Qalamgerdiń mereıtoıyna oraı jazýshy Lev Tolstoıdyń «Anna Karenına» romanynyń qazaq tilindegi nusqasy qaıta jaryqqa shyqty. Atalǵan týyndy Jetisý oblysy ákimdiginiń qoldaýymen «Mazmundama» baspasynda jaryq kórdi. Alǵashynda 500 danamen shyqqan eńbek keıinnen oqyrmandardyń suranysy boıynsha 2000-ǵa jetken.
«Bıyl qalamgerdiń 115 jyldyǵy atalyp ótildi. «Anna Karenına» aýdarmasynyń tusaýkeseri – Almaty qalasyndaǵy alǵashqy is-sharanyń biri. Árıne, búgingi keshke shaqyrylǵandar aqynnyń týǵan jeri Aqsý aýdanyndaǵy Qapal, Qońyr aýyldarynan, jalpy Jetisýdan arnaıy delegasııa kelip otyr. Sonymen qatar Astanadaǵy aqyn atyndaǵy mektepten de delegasııa keldi. Ata jaıly estelikter aıtyldy», deıdi Ǵ.Ormanovtyń jıen nemeresi Aıdar Qyryqbaıuly.
Aıta keteıik, aqynnyń aýdarma salasyna sińirgen eńbegi orasan zor. Ol qyrǵyzdyń «Manas» eposynyń birinshi kitabyn, A.Pýshkınniń «Mys salt atty» týyndysyn qazaq tiline tárjimálaǵan.
Is-shara barysynda «Syrly sezim aqyny» atty Ǵalı Ormanovtyń shyǵarmashylyǵy men ómirine arnalǵan kitap kórmesi uıymdastyryldy. Aqynnyń qyzy Jamıǵa Ormanova, Ál-Farabı atyndaǵy Qazaq ulttyq ýnıversıtetiniń professory Káken Hamzın, «Jas Alash» gazetiniń bas redaktory Qaırat Mátirekov, «Qazaqstan» ulttyq telearnasynyń Almaty qalasyndaǵy fılıalynyń jetekshisi Sáýle Jırenshına, fılologııa professory Gúljahan Orda, belgili aqyn Baqyt Bedelhan qalamger týraly keńinen áńgime qozǵap, atqarǵan eńbekterin saralap ótti.
«Ǵalı Ormanov shyǵarmalarynyń jastarǵa bereri kóp. Birinshi kezekte Otandy súıýge, patrıotızmge tárbıeleıdi. Onyń shyǵarmalaryndaǵy týǵan jer, adamgershilik taqyryby oqyrmandy eleń etkizbeı qoımaıdy. Ol óz dáýiriniń aqyny ǵana bolyp qoıǵan joq, qazaqqa bitpes rýhanı mura qaldyryp ketti», deıdi M.Áýezov atyndaǵy Ádebıet jáne óner ınstıtýtynyń bas ǵylymı qyzmetkeri Gúljahan Orda.
Jıyn sońynda qatysýshylar estelik sýretke túsip, tarqady.
