Eýrazııalyq ekonomıkalyq odaq – ýaqyt talabyna laıyqty jaýap

Keshe Astanada Joǵary Eýra­zııalyq ekonomıkalyq keńes­tiń  Memleketter bas­shy­lary deńgeıindegi oty­rysy ótti. Otyrys Qazaq­stan Respýblıkasynyń Pre­­zıdenti Nursultan Na­zar­baevtyń, Reseı Federa­sııasynyń Prezıdenti Vla­dımır Pýtınniń, Bela­rýs Respýblıkasynyń Pre­zıdenti Aleksandr Lýkashen­konyń qatysýymen shaǵyn quramdaǵy kezdesýden bas­taldy. Memleket basshylary Keden odaǵy men Bir­tu­tas ekonomıkalyq keńis­tikti damytýdyń negizgi ba­ǵyt­taryn, sondaı-aq, eýra­zııalyq ıntegrasııalyq úde­risterdi keńeıtý máselelerin talqylady. Ulttyq múddeler eskerilgen qujat Keńes otyrysyna tóraǵalyq etken ári shańyraq ıesi retinde alǵash­qy bolyp sóz alǵan Qazaq­stan Prezıdenti Nursultan Nazar­baev búgingi kezdesýdiń Qazaq­stan, Belarýs jáne Reseı mem­leketteriniń bolashaǵy úshin tarıhı mańyzy bar ekenin atap ótti. Biz Eýrazııalyq ekonomıkalyq odaq qurý týraly shartty ázirleý jónindegi orasan zor jumystardy aıaqtadyq, dedi Elbasy. Shartqa qol qoıý arqyly eýrazııalyq keńis­tiktegi yqpaldastyqtyń jańa sapaly kezeńi bastalady. Bul qujatta barlyq memleketterdiń múddeleri eskerilgen. Saýatty jáne salı­qaly daıyndalǵan. Birqatar kelis­peýshilikterge qatysty qol jetkizilgen konsensýs barlyq tarapty qanaǵattandyrdy. Qazaqstan Prezıdenti Shartta arqaýlyq aspektilerdiń barlyǵy kórinis tapqanyna toqtaldy. Qujatta halyqaralyq uıymdarǵa tán barlyq arqaýlyq aspektiler kórinis taýyp otyr, dedi Nursultan Nazarbaev osy jóninde. Memleketterdiń egemendi teńdigi, aýmaqtyq tutastyǵy, sondaı-aq, Odaqqa múshe memleketterdiń saıası qurylymynyń erekshelikterin qurmetteý qaǵıdattary bekitilgen. Uıymnyń barlyq deńgeıindegi sheshimder qabyldaýda konsensýs qaǵıdatynyń bolýy erekshe mańyzdy. Osy  oraıda, árbir qatysýshy taraptyń daýysynyń sheshýshi máni bar. Elbasy óz  sózinde Odaqqa múshe memleketterdiń til máse­lesin de atap ótti. Eýrazııalyq ekono­mıkalyq odaq sheńberindegi barlyq halyqaralyq kelisimder, Komıssııanyń mindetti sıpattaǵy kúshi bar sheshimderdiń barlyǵy orys tilinde qabyldanady, dedi Nursultan Nazarbaev. Biz osylaı kelistik. Degenmen, sondaı qu­jat­tar birden taraptardyń árqaı­sysynyń memlekettik tilde­rine de aýdarylatyn bolady. Son­dyqtan tildik qaǵıdattar jóninde  esh­qandaı kemsitýshilikter oryn almaıdy. Qazaqstan basshysy, sondaı-aq, Joǵary Eýrazııalyq ekono­mı­kalyq keńes otyrysynyń kún tártibine qoıylǵan máse­le­lermen de tanystyrdy. Elbasy­nyń atap ótkenindeı, Keńes otyry­synyń kún tártibine  jeti másele shyǵarylyp otyr. Bul máse­le­lerdiń barlyǵy vıse-premerler men sarapshylardyń jan-jaq­ty talqylaýynan ótken, qol qoıýǵa daıyn tur. Onyń ishinde Eýrazııa­lyq ekonomıkalyq odaq qurý týraly shartqa qol qoıý rásimi de bar. Qazaqstan Prezıdenti bul shart úsh memlekettiń azamattarynyń ál-aýqatyn arttyrýǵa baǵyttalǵanyna nazar aýdardy. Eýrazııalyq eko­no­mıkalyq odaqty qurý bizdiń ekono­mıkamyzdy jan-jaqty jań­ǵyr­týdy jalǵastyrý, elderi­mizdi álemdegi jetekshi oryndarǵa shyǵarý úshin qýatty serpin bere­tinine senimdimin, dedi Nursultan Nazarbaev. Qurylyp jatqan Odaqqa Armenııanyń qosylýy týraly tarmaq bar. О́z kezeginde Qyrǵyzstan Eýrazııalyq ekono­mı­kalyq komıssııa keńesi maquldaǵan Keden odaǵyna qosylý jónindegi jobany qoldady. Memleket basshysy, sonymen qatar, Odaqtyń organdaryndaǵy kadr saıasaty taraptardyń teń qamtylýy qaǵıdatyn eskere otyryp jáne osy mańyzdy jumysqa bilikti mamandar tartý konkýrstyq negizde júrgiziletinin atap ótti. Belarýs Respýblıkasynyń Prezıdenti Aleksandr Lýka­shen­ko óz sózin elderimizge ekono­mı­kalyq ıntegrasııa joly ońaı­ǵa túspegeninen bastady. Ár­bir qadam ońaı bolǵan joq, dedi Belarýs basshysy. Biraq, bizdiń basty maqsatymyz aı­qyn, ol – halyqtarymyz tatý­lyq pen dostyqta ómir súrip, memle­ket­terdi damytý men nyǵaıtý ózara tıimdi yntymaqtastyqtyń negizinde júzege asyrylyp jat­qa­nyna olardyń senimdi bolýyn qamtamasyz etý. Bizdiń durys jol­dy tańdaǵanymyzdy ómirdiń ózi kór­setti. Burynǵy keńestik keńis­tiktiń qaıtarymsyz keri ıntegra­sııasyna jol bermes úshin biz TMD-ny qurýdan bastadyq, sodan keıin Eýrazııalyq ekonomıkalyq qoǵamdastyqty, Keden odaǵyn