Mınıstrdiń aıtýynsha, bıyl quqyq buzýshylardy qylmystyq jaýapkershilikke tartý jaǵdaılary kóbeıgen. 2020 jyly - 54, 2021 jyly - 67, 2022 jyldyń 9 aıynda - 53 adam jazalandy.
«Brakonerlikti azaıtý úshin ázirlenip jatqan Ákimshilik quqyq buzýshylyqtar týraly kodeks jobasy aıasynda jaýapkershilikti kúsheıtýdi usynamyz. Atap aıtqanda, bul - tyıym salynǵan quraldarmen balyq aýlaǵany úshin aıyppuldy 20-dan 50 AEK-ke deıin arttyrý jáne bir jyl ishinde qaıtalap buzǵany úshin 15 táýlikke ákimshilik qamaýǵa alý», dedi Ekologııa, geologııa jáne tabıǵı resýrstar mınıstri Serikqalı Brekeshev.
Ol aldaǵy úsh jylda ınspeksııalardy tolyq jabdyqtaý úshin qosymsha 8 mıllıard teńge qajet ekenin aıtty. Onyń aıtýynsha, bul brakonerlik quqyq buzýshylyq týraly alǵashqy derekterdi jyldam ári sapaly toltyrýǵa jáne oǵan qarsy kúrestiń tıimdiligin arttyrýǵa múmkindik beredi.
Sondaı-aq mınıstr balyqtyń ýyldyryq shashý kezeńinde qolaıly jaǵdaılardy qamtamasyz etýge erekshe nazar aýdarylatynyn aıtty. Máselen, Atyraý, Mańǵystaý jáne Batys Qazaqstan oblystarynda múddeli memlekettik organdardyń birlesken buıryǵy aıasynda jyl saıyn «Bekire» balyq qorǵaý aksııasy ótkiziledi. Al basqa óńirlerde kóktemgi kezeńde «Ýyldyryq shashý» aksııasy uıymdastyrylady.
