Pýtın odaq músheleriniń egemen qalpynda qalatyndaryn jetkizdi

ASTANA. 29 mamyr. Búgin Qazaqstan, Reseı jáne Belarýs Prezıdentteri Nursultan Nazarbaev, Vladımır Pýtın jáne Aleksandr Lýkashenko Eýrazııalyq ekonomıkalyq odaq (EAEO) qurý jónindegi kelisimge qol qoıdy. Ol 2015 jyldyń 1 qańtarynan jumys isteı bastaıdy. Bul týraly ITAR-TASS tilshisi habarlady. Budan bylaı Reseı, Belarýs jáne Qazaqstan odaq naryǵyndaǵy shynaıy nıetti básekeni yntalandyryp otyrýǵa nıetti bolyp otyr. Osymen bir mezgilde tutynýshylar men odaqqa qatysýshy elderdiń múddeleri barynsha tıimdi qorǵalatyn bolady. Muny óz sózinde Vladımır Pýtın aıtty. Reseı Prezıdentiniń sózine qaraǵanda, kelisimdi daıyndap, oǵan qol qoıý kezinde qatysýshy elder basshylarynyń ortaq umtylysy, taraptardyń daıyndyǵy men ymyraǵa kele bilýshiligi arqasynda kóptegen kedergilerdi jeńýdiń oraıy keldi. Al bul jónindegi jumystar 2014 jyldyń 1 maýsymynda bastalǵan bolatyn. «Eýrazııalyq ekonomıkalyq odaq ámbebap móldir qaǵıdattar, jalpyǵa ortaq túsinikter, sonyń ishinde Búkilálemdik saýda uıymy talaptary negizinde jumys jasaıtyn bolady, - dep málimdedi Pýtın. – Bul - Reseı, Belarýs jáne Qazaqstan úkimetteriniń tyǵyz qarym-qatynas jaǵdaıynda jumys jasaýlarynyń nátıjesi». Reseı lıderiniń sózine qaraǵanda, EAEO kelisimine qol qoıý oǵan qatysýshy elderdi ıntegrasııanyń prınsıpti jańa deńgeıine kóteredi. «Biz memlekettik egemendikti tolyq qalpynda saqtaı otyryp, sonymen birge meılinshe úılesimdi ekonomıkalyq yntymaqtastyq pen kooperasııa jasaımyz», - dep atap ótti ol. Sáken Maılybaı. Derekkóz: ITAR-TASS. Foto: ITAR-TASS/Mıhaıl Metsel.