qurdyq. Birtutas ekonomıkalyq keńis­tiktiń nobaıyn jasadyq. Búgin biz márege jetip otyrmyz. Ol Eýra­zııalyq ekonomıkalyq odaqqa ákeldi. Osyǵan baılanysty Aleksandr Lýkashenko qol qoıylǵaly otyr­ǵan sharttyń erejelerin oǵan qa­tysýshylardyń barlyǵynyń ortaq paıdasyna qaraı jetildirý múmkindikteri bar ekenin atady. Onyń aıtýynsha, Eýrazııalyq ekonomıkalyq odaq qurý joly óte aýyr jáne uzaq boldy, qarsylyq tanytýshylar da kezdesti. Bú­gin úsh memleket Eýrazııalyq eko­nomıkalyq odaq týraly shartqa qol qoıýǵa sanaly túrde qadam basyp otyr. Al Reseı Federasııasynyń Pre­zıdenti Vladımır Pýtın Eý­ra­zııalyq ekonomıkalyq odaq týraly shart memlekettik egemen­dikti tolyq saqtaı otyryp, elderimizdi ıntegrasııanyń múlde jańa deńgeıine alyp shyǵa­tynyn atap ótti. Sondaı-aq, Reseı basshysy Eýrazııalyq odaq ıdeıasynyń bastaýynda Nursultan Nazarbaev turǵandyqtan, shartqa Qazaqstannyń elordasynda qol qoıylýynyń sımvoldyq máni bar ekenine toqtaldy. Búginde biz birlesip, ekonomıkalyq damýdyń qýatty, tartymdy ortalyǵyn,  170 mıllıonnan astam halyqty biriktiretin iri óńirlik rynokty qurýdamyz, dedi Vladımır Pýtın. «Úshtik» elderinde damyǵan ónerkásip, ındýstrııalyq baza, qýatty kadrlyq, ıntellektýaldyq, mádenı áleýet bar. Geografııalyq jaǵdaıymyz bizge tek óńirlik qana emes, jahandyq ta mańyzy bar kólik-logıstıkalyq baǵdarlar qalyptastyrýǵa, Eýropa men Azııanyń aýqymdy saýda joldaryn ózimizge «baǵyndyrýǵa» múmkindik beredi. Osynyń bar­lyǵy – bizdiń birlestigimizdiń báse­kege qabilettiliginiń, onyń jedel ózgerip jatqan ári kúrdeli álemdegi qarqyndy damýynyń kepili bolyp tabylady. Reseı basshysy óziniń sózi barysynda shartqa qol qoıýdyń tarıhı mańyzy erekshe ekendigine de toqtaldy. Bizdiń búgingi kezdesý tarıhı mańyzǵa ıe, dedi ol osy jaıynda. Qazaqstan, Reseı jáne Belarýs memleketteri Eýrazııalyq ekonomıkalyq odaq týraly shartqa qol qoıady. Bul qujat memleketterdiń egemendigin saqtaı otyryp, bizdiń elderdi ıntegrasııanyń jańa deńgeıine shyǵarady. Ári ol úılesimdi ekonomıkalyq yntymaqtastyqty qamtamasyz etedi. Eýrazııalyq odaq ıdeıasyn Qazaqstan Prezıdenti 1994 jyly Máskeý memlekettik ýnıversıtetindegi dárisi barysynda alǵash ret jarııa etken bolatyn. EAEO – ózge elder úshin ashyq qurylym Shaǵyn quramdaǵy otyrys aıaqtalǵan soń májilis keńeıtilgen quramda jalǵasty. Bul otyrysqa Armenııa Prezıdenti Serj Sargsıan men Qyrǵyzstan Prezıdenti Almazbek Atambaev, sonymen qatar, Eýrazııalyq ekonomıkalyq komıssııa alqasynyń tóraǵasy Vıktor Hrıstenko qatysty. Memleket basshylary Ar­me­nııanyń Eýrazııalyq ekonomıkalyq odaqqa qosylýy týraly shartty ázirleý barysyn, sondaı-aq, Qyrǵyz Respýblıkasynyń Keden odaǵyna qosylýy jónindegi Jol kartasyn qarady. Otyrysty Qazaqstan Res­pýb­lıkasynyń Prezıdenti Nursultan Nazarbaev ashyp, júrgizip otyrdy. Elbasy óziniń kirispe sózinde eýrazııalyq ekonomıkalyq ıntegrasııa kelesi kezektegi bıikke kóterilgenin atap ótti. Búgin biz Eýrazııalyq ekonomıkalyq odaqty qurý týraly shartqa qol qoıatyn bolamyz. Ol qol qoıýshy memleketter halyqtarynyń ál-aýqatyn, ómir sapasyn jaqsartýǵa baǵyttalǵan. Men osy múmkindikti paıdalana otyryp, shartty daıyndaǵan sarapshylar tobynyń eńbegine rahmetimdi aıtamyn. Sonymen birge, bizdiń elderimizdiń úkimetterine jáne Eýrazııalyq komıssııaǵa da osynaý mańyzdy qujatty qysqa merzimde daıyndaı alǵandyǵy úshin alǵys aıtamyn, dedi Qazaqstan basshysy. Odan ári Prezıdent búgingi kúni ózara is-qımylymyzdy kem degende 15-20 jyl alǵa jeteleıtin alys kókjıekke kóz tigýimiz kerektigin atap kórsetti. HHI ǵasyrdyń alǵashqy jartysynda bizdiń Odaǵymyzdyń aldyndaǵy mıssııasy eki túrli mańyzdy máseleni sheshýde ekenin túsinýimiz kerek. Birinshiden, álemniń asa ma­ńyz­dy ekonomıkalyq makro­aı­maǵyna aınalyp, Shyǵys pen Batystyń, Eýropa men Azııanyń «eko­nomıkalyq kópiri» bolatyn sapaǵa qol jetkizý arqyly báseke­lestikke qabilettiligimizdi art­tyrý. Ekinshiden, árbir múshe memleketti álemniń baryn­sha damyǵan elderi qataryna engizýdi qamtamasyz etý, deı kelip, Eýra­zııalyq ekonomıkalyq odaq halyq­tarymyzǵa aýyrtpalyq emes, ıgilik bola bilýi kerek ekenin atap kór­setti. Odan ári Prezıdent: «Biz tek osyndaı joldy ustana bilsek qana eýrazııalyqtyń tartymdylyǵyn arttyramyz jáne onyń aıqyn maqsattaryna degen kúmándi bir­jolata joıatyn bolamyz», dedi. Qazaqstan basshysy Eýra­zııa­lyq ekonomıkalyq odaqtyń ultústilik organdarynyń jumys isteý tártibi týraly aıtty. Biz Eýra­zııalyq eko­nomıkalyq komıs­sııanyń Máskeýde ornalasýyna kelistik. Sóıtip, Máskeý Eýra­zııalyq ekonomıkalyq odaqtyń ekonomıkalyq ortalyǵy bolady. Basqa da usynystar bolǵan edi, biraq másele osylaı sheshildi. Mınskide Eýrazııalyq sot ornalasady. Bizdiń Odaǵymyzdyń quqyqtyq aspektileri de sonda shoǵyrlanady. Al Almatyda 2025 jyldan bastap Odaqtyń qarjy naryǵyn retteý jónindegi ultústilik organ ornalasatyn bolady. Osylaı deı kelip, Prezıdent odaqtyq qarjylyq rettegishtiń qurylýyn kútpeı-aq Almatyny Eýrazııalyq ekonomıkalyq odaq­tyń qarjylyq ortalyǵy retinde qarastyrýdy bastaı berý kerek ekenin atap ótti. N.Nazarbaev óz sóziniń qorytyndysynda EAEO múshe elder ekonomıkasyn jan-jaqty jańǵyrtýǵa qýatty serpin beretinin atap ótti. Odan ári Elbasy kún tárti­bin­degi máseleler boıynsha úsh Memleket basshysy tolyq keli­simge kelgenin aıta otyryp, Armenııa men Qyrǵyzstan prezı­dentterin keńeıtilgen otyrysqa shaqyrýǵa keliskenderin jetkizdi. Endi osy eki memlekettiń basshylaryn tyńdaıyq, dep Nursultan Ábishuly alǵashqy sózdi Armenııa Prezıdenti Serj Sargsıanǵa berdi. S.Sargsıan ózin Eýrazııalyq ekonomıkalyq odaqqa qol qoıý sııaqty tarıhı májiliske jáne Joǵary Eýrazııalyq ekono­mıkalyq keńeske shaqyrǵandary úshin jańa Odaqtyń múshelerine rıza­shy­lyǵyn jetkizdi. Men Keden odaǵy memleketteri basshylaryn EAEO qurý sııaqty mańyzdy qadamǵa aıaq basyp otyrǵandyǵymen shyn jú­rekten quttyqtaımyn, dedi ol. Bul shart tolyp jatqan sarap­shylar men laýazymdy tulǵalardyń kedergiler men kelispeýshilikterdi retteý jolynda uzaq ter tógý arqyly barlyq jaqtyń da múddesin eskergen mámilelik sheshimderge qol jetkizgen jankeshti eńbekteriniń arqasynda ómirge kelgen qujat ekeni sózsiz. Árıne, oǵan qol jetkizý Memleket basshylarynyń saıası erik-jigeriniń arqasynda ǵana múmkin bolyp otyrǵanyn da bilemiz, dedi ol. Odan ári Serj Sargsıan Arme­nııanyń EAEO-ǵa ený máselesi týraly aıtty. Qazaqstan, Reseı jáne Belarýs elderiniń tıisti ve­domstvolary men Eýrazııalyq ekonomıkalyq komıssııanyń ózara kelisimdi jumystarynyń arqa­synda Armenııanyń Eýrazııalyq ekonomıkalyq odaqqa enýi týraly sharttyń jobasy belgilengen merzimde daıyn boldy. Osyǵan oraı Keden odaǵy elderi basshylaryna jáne Eýrazııalyq ekonomıkalyq komıssııa mú­she­­lerine rızashylyǵymdy bildi­remin, dedi ol. Bizdiń Eýrazııalyq ekono­mıkalyq odaq qurý týraly shartqa qol qoıýǵa qyzyǵýshylyq tanytýymyzǵa túrli sebepter bar, deı kelip, Serj Sargsıan Ar­menııanyń 2015 jyldyń 1 qań­tarynan bastap EAEO-ǵa enýi týraly ulttyq bıznes te, halyq ta tolyq habarlanǵanyn jetkizdi. Solardyń qoldaýyna súıenip jáne sarapshylyq deńgeıde 2-3 másele ǵana tolyq kelisilmegenimen, ymyrashyl sheshim belgilengenin aıta otyryp ol óz eliniń EAEO-ǵa kirý týraly shartqa ústimizdegi jyldyń 15 maýsymyna deıin qol qoıýǵa ázir ekenin jetkizdi. Odan keıin sóz alǵan Qyr­ǵyzstan Prezıdenti Almazbek Atambaev Nursultan Nazarbaev jıyrma jyl buryn usynǵan ıdeıasynyń iske asyp jatqanyn atap ótti. Men Eýrazııalyq eko­nomıkalyq odaqty bar­lyq múshe-memleketterdiń ekonomıkalyq damýyna paıdaly alań bola alatyn tıimdi uıym dep sanaımyn. Aldymen Keden odaǵyna ený jáne kelesi kezeńde EAEO qataryna ótý Qyrǵyzstan úshin ekonomıkalyq saıasattyń mańyzdy baǵyty jáne sanaly sheshimi bolyp otyr. Keden odaǵyna múshe elder – bizdiń ekonomıkalyq áriptesterimiz ǵana emes, eń aldymen rýhy jaqyn, tarıhy ortaq halyqtar. Bizdiń aramyzda eshqandaı tildik kedergi de joq. Bizde ortaq tarıh bolsa, aldaǵy ýaqytta bolashaǵymyz da ortaq bolady dep sanaımyn, dedi A.Atambaev. Sonymen qatar, ol prog­res­shil ıntegrasııalyq qaǵı­dat­tar qaty­sýshy elderdiń turaq­ty­lyǵy men qaýipsizdigin de art­ty­ratynyn atap ótti. Osy máse­lelerdiń sheshilýi Qyrǵyzstan halqynyń ulttyq múddelerine saı keledi. Oǵan Keden odaǵynyń basqa músheleri de múddeli. Qyrǵyzstanmen áriptestik qatynastar ornatý Keden odaǵy múshelerine geosaıası artyqshylyqtardy aıtpaǵannyń ózinde, aımaqtyq máselelerdi sheshýge múmkindik beredi dep oılaımyn, deı kelip, ol túrli ekonomıkalyq boljamdar men saraptarǵa qaraǵanda Keden odaǵyna kiretin bolsa Qyrǵyzstan úshin alǵashqy kezeńder ońaı bolmaıtynyn bilip otyrǵanyn jetkizdi. Al qazir Qyrǵyzstan ekonomıkasy kúrdeli jaǵdaıǵa qaramaı, turaqty damý jolyna túsip kele jatyr. Sondyqtan biz óz problemalarymyzdy sheshýdi eshqashan Keden odaǵynyń basqa múshelerine júktemeımiz. Alaıda, bizdi óndiristiń toqyrap, jumyssyzdyqtyń artýy ǵana alańdatady. Bizdiń osyndaı problemalarymyzǵa túsinistikpen qarap, qoldaý bildirgendi ǵana qalaımyz, dedi A.Atambaev. Kelesi kezekte ol Qyrǵyzstan ekonomıkasyn ótpeli kezeńde qoldaǵandary úshin Qazaqstan men Reseı taraptaryna alǵysyn jetkizdi. Reseı tarapymen birigip búgingi kúni Qyrǵyzstannyń Keden odaǵyna ótý máselelerin sheshýge qarjylyq qoldaý bil­di­retin qor qurý týraly sheshim qa­byldanǵanyn aıtty. Qyrǵyz taraby da reseılik ınvestısııaǵa, qor jumystaryna qoldaý bil­diredi jáne ony qorǵaýǵa kepildik beredi. Keden odaǵyna ótýde biz áriptesterimizdiń jáne ózimiz­diń ekonomıkamyzǵa tıimdi qaty­nas, ınvestısııalyq durys ahýal ornatýdy kózdeımiz, degen Qyrǵyzstan Prezıdenti. A.Atambaev óziniń sózin Qyrǵyz­stannyń Keden odaǵyna ótýi el ekonomıkasynyń damýy men halyqtyń jaǵdaıy jaqsa­rýyna tyń serpin beretinin atap ótýmen qatar, búgingi otyrysta Qyr­ǵyzstannyń Keden odaǵyna ótýi týraly Jol kartasyna qol qoıy­laryna úmittenetinin bildirýmen aıaqtady. Jańa jyldy biz bir ın­te­grasııalyq qurylymda qarsy alarmyz degen úmittemin, dedi ol. Odan keıin otyrys tóraǵasy N.Nazarbaev kún tártibindegi má­se­leler boıynsha baıandaý úshin sóz kezegin Joǵary Eýra­zııalyq ekonomıkalyq komıssııa alqasynyń tóraǵasy Vıktor Hrıstenkoǵa berdi. Ol óziniń sózin Memleket basshylarynyń aldynda jatqan kitapqa nazar aýdarýdan bastady. «Eýrazııalyq jobaǵa – 20 jyl» dep atalǵan bul kitap Elbasy N.Nazarbaevtyń 1994 jyldyń basynda M.V.Lomonosov atyndaǵy MMÝ-de sóılegen sózimen bastalyp, jıyrma jyl boıǵy ıntegrasııalyq úderisterdi, barlyq qujattardy, fotografııalardy qamtyp, aqyry Qazaqstan basshysynyń ústimizdegi jylǵy sáýir aıynda sol oqý ornynda sóılegen sózimen aıaqtalady eken. Bul kitap búgingi ekonomıkalyq odaqqa alyp kelgen tiri tarıhty pash etken, dedi ol. Odan ári V.Hrıstenko kún tártibindegi máselelerge oıysyp, birinshi máseledegi EAEO qurý týraly sharttyń barlyq jaqpen kelisilip, qol qoıýǵa tolyq daıyn ekendigi týraly aıtty. Osy ýaqytqa deıin kelisilmegen ónerkásiptik sýbsıdııalar alý kezindegi tehnologııalyq operasııalar jáne avtomobılderdi ónerkásiptik qurastyrý rejimin kelisý sııaqty eki másele boıynsha da ekonomıkalyq komıssııa kelisimge kelip, sheshimdi sizderdiń qol qoıýlaryńyzǵa usynyp otyr. Sonymen qatar, Odaqtyń tolyqqandy jumys isteýine qajetti taǵy 20 shaqty qujatty daıyndaýymyz kerek. Biz olardy jyldyń basynda iske kirisýi úshin qysqa merzimde daıyn etemiz, al qabyldaý úshin qazan aıynda Mınskide jáne jeltoqsan aıynda Máskeýde kezdesý josparlaýlaryńyzdy ótinemin, dedi V.Hrıstenko. Ekinshi másele Armenııanyń EAEO-ǵa enýi týraly sharttyń daıyndyǵy týraly eken. Bul másele boıynsha aıtqanda, Armenııa qabyldaýǵa tıisti 126 qujattyń qysqa merzim ishinde 119-yn qabyldap, qalǵandary ymyraǵa kelýge bolatyn qujattar bolǵandyqtan, az ýaqytta daıyn etiletinin jetkizip, Odaqqa ený týraly shartty shilde aıynda sizderdiń qaraýlaryńyzǵa usyna alamyz, dedi Joǵary Eýrazııalyq ekonomıkalyq komıssııa alqasynyń tóraǵasy. Al Qyrǵyzstannyń Keden odaǵyna enýi týraly Jol kartasy da daıyn ekendigi jetkizildi. Ony Qyrǵyzstannyń Úkimeti qoldap, Parlamenti bekitken eken. Odan ári bul eldiń kelesi ıntegrasııalyq qurylymdarǵa ótýi de qarastyrylatyny jetkizildi. Odan ári osy eki másele boıynsha Joǵary Eýrazııalyq ekonomıkalyq keńestiń múshe­leri óz pikirlerin ortaǵa saldy. Birinshi sóılegen Reseı Fede­rasııasynyń Prezıdenti Vla­dımır Pýtın baıandamany tolyq qoldaıtynyn jetkizdi. Meni Ar­menııa men Qyrǵyzstannyń eýrazııalyq ıntegrasııaǵa enýge degen umtylysy qýantyp otyr. Árıne, bul eń aldymen olardyń ulttyq múddelerine saı ekendigi sózsiz. Biz olardyń umtylysyn qoldap, ıntegrasııalyq uıymdarǵa qosylýyna