Eýrazııalyq ıntegrasııanyń ıgiligi aımaqtarǵa da taraıdy

ASTANA. 29 mamyr.Eýrazııalyq ıntegrasııa ıgiligin aımaqtar kóretin bolady. Bul týraly BNews.kz tilshisi habarlady. Aqtóbe oblysynyń ózinde búgingi tańda Keden odaǵy aıasynda ózara saýda aınalymy edáýir artyp otyr. Endi Eýrazııalyq ekonomıkalyq odaq aýqymynda bul qarqyn odan ári kóterile túsýge tıis. Oblystyq kásipkerlik jáne ındýstrıaldyq-ınnovasııalyq damý basqarmasy bergen derekterge qaraǵanda, ótken jyly taýar aınalymy 1495,0 mln. AQSh dollaryn quraǵan. Bul - 2012 jylymen salystyrǵanda, 109,9 paıyzǵa artyq. Osy kezde onyń saýda aınalymy Reseımen 1451,0 mln. dollarǵa, Belarýspen 44,0 mln. dollarǵa jetken. Mamandardyń aıtýynsha, eksportqa shyǵarylatyn taýarlardyń da túri kóbeıgen. Mysaly, et,sút pen kondıterlik ónimderden ózge medısınalyq tehnıka men qurylys materıaldary jetkiziledi. Eýrazııalyq ekonomıkalyq odaq aıasynda saýda-sattyq jasaýǵa kedergiler múldem bolmaıdy. Búgingi tańda Aqtóbeniń «Temir Servıs» seriktestigi Reseıdiń «Chılısaıskıe fosforıty» saýda úıimen kelisimge qol qoıdy. Olar Reseı Federasııasynyń aýmaǵynda resmı deldal bolyp, kórshi eldiń onnan astam oblysynda taýarlar satady. Al Aqtóbe beımetall qubyrlary zaýyty «Tatneft-Steklovolokno» AAQ arasynda shyny talshyqtary ónimin jetkizý boıynsha uzaq merzimdi kelisim jasaldy. Osylaısha Eýrazııalyq ekonomıkalyq odaqtyń aıasynda da seriktestikterdi damytýǵa múmkindikter týady. Murat Aıtqoja. Derekkóz: BNews.kz. Foto: agencyrating.kz.