TARIHTAN TAǴYLYM – О́TKENGE TAǴZYM

Astanada “Postkeńestik keńistiktegi tarıh ǵylymy: ózara áriptestik jaǵdaıy jáne bolashaǵy” atty halyqaralyq dóńgelek ústel bolyp ótti. Atalǵan shara osy jyldyń 27-30 mamyr aralyǵynda ótkiziletin halyqaralyq joba aıasynda uıymdastyryldy. Jobany uıymdastyrǵan – Qazaqstan halqy Assambleıasy men TMD-ǵa qatysýshy elder Memleketaralyq gýmanıtarlyq baılanys qory. Qazaqstan men Reseı ǵalymdary ázirlegen jobaǵa TMD elderi men AQSh, Túrkııa sııaqty elder ǵalymdary da qatysty. Dóńgelek ústeldi ótkizýdiń maqsaty ǵalymdardyń tarıhty qaıta eksheýden ótkizý arqyly burmalaýshylyqqa jol bermeý jáne demokratııalyq qoǵam jaǵdaıynda totalıtarlyq kezeńdi synı turǵydan qaıta paıymdaý bolyp tabylady. QR BǴM Memleket tarıhy ınstı­týtynyń dırektory, tarıh ǵylymdarynyń doktory, professor Búrkitbaı Aıaǵannyń pikirine qaraǵanda, ǵalymdar ózge elderdiń shamyna tıetin aqparattardy tarata salmaı, taraptardy qanaǵattandyratyn ortaq núktede toǵysatyndaı bir tetik izdeýleri qajet. Halyqaralyq mańyzdy sharaǵa RMGÝ rektory, RǴA korrespondent-múshesi, tarıh ǵylymdarynyń doktory E.I.Pıvovar, M.Sınan atyndaǵy Ystambul ýnıver­sı­tetiniń professory Abdýlýahap Qara, Kolýmbııa ýnıversıtetiniń professory Rafız Abazov, Taras Shevchenko atyndaǵy Kıev ulttyq ýnıversıtetiniń professory V.I. Sergııchýk, M.Lomonosov atyndaǵy MMÝ Keńestik dáýirden keıingi keńistikti zertteý jónindegi aqparattyq-saraptamalyq ortalyǵynyń bas dırektory A.V.Vlasov jáne ózge de ǵalymdar qatysty. Asqar TURAPBAIULY.