jaǵdaı jasaımyz, dedi ol. Belarýs Respýblıkasynyń Prezıdenti A.Lýkashenko da mun­daı umtylysty qýana qoldaı­tynyn jetkizdi. Tek bizdiń sharttarymyzdy oryndasa boldy, biz olardy qýana qarsy alýǵa daıynbyz, dedi ol. Kún tártibindegi basqa tórt másele Ekonomıkalyq komıs­sııa­nyń ótinishimen talqy­laý­syz sheshildi. Tek Ar­menııa máselesi boı­ynsha Nur­sul­tan Ábishuly bul eldiń EAEO-ǵa enýi barysynda memlekettik aýmaǵy BUU-da tir­kelgen kólemde tanylatynyn atap ótti. Sizder BSU-ǵa engende de osylaı bolǵan, sondyqtan ázer­baıjan jaǵynyń qarsylyǵyn týdyr­mas úshin osyndaı qadamǵa bara­myz. Onyń ústine ázerbaıjan jaǵynan da osyndaı ótinish hat kelgen. Artynan, shilde aıynda Arme­nııanyń Odaqqa enýi týraly shartqa qol qoıatyn bolsaq, osyn­daı máseleniń bar ekendigi umy­tyl­masyn, dedi Qazaqstan Prezıdenti óz sózin Serj Sargsıanǵa qaratyp. Al Qyrǵyzstannyń Keden oda­ǵyna qabyldaný máselesi eshqan­daı problemasyz sheshilip, sheshimge qol qoıy­latyn boldy. Sonymen birge, N.Na­zarbaev qol qoıylatyn Eýra­zııalyq ekonomıkalyq odaq týraly sharttyń barlyq memleketterdiń parlamentteri tarapynan bir mezgilde ratıfıkasııalanýyn usyn­dy. Sonda bizdiń Odaǵymyz 2015 jyldyń 1 qańtarynan bas­tap tolyqqandy jumys isteıtin bo­lady. Bul bizdiń elderimiz tarı­hynyń jańa paraǵy bolsyn, dedi N.Nazarbaev. Osymen Joǵary Eýrazııalyq ekonomıkalyq keńestiń otyrysy óz jumysyn aıaqtap, Mem­le­ket basshylary Eýrazııalyq eko­nomıkalyq odaqty qurý jónindegi shartqa saltanatty túrde qol qoıý úshin kelesi zalǵa ótti. Astana – Eýrazııalyq odaqtyń besigi Joǵary Eýrazııalyq ekono­mıkalyq keńestiń keńeıtilgen otyrysy kútkendegideı nátıjeli boldy. Qorytyndysynda Qazaq­stan Respýblıkasynyń Prezı­denti Nursultan Nazarbaev, Reseı Fe­derasııasynyń Prezıdenti Vla­dımır Pýtın jáne Belarýs Respýblıkasynyń Prezıdenti Alek­sandr Lýkashenko Eýrazııa­lyq ekonomıkalyq odaq qurý tý­raly shartqa saltanatty jaǵ­daı­da qol qoıdy. Qujatqa qol qoıý rásimine úsh memleket parla­men­tteriniń depýtattary, zııaly qaýym jáne qoǵamdyq uıymdardyń ókilderi qatysty. Saltanatty rásimnen soń Qazaqstan, Reseı jáne Belarýs memleketteriniń Prezıdentteri buqaralyq aqparat quraldary ókilderine málimdeme jasady. Qazaqstan basshysy, aldymen Odaqqa múshe úsh eldiń halqyn, osy saltanatty sharaǵa kýá bolyp otyrǵan jurtshylyqty Eýrazııalyq ekonomıkalyq odaq týraly shartqa qol qoıylýymen quttyqtady. Bul ekonomıkalyq odaq bolyp tabylady, dedi Nursultan Nazarbaev. Biz ózimizdiń ekonomıkalyq múmkindigimizdi elderimiz halyqtarynyń ál-aýqatyn jáne turmys-jaǵdaıyn órkendetý úshin birlesip otyrmyz. Tarıhı qujat – Eýrazııalyq ekono­mıkalyq odaq týraly shartqa búgin Astana qalasynda qol qoıyldy. Astana Eýrazııa qurlyǵynyń ortasynda ornalasqan. Kelesi kezekte Elbasy Astana qazirgi zamannyń eń jas elordasy ekenin atap kórsetti. Munda Álemdik jáne dástúrli dinder kóshbasshylarynyń sezderi, EQYU, Shanhaı yntymaqtastyq uıymy, Islam yntymaqtastyǵy uıymy jáne ózge de halyqaralyq uıymdardyń sammıtteri ótti. Biz EKSPO-2017 halyqaralyq kórmesin ótkizýge daıyndalýdamyz. Qazaqstan eýrazııalyq ıntegrasııa ıdeıasynyń ilgerileýine tarıhı úles qosty. Naq osynda ǵasyr basynda Eýrazııalyq ekonomıkalyq qoǵamdastyq quryldy, bizdiń ıntegrasııalyq úderisimizdiń barysy men qarqynyn aıqyndaǵan birqatar mańyzdy sheshimder qabyldandy, dedi Nursultan Nazarbaev. Budan soń Memleket basshysy Qazaqstan Eýrazııalyq ekonomıkalyq odaqtyń bastamashysy bolǵanyna toqtaldy. Astana qalasy Eýrazııalyq ekonomıkalyq odaqtyń besigi boldy dep maqtanyshpen aıta alamyz, dep jalǵastyrdy sózin Elbasy. Bul bizdiń kórshiles eldermen dostyq, ózara áriptestik qarym-qatynastardyń jalǵasy bolady dep esepteımin. Eýrazııalyq odaq ıdeıasynyń jarııa etilgenine jıyrma jyl toldy. Ony alǵash ret M.V.Lomonosov atyndaǵy Máskeý memlekettik ýnıversıtetinde aıtqan bolatynmyn. Osy jyldar ishinde qyrýar jumystar atqaryldy. Bastama Reseı Prezıdenti men Belarýs Prezıdenti tarapynan qoldaý tapty. Búgin sonyń nátıjesin kórip, shartqa qol qoıyp otyrmyz. Tek sońǵy bes jylda Qazaqstannyń Keden odaǵyna qatysýshy eldermen aradaǵy taýar aınalymy 88%-ǵa ósip, 24 mlrd. dollarlyq mólsherge jetti. Eýrazııalyq