Ulttyq park dırektorynyń orynbasary Baýyrjan Mahmetovtyń aıtýynsha, qaraǵaı búrin jınaý jáne óńdeý mashaqaty kóp jumys. Park qyzmetkerleri ony qarasha men naýryz aralyǵynda teredi.
«Ulttyq park – emge dárý aýasymen áıgili qaraǵaıly orman. Alqaptyń fıtonsıdteri ártúrli ókpe aýrýlaryna taptyrmaıtyn shıpa. Biraq ormandy kútip-baptaýdyń qanshalyqty beıneti mol sharýa ekenin kópshilik bile bermeıdi. Aǵashtarǵa túrli zaqym keledi, órtten zardap shegedi, bara-bara kári aǵashqa aınalady. Ormannyń tabıǵı qalpyn saqtaý úshin ulttyq park qyzmetkerleri kóktem saıyn tálimbaqta eki jyl ósirilgen kóshetterdi ormanǵa otyrǵyzady», dedi dırektordyń orynbasary, bas ormanshy Baýyrjan Mahmetov.
Terip alǵannan keıingi óńdeýdiń tolyq sıkli suryptaý, tuqymyn alý, tazartý, belgili bir deńgeıge deıin keptirý (12-15% ylǵal) syndy kezeńderden turady. Sodan soń ǵana daıyn tuqymdar tálimbaqqa egilip, tutas kóshet ósiriledi. Keıinirek bul óskinder orman ýchaskelerine otyrǵyzylady.
Osylaısha, kishkentaı búrden qaraǵaıly orman paıda bolady. Alaıda keıbir turǵyndar jańa jyl qarsańynda ormandaǵy shyrshalardy kesip, tabıǵatqa nuqsan keltirip jatatyny da jasyryn emes.
«Biz mańdaı terimizben ósirgen qaraǵaılardy otaýǵa jol bermeımiz! «Býrabaı» ulttyq saıabaǵynyń búkil aýmaǵy táýlik boıy teplovızormen jabdyqtalǵan sıfrly SMART júıesiniń baqylaýynda ekenin brakonerlerdiń esine salǵym keledi. Ákimshilik quqyq buzýshylyq týraly kodekske sáıkes, erekshe qorǵalatyn tabıǵı aýmaqtarda ósetin aǵashtar men butalardy zańsyz keskeni nemese búldirgeni úshin jekelegen adamdarǵa – 30 AEK mólsherinde, shaǵyn kásipkerlik sýbektileriniń zańdy tulǵalaryna – 70 AEK mólsherinde aıyppul salynady. Oǵan qosa zańsyz kesilgen aǵashtary, kólik quraldary men brakonerlik quraldary túgel tárkilenedi», dep eskertti B. Mahmetov.
