsa 2016 jyly Rolan Garros pen 2017 jyly Ýımbldonda aldyna jan salmaı, 2021 jyly WTA-nyń qo­rytyndy týrnırinde jeńiske jetkenin jan­kúıer­ler jaqsy biledi.

Sol keshte alǵashqy bolyp kortqa Iýlııa Pýtınseva men Nýrııa Parrızas-Dıas shyqty. Ispanııa ókili buryn-sońdy halyqaralyq arenada eleýli tabys­tarǵa qol jetkizgen emes. Bıyl Nýrııa Melbýrnde ótken Aýstralııanyń ashyq birinshiliginiń úshinshi kezeńine deıin jetti. Eń úzdik nátıjesi osy. Oǵan qaraǵanda Iýlııanyń baǵyndyrǵan beles­teri áldeqaıda zor. Álemdik reıtıngte de jerlesimiz qarsylasynan 21 saty joǵary tur. Sol sebepti de 31 jastaǵy ardager oıynshydan aıtarlyqtaı qaýip keledi dep esh oılamaǵan edik. Al Parrızas-Dıas bolsa, el namysy synǵa túsken sátte shıryǵyp shyǵa keldi. Alǵashqy eki sette tarazy basy teńselip turdy. Birinshisinde Parrızas-Dıas basym tústi – 6:4. Ekinshisinde Pýtınsevanyń mysy basym boldy – 6:2. Sheshýshi kezeńde ekeýi de aıanbaı aıqasty. Oıyn taı-breıkke ulasty. Bul rette ıspanııalyqtyń baǵy jandy – 7:6.

Endigi bar úmitimiz Elena Rybakınada edi. Birden aıta keteıik, ol óte azýly qarsylasqa tap boldy. Týra tórt táýlikten keıin 25 jasqa tolǵaly otyr­ǵan Paýla Badosa 2021 jyly Rolan Garrostyń shırek fınalyna shyq­sa, 2022 jyly Aýstralııanyń ashyq birin­shiliginiń tórtinshi kezeńine deıin jetti. WTA týrnırlerinde úsh márte top jardy. Sonyń arqasynda ol bıyl kóktemde álemdik reıtıngte ekinshi orynǵa deıin kóterildi. Qazirgi kezde Paýla 13-oryndy ıelenýde. Jalpy, Badosa men Rybakına ózara tórt márte sheberlik baıqasyp, sonyń úsheýinde alǵashqysynyń asyǵy alshysynan tústi. Bul joly da ıspanııalyq tennısshiniń mereıi ústem boldy. 2 saǵat 05 mınýtqa sozylǵan saıys 6:2, 3:6, 6:4 esebimen aıaqtaldy.

Juptyq saıysta Iýlııa Pýtınseva men Anna Danılına Paýla Badosa men Alena Bolshovadan 4:6, 2:6 ese­bimen jeńildi. Osy sátsizdikten keıin Qazaqstan quramasy jarys jolynan shyǵyp qaldy. Endi jartylaı fınal joldamasy úshin Ulybrıtanııa men Is­panııa quramalary talasady. Al Bıllı Djın Kıng kýboginiń ıegeri 13 qarashada anyqtalady.