ıntegrasııa jónindegi seriktes memleketterge bizdiń eksportymyz 63%-ǵa ulǵaıyp, 6 mlrd. dollar boldy. Bul abstraktili sandar ǵana emes. Olardyń artynda júzdegen naqty kásiporyndar men kompanııalar, qazaqstandyq, belarýstik jáne reseılik seriktestermen aradaǵy ózara is-qımyldyń jańa jelileri tur. Bul – myńdaǵan jańa jumys oryndary, turaqtylyq jáne ózine jańa ótkizý naryqtaryn ashqan Qazaqstan bıznesiniń tabystylyǵynyń ósýi, dedi Qazaqstan Prezıdenti. Memleket basshysy ınte­grasııalyq yntymaqtastyqtyń bereri mol ekenin atap ótti. Prezıdenttiń atap ótkenindeı, búgingi qol qoıylǵan qujat oǵan qatysýshy elderdiń ekonomıkasyn órkendetedi, sol arqyly kásipkerlik damıdy, jańa jumys oryndary ashylady. Qazirgi kezde Eýrazııalyq ekonomıkalyq odaqqa qosylýǵa Armenııa men Qyrǵyzstan da jańa qadam jasap jatyr, dedi Elbasy. Ondaǵy basty maqsatymyz, árbir eldiń múmkindikterin ıntegrasııalyq baılanystar jasaý arqyly arttyrý bolyp tabylady. Bizdiń ulttyq ekonomıkamyzdy quldyratpaý úshin barlyq máselelerdi eskerýimiz qajet. Eýropalyq odaqtyń jaǵ­daıy bizge osyny kórsetip otyr. Álemdik ekonomıkanyń turaq­ty damýy osyndaı jańa múm­kin­dik­ter ashýdan kórinedi. Osyn­daı múmkindikterdi biz jańa ekono­mıkalyq odaqtan kórip otyrmyz. Nursultan Nazarbaev ıntegrasııa, álemdik tájirıbe kórsetkendeı, ekonomıkanyń damýyna qajetti uzaq merzimdi turaqty jaǵdaıdy jáne azamattardyń baqýatty ómiri úshin jańa múmkindikterdi bildiretinin atap ótti. Eýrazııalyq ekonomıkalyq odaqty biz jahandyq baılanys­tarmen etene jymdasqan, Eýropa men damyp kele jatqan Azııa arealdary arasyndaǵy berik kópir túrindegi ashyq ekonomıkalyq qoǵamdastyq retinde kóremiz. Eýrazııalyq ıntegrasııany damyta otyryp, biz zańdy kezeńder – erkin saýda aımaǵy, Keden odaǵy, Birtutas ekonomıkalyq keńistik arqyly batyl ilgerilep kelemiz, dedi Qazaqstan basshysy. Qazaqstan Prezıdenti EAEO týraly shartqa qol qoıý arqyly Jer sharynyń  eń iri tutynýshylyq naryqtarynyń biri, energııa resýrstarynyń iri eksporttaýshysy bolyp sanalatyn ıntegrasııalyq birlestiktiń qurylýy zańdyq turǵydan resimdelgenin aıtty. Memleketterdiń táýelsizdigine kepildik beretin negizgi resýrs­tar bul birlestiktiń ózinde jetkilikti. Osylaısha búgin HHI ǵasyrdyń jańa geoekonomıkalyq aqıqaty dúnıege keldi. Ol úlken qıyndyqpen quryldy. Ashyǵyn aıtaıyn: biz Eýrazııalyq ekonomıkalyq odaqqa kóp qıyn­dyqpen jettik. Aldymyzda jahan­dyq turaqsyzdyq jaǵdaıyndaǵy qalyptasý men damýdyń kúrdeli kezeńi tur. Integrasııa bizge ózdiginen keremet ómirge kepildik bermeıdi. Jańa syn-qaterler men jańa mindetter bolady. Biz olardy birigip sheshýge jáne barshamyzdyń kúsh-jigerimizben daǵdarysty eńserýge daıyn bolýǵa tıispiz, dedi Qazaqstan Prezıdenti. Nursultan Nazarbaev Eýrazııa keńistiginde halyqtardyń tatý kórshiliginiń túbegeıli jańa úlgisi qalyptasyp jatqanyn, oǵan joǵary senim, berik dostyq jáne memleketterimizdiń ózara qoldaýy negiz bolyp otyrǵanyn atap aıtty.  Eýrazııalyq ekonomıkalyq odaq, eń aldymen, bizdiń elderimizdiń mıllıondaǵan azamattary úshin jańa múmkindikter kózi. Qatysýshy elderde shaǵyn jáne orta kásipkerlikti damytýǵa qolaıly alǵysharttar jasalýda. Eńbek resýrstary naryǵy birigýde, bul kásibı deńgeıdi kóterý men eńbek ónimdiligin arttyrýdyń mańyzdy faktory sanalady. Azamattar úshin Eýrazııalyq ekonomıkalyq odaqtyń árbir memleketinde bilim berý qyzmeti men áleýmettik ınfraqurylymdaryna teń qoljetimdilik jaǵdaılary jasalýda. Ishki kedergilerdi joıý qazirdiń ózinde mádenı-gýmanıtarlyq baılanystarymyzdy kúsheıtýge, týrızmniń ósýine jaqsy yqpal etti. Osy paıdanyń barlyǵyn azamattarymyz aıqyn uǵynyp otyr. Bul eýrazııalyq yqpaldastyq úderisine keń aýqymdy halyqtyq qoldaý bolýda, dedi Nursultan Nazarbaev. Qazaqstan Prezıdenti  úsh eldiń jastaryna da sóz arnady. Eýrazııalyq ekonomıkalyq odaq sizder úshin qurylýda. Ol sizderge qatysýshy eldiń kez kelgeninde sapaly bilim jáne kásibı mashyqty ıgerýde artyqshylyq beredi. Búgingi oqıǵa bizdiń elderimizdiń bolashaǵy úshin, birinshi kezekte, jańa urpaq úshin jańa múmkindikter kózin ashady, dedi Nursultan Nazarbaev. Memleket basshysy qatysýshy-memleketterdiń ortalyq ve­domstvo­lary men úkimetteri jetek­shileriniń, Eýrazııalyq ekono­mıkalyq komıssııa músheleriniń, sarapshylardyń eýrazııalyq ekonomıkalyq yqpal­dastyq úde­ris­terin júzege asyrý­daǵy aı­ryqsha úlesin atap ótti. Ol ortaq jumystyń nátıjesi tarıhı qujatqa qol qoıý bolǵanyn aıtty. Eýrazııalyq ekonomıkalyq odaq – bizdiń elderimizdiń máńgilik dostyǵynyń, ózara is-qımyly men tatý kórshiliginiń berik jańa tetigi. 