Sýretti túsirgen Jumabaı MUSABEKOV
Oblys ortalyǵynda ótken saltanatty jıynda oblystyq jedel járdem stansasy ortalyǵynyń dırektory Savelıı Pak oblys ákiminiń qolynan jańa «Jedel járdem» kóliginiń kiltin aldy. Byltyr satyp alynǵan 35 sanıtarlyq avtomashınany esepke alsaq, stansa 100 paıyzǵa arnaıy kólikpen qamtamasyz etildi deýge bolady. Sondaı-aq halyq sanyna shaqqandaǵy brıgadalar sany 75-ke jetti. Jalpy 10 myń adamǵa 1 brıgada dep esepteledi, al oblystaǵy halyq sany – 667 myń adam. Demek brıgada sany tıisti mólsherden asty. Bul – dárigerler der kezinde barady degen sóz.
Jedel járdem karetalary barlyq qajetti quraldarmen, atap aıtqanda, ókpeni jasandy jeldetetin «Wienman» apparattary, dıstansııalyq elektrokardıograf, «Corpuls» defıbrıllıatory, «Accuvac pro Wienman» elektr aspıratory, omyrtqany qozǵaltpaı ustaýǵa arnalǵan dıp-panel, reanımasııaǵa arnalǵan oryn, ottegi ballondary, pasıentti tasymaldaý kezinde paıdalanylatyn arnaıy tósek, jumsaq zembildermen jabdyqtalǵan. Odan bólek aýyldyq medısınalyq pýnktter men ambýlatorııalar úshin 13 mashına alý qarastyrylǵan, tipti onyń 8-i aýdandarǵa jetkizildi.
Oblys ákimi Beıbit Isabaev jedel járdem parkin jańartý el Prezıdentiniń medısınalyq qyzmetterdiń, ásirese aýyldyq jerlerde qoljetimdiligi men sapasyn arttyrý jónindegi tapsyrmasyna sáıkes júrgizilip jatqanyn jetkizdi.
«Bıyl memlekettik qoldaýdyń nátıjesinde oblystyń alty aýdanynyń aýyldarynda 12 blokty-modýldi medısınalyq keshen salynady. 2024 jylǵa deıin mundaı nysandar óńirdiń taǵy 40 aýylynda boı kóteredi. 2023 jyldan bastap «Aýyldyq densaýlyq saqtaýdy jańǵyrtý» ulttyq jobasy aıasynda aýyldyq jerlerde taǵy 59 nysan salynady. Sanıtarlyq avtokólikterdi jańartý da medısınalyq kómek kórsetý sapasyn arttyrýǵa eleýli yqpal etedi. Byltyr 35 jedel járdem avtokóligi satyp alyndy, búgin taǵy 40 sanıtarlyq kóliktiń kiltin tabystaımyz. Osy arqyly pasıentterge jedel járdemniń jetý ýaqyty qysqaryp, alǵashqy kómekti der kezinde kórsetý múmkindigi arta túsedi dep oılaımyn. Halyqtyń ómiri men densaýlyǵyn saqtaý – qashanda negizgi basymdyq bolyp qala beredi», dedi B.Isabaev.
Jalpy, Prezıdenttiń tapsyrmasyna sáıkes respýblıkalyq bıýdjetten Aqsý jáne Kerbulaq aýdandaryndaǵy aýrýhanalardy, oblystyq balalar aýrýhanasyn kúrdeli jóndeýge, sondaı-aq Taldyqorǵan qalasyndaǵy onkologııalyq dıspanserdiń materıaldyq-tehnıkalyq bazasyn nyǵaıtýǵa qarajat bólinedi. Oǵan qosa 2023 jyldan bastap «Aýyldyq densaýlyq saqtaýdy jańǵyrtý» ulttyq jobasy aıasynda Jetisý oblysynda óńirdiń aýyldyq eldi mekenderinde 59 nysan salynady, onyń 15-i dárigerlik ambýlatorııa, 39-y FAP, 5-eýi medısınalyq pýnkt bolmaq.
Oblys ekige bólingennen keıin, Jetisýda halyq sany edáýir azaıdy. Tıisinshe ár salanyń mamandary da ekige bólinip, elge qyzmet etip jatyr. Osydan 2-3 jyl buryn Taldyqorǵan qalasynyń kireberisine Almaty oblystyq sotyna arnap jańa záýlim ǵımarattyń qabyrǵasy qalanǵan bolatyn. Alaıda búginde sol qurylys nysany Jetisý oblysynyń sotyna tıimsiz dep tanylyp otyr. Burynǵydaı emes, sot qyzmetkerleriniń sany qysqarǵan. Sol sebepti de qurylys ýaqytsha toqtatylǵan edi. Endi sol nysandy kardıohırýrgııalyq ortalyq retinde beıimdep salý týraly usynys qoldaý tapty.
«Syrqatty erte kezden anyqtap, júrekke kúrdeli operasııalardy der kezinde jasaýǵa múmkindik beretindikten, Ortalyqtyń jumysy ana men bala ólimin azaıtýǵa yqpal etedi dep oılaımyn. Ortalyq joǵary tehnologııany qoldana otyryp, osy aımaqtaǵy ǵana emes, kórshi óńirlerde turatyn balalar men eresekterge de sapaly medısınalyq qyzmet kórsetedi. Jalpy Jetisý jurtshylyǵyna paıdaly nysan bolady», deıdi B.Isabaev.
Osy rette taǵy bir qýanyshty jańalyqty jarııa ete ketsek. Kúni keshe Panfılov aýdany Jarkent qalasynda «Mereı» balalardy ońaltý ortalyǵy ashyldy. Bul – burynǵy oblys ákiminiń rezıdensııasy bolǵan ǵımarat. Kópke belgili, osy nysandy ońaltý ortalyǵyna berý týraly sheshim bıylǵy naýryz aıynda qabyldanǵan edi.
Ǵımaratty jańǵyrtý jumystaryna, qajetti qural-jabdyqtar men jıhazdar satyp alýǵa 80 mln teńge jumsalǵan. Ortalyqta Montessorı kabıneti, fızıoterapııa, emdik dene shynyqtyrý, sol sııaqty sensor, massaj, prosedýralyq kabınetter, logoped, defektolog bólmeleri, tuz shahtasy, basseın t.b bar. Eki korpýstan turatyn ǵımarattyń jalpy alańy – 910,4 sharshy metr. Nysan 40 orynǵa laıyqtalǵan.
Eske sala keteıik, jyl basynan beri Jetisý oblysyna qarasty Alakól, Sarqan, Qaratal aýdandarynda erekshe qajettiligi bar balalarǵa arnalǵan jalpy sany 140 oryndy ońaltý ortalyqtary ashylǵan. Qazir bári el ıgiligine qyzmet etip jatyr.
Jetisý oblysy
