Sársenbi kúni Shámil Safıýllın jattyqtyratyn Qazaqstannyń qyzdar quramasy jartylaı fınalda aıqasyp, tórt boksshymyz fınalda judyryqtasýǵa múmkindik aldy. О́kinishke qaraı, qalǵan beseýi jartylaı fınalda súrinip, Azııa birinshiliginiń qola júldesin moınyna ildi. Atap aıtqanda, 50 kılo salmaq dárejesinde óner kórsetken Qazaqstannyń jeti, álemniń eki dúrkin chempıony (2014, 2016) Nazym Qyzaıbaı japonııalyq Namıkı Sýkımımen sheberlik baıqasyp, jeńilip qaldy. Elimizdegi eń dańqty boksshylardyń biri sanalatyn Nazym tóreshilerdiń sheshimi boıynsha qarsylasyna 4:1 esebimen jol berdi. Byltyr Dýbaıda altynnan alqa taqqan otandasymyz bıylǵy dodada sol chempıondyq ataǵyn qorǵaı almady. Sóıtip, N.Qyzaıbaı qazaqstandyq boksshylardan birinshi bolyp el qorjynyna qola júlde saldy.
Sondaı-aq 52 kılodaǵy jerlesimiz Jazıra Oraqbaeva, 66 kılodaǵy Mádına Nurshaeva, Darıǵa Shákimova (70 kılo) jáne asa aýyr salmaqtaǵy Lázzat Kúngeıbaeva (+81 kılo) jartylaı fınalda qarsylastaryna ese jiberip, qola medaldy qanaǵat tutýǵa májbúr boldy. Eń ókinishtisi, Azııa chempıonatyn jartylaı fınaldan bastaǵan M.Nurshaeva men L.Kúngeıbaeva alǵashqy jekpe-jekterinde súrindi. Sóıtip, jerebe boıynsha nebári eki-aq kezdesý ótkizip, altyn alýǵa bolatyn zor múmkindikterin ýystan shyǵaryp aldy.
Jartylaı fınalda Jazıra japonııalyq Rınka Kınosıteden jeńilse, Azııa chempıony Mádına Nurshaeva koreıalyq Choı Hon Gıýnnen aılasyn asyra almady – 3:2. Al Rıo Olımpıadasynyń qola júldegeri Darıǵa Shákimova taıvandyq Chen Nen Chınnen 4:1 esebimen utylyp qaldy. Qazaqstannyń toǵyz dúrkin chempıony, álemniń (2016) jáne Azııanyń (2021) jeńimpazy Lázzat Kúngeıbaeva úndistandyq Alfııa Tarannýmmen qolǵap túıistirip, Alfııa tóreshilerdiń biraýyz sheshimimen (5:0) otandasymyzdy tize búktirdi. Osylaısha, Nazymnan keıin sharshy alańǵa shyqqan tórt boksshymyz da Azııa chempıonatynyń qola júldegeri atandy.
Al jartylaı fınalda qarsylastarynan bir bas joǵary óner kórsetip, tóreshilerdiń biraýyz sheshimimen jeńiske jetken Alýa Balqybekova (48 kılo), Jaına Shekerbekova (54 kılo), Karına Ibragımova (57 kılo) men aýyr salmaqtaǵy Gúlsaıa Erjan (81 kılo) fınalda judyryqtasýǵa múmkindik aldy.
Bıyl Túrkııada uıymdastyrylǵan bokstan áıelder arasyndaǵy álem birinshiliginiń kúmis júldegeri, byltyrǵy Azııa chempıonatynyń altyn medal ıegeri Alýa Balqybekova bul jolǵy dodada da táýir ónerimen kózge tústi. Jartylaı fınalda О́zbekstannyń maqtaýly boksshysy Farzona Fozılovanyń jolyn kesken otandasymyz Sary qurlyq básekesiniń fınalyna shyqty. Tartysty ótken jekpe-jekte tóreshiler biraýyzdan jeńisti (5:0) qazaq boksshysyna berdi.
54 kılo salmaqta óner kórsetken álem chempıonatynyń júldegeri, Azııa chempıony Jaına Shekerbekova jartylaı fınalda taıvandyq Hýan Sıao Venmen qolǵap túıistirdi. Hýan Sıao otandasymyzdan áldeqaıda boıshań bolsa da, sol basymdyǵyn óz paıdasyna jarata almady. Bul aıqasta da qazaqstandyq boksshy qarsylasyn 5:0 esebimen jeńip, fınalǵa joldama aldy.
Sonymen qatar 57 kılo salmaqtaǵy álem birinshiliginiń eki dúrkin qola júldegeri Karına Ibragımova da jartylaı fınalda fılıppındik Nestı Petesıony aıqyn basymdyqpen tize búktirip (5:0), Sary qurlyq dodasynyń bas júldesin sarapqa salatyn bolsa, aýyr salmaqtaǵy Gúlsaıa Erjan da Vetnam ókili Thı Hýong Ngýendi jeńip, erteń altyn úshin aıqas ótkizetin boldy.
Keshe Qazaqstan erler quramasynyń 12 ókili sharshy alańǵa kóterilip, olar da fınal joldamalaryn sarapqa saldy. Atap aıtqanda, kúndizgi sessııada Sanjar Táshkenbaı (48 kılo) úndistandyq Govınd Kýmarmen, Mahmud Sabyrhan (54 kılo) ózbekstandyq Shahzod Mýzafarovpen, Samatáli Tóltaev (60 kılo) jergilikti boksshy Mohammad Abý Djadjehpen, Dýlat Bekbaýov (67 kılo) ózbekstandyq Asadhýdja Mýıdınhýdjaevpen, Nurqanat Raıys (75 kılo) ırandyq Seıedshahın Mýsavınmen, Saǵyndyq Toǵambaı (86 kılo) ıordanııalyq Odaı Rııad Adealhındavımen jáne Qamshybek Qońqabaev (+92 kılo) tájikstandyq Mýhammad Abrorıdınovpen judyryqtassa, keshki sessııada Sáken Bıbosynov (51 kılo) japonııalyq Tomoıa Sýboımen, Serik Temirjanov (57 kılo) úndistandyq Hýssam Ýddın Mohammedpen, Aslanbek Shymbergenov (71 kılo) mońǵolııalyq Bıamberden Otgonbaatarmen, Nurbek Oralbaı (80 kılo) ıordanııalyq Hýsseın Eıshaısh Iashaıshpen jáne Aıbek Oralbaı (92 kılo) ırandyq Týfan Sharıfımen kezdesti.