29 mamyr bizdiń elde­rimizdiń estelik kúntizbelerine Eýrazııalyq yqpaldastyq kúni retinde enýge laıyqty dep sanaı­myn. Bizdiń elderimizdiń halqyn, osy rásimniń barlyq qatysýshylary men qonaqtaryn Eýrazııalyq ekonomıkalyq odaq týraly shartqa qol qoıylýymen taǵy da quttyqtaımyn, dedi Memleket basshysy. О́z sózinde Reseı Federa­sııasynyń Prezıdenti V.Pýtın qol qoıylǵan shart ekonomıkany damytyp, úsh el azamattarynyń ál-aýqatyn kóterý úshin úlken múmkindikter ashatynyn atap aıtty. Reseı, Belarýs jáne Qa­zaqstan ózara is-qımyldyń múlde jańa deńgeıine ótedi: taýarlar, qyzmetter, kapıtaldar men jumys kúshi erkin qozǵalatyn ortaq keńistik qurady. «Úshtik» memleketteri ekonomıkanyń ener­getıka, ónerkásip, aýyl sharýa­shylyǵy jáne kólik sekildi negizgi salalarynda kelisilgen saıasat júrgizetin bolady. Is júzinde biz 170 mıllıonnan astam halqy bar TMD keńistiginde óndiristik, ǵylymı jáne tehnologııalyq áleýeti zor, tabıǵı resýrstary orasan mol, iri ári biryńǵaı naryq quramyz, dedi V.Pýtın. Reseı Prezıdenti álemdik ekonomıkada tolyqqandy halyqaralyq quqyqtyq sýbektilikke ıe jáne Dúnıejúzilik saýda uıymynyń qaǵıdalary negizinde áreket etetin jańa ekonomıkalyq uıym paıda bolyp otyrǵanyn aıtty. Ol saýda qurylymyn jetildirý, joǵary tehnologııalyq taýarlar úlesiniń artýy, elderimizdiń álemdik ekonomıkadaǵy básekege qabilettiliginiń nyǵaıýyn qosa qamtıtyn yqpaldastyq úderis­terdiń ózara tıimdiligi qazirdiń ózinde is júzinde dáleldenip jatqanyna nazar aýdardy. Belarýs Respýblıkasynyń Prezıdenti A.Lýkashenko Armenııa men Qyrǵyzstannyń eýrazııalyq yqpaldastyq úderisine qosylýyn atap ótti. О́z kezeginde Belarýs kelissózder barysynda qol jet­kizilgen  ýaǵdalastyqtardy tolyq júzege asyrý jolynda júıeli ári mindetti túrde ilgerileýge daıyn. Shartqa qol qoıý – osymen bitti degen sóz emes, ol bizdiń durys qadam jasaǵanymyzdy búkil álemge dáleldeýge tıis bolatyn salıqaly úderistiń bastaýy. Sonymen birge, Eýrazııalyq ekonomıkalyq odaqty qurý jónindegi is-qımyldardyń qatysýshy-memleketterdiń ózara saýdasyna aıtarlyqtaı yqpal etetin máselelerdi sheshýmen baılanysty bolǵany jón, dedi A.Lýkashenko. Sońynda memleket basshylary úsh eldiń jurtshylyq ókilderimen beıresmı áńgime ótkizdi. * * * Eýrazııalyq ekonomıkalyq odaq týraly shartta  halyqaralyq uıymdarǵa tán arqaýlyq aspektiler, memleketterdiń egemendi teńdigi, aýmaqtyq tutastyǵy, sondaı-aq, Odaqqa múshe-memleketterdiń saıa­sı qurylymynyń ereksheligin qurmetteý qaǵıdattary kórinis tapqan. Buǵan qosa, Shart Qazaqstan, Reseı jáne Belarýs azamat­tary­nyń ál-aýqaty men turmys sapasyn arttyrý máselelerin sheshýge baǵyttalǵan jáne taýarlardyń, qyzmetterdiń, kapıtal men ju­mys kúshiniń erkin qozǵalysyn, úılestirilgen ekonomıkalyq saıasat júrgizýdi qarastyrady. Jalpy alǵanda, keleshektegi ıntegrasııalyq tıimdilik 2030 jylǵa qaraı IJО́-niń jıyntyq ósimi 900 mlrd. dollar kóleminde bolatyndyǵymen baǵalanyp otyr. Eýrazııalyq ekonomıkalyq odaq teńdik, negizdilik, júıelilik, prag­matızm jáne ózara tıimdilik qaǵı­dattary negizinde qurylady. О́zekti máseleler talqylanǵan kezdesý Qazaqstan Prezıdenti Nur­sultan Nazarbaev Reseı Federa­sııasynyń Prezıdenti Vladımır Pýtınmen kezdesti. Kelissózder barysynda ındýstrııalandyrý, saýda-ekonomıkalyq jáne mádenı-gýmanıtarlyq salalardaǵy eki­jaqty yntymaqtastyq máseleleri talqylandy, sondaı-aq, halyq­aralyq kún tártibiniń ózekti taqy­ryptary qaraldy. Memleket basshylary qol qoıylǵan Eýrazııalyq ekono­mı­kalyq odaq týraly sharttyń ózekti aspektileri men elderdiń osy birlestik aıasyndaǵy ózara is-qımylynyń negizgi baǵyttary jóninde másele qozǵady. Nursultan Nazarbaev ekono­mıkanyń mańyzdy salalaryn damy­týǵa ıgi yqpalyn tıgizip otyrǵan Qazaqstan men Reseı ara­syndaǵy yntymaqtastyqtyń joǵary qarqynyn atap kórsetti. О́z kezeginde V.Pýtın ekijaqty qarym-qatynastardyń tabysty damyp otyrǵanyna toqtalyp, jo­ǵa­ry tehnologııaly salalardaǵy óza­ra is-qımyldyń meılinshe bel­sen­direk bolý qajettigin atap ótti. * * * Kezdesý qorytyndysy boıynsha Memleket basshylarynyń qatysýymen mynadaı qujattarǵa qol qoıyldy: – Reseı Federasııasy Úkimeti men Qazaqstan Respýblıkasy Úki­meti arasyndaǵy Qazaqstan Res­pýb­lıkasyna munaı jáne munaı ónimderin jetkizý salasyn­daǵy saýda-ekonomıkalyq ynty­maq­tastyq týraly 2010 jylǵy 9 jeltoqsandaǵy kelisimge ózgeris engizý týraly hattama; – Qazaqstan Respýblıkasy aýmaǵynda atom elektr stansasyn salýdaǵy yntymaqtastyq jónindegi ózara túsinistik týraly memorandým; – «Qazatomónerkásip» UAK» AQ pen «Rosatom» MK balama­ly energetıka men sırek jáne sırek kezdesetin jer metaldary óndirisi salasyndaǵy yntymaqtastyqty damytý týraly birlesken málim­demesi; – Atom energııasyn beı­bit maq­satta paıdalaný salasyn­daǵy Qazaqstan-Reseı yntymaq­tas­tyǵynyń keshendi baǵdarlamasy; – Qorasan-1, Aqdala, Ońtústik Ińkaı (4 ýchaske) ken oryndarynda jer qoınaýyn paıdalaný máselelerin retteý jónindegi Jol kartasy. * * * Memleket basshylary Eýra­zııalyq ekonomıkalyq odaq týraly shartqa qol qoıý rásimine arnalǵan saltanatty konsertte boldy. Eýrazııalyq ekonomıkalyq odaqqa múshe-memleketter jáne baqylaýshy elder basshylary «Astana Opera» memlekettik opera jáne balet teatryndaǵy konsertti tamashalady. Memleket basshylaryna usy­nylǵan baǵdarlamaǵa bes eldiń oryndaýshy ónerpazdary qatysty. Álısultan QULANBAI, Jaqsybaı SAMRAT, «Egemen Qazaqstan». Sýretterdi túsirgender S.BONDARENKO, B.OTARBAEV.

Lebizder legi

Iosıf KOBZON, KSRO halyq ártisi: – Búgin men ózimniń ja­symnyń ulǵaıǵan sha­ǵynda Nursultan Nazar­baevtyń osydan 20 jyl buryn arman etken, al búgin júzege asyp otyrǵan tarıhı oqıǵaǵa – Eý­razııalyq odaqty qurý týraly sharttyń qol qoıy­lýyna kýá bolyp otyrmyn. Nursultan Ábish­uly bul istiń júze­ge asýyna birte-birte jetti. Búgin men shart­qa qol qoıylǵannan keıin Prezıdentterdiń júzi­ne zer saldym. Olar qýa­nysh­ty eken. Demek, shartqa qol qoıylýy memleket bas­shy­larynyń kóńi­linde qanaǵat­tan­ǵan­dyq sezimin týdyrǵany anyq. Myrzataı JOLDASBEKOV, qoǵam qaıratkeri: – Bul óte mańyzdy sheshim boldy dep esep­teımin. О́ıtkeni, osynaý ıntegrasııalaný ǵa­sy­rynda bólinip ómir súrý, damý múmkin emes. Onyń ústine, bul odaqtyń qurylýynyń ózi osy ıdeıanyń otany bolyp otyrǵan Qazaqstan je­rin­de, onyń jańa elor­dasy Astana qala­syn­­da júzege asýy da ádilet­ti­lik­tiń bir kórinisi ispetti. Men Qazaqstan, Re­seı, Belarýs elderi­niń azamattaryn osy aı­týly oqıǵamen qut­tyq­taımyn. Jańa Odaq ál-aýqatymyzdy arttyratyny da sózsiz. Elena KÝZMINA, Reseı Ǵylym akademııasy Ekonomıka ınstıtýtynyń sektor meńgerýshisi: – Bizdiń elderimizdiń qaı-qaısysy bolmasyn shıkizat shylaýynda qal­ǵysy kelmeıdi. Biz ózi­miz­diń ekonomıkamyz­dy jańǵyrtqymyz já­­ne birge oty­ryp óner­­­­kásibimizdi órken­det­­ki­miz keledi. Bárimiz birik­ken jaǵ­daıda munyń bizge edáýir jeńilge túsetini anyq. Munyń jaqsy bir my­salyn Qazaqstannan baıqaýǵa bolady. Má­selen, qazirdiń ózinde Qazaqstannyń soltústik oblystarynda birlesken óndiris oryndary ashy­lyp jatyr. Tólegen MUHAMEDJANOV, «Astana Opera» opera jáne balet memlekettik teatrynyń dırektory: Bizdiń Reseımen, Be­larýspen birtutas eko­no­mıkalyq keńistik aıasynda birigýimiz – bul ha­lyqtarymyz úshin zor jetistik. Men bul odaq uzaq merzimge áreket etedi jáne biz úshin jaq­sy nátıjeler beredi dep esepteımin. Sebebi, biriz­dendirilgen, júıege kel­tirilgen tár­tip bıznes úshin jańa kásip­oryndar ashýǵa úlken jeńildikter týǵyzady. Úsh eldiń halqyn osynaý tarıhı oqıǵanyń júzege asýymen quttyqtaımyn. Eńlik NURǴALIEVA, «Eýrazııalyq quqyq qorǵaý ortalyǵy» qoǵamdyq qorynyń prezıdenti: – Odaqta úl­ken múm­kindik bar. Birin­shiden, Qazaq­stan­nyń ekono­mıkalyq áleýe­ti ar­tatyn bolady. Osy arqyly bizdiń azamat­­tary­myzdyń ál-aýqaty da jaqsa­rady. Ekinshiden, birlesken kásiporyndardyń sany burynǵyǵa qaraǵanda áldeqaıda ulǵaıa túspek. О́ıtkeni, odaqqa múshe úsh elde 170 mıllıon adam bar. Osynaý úlken naryq ınvestısııalardy tartýdy, tehnıkalar men tehnologııalardy ákelýdi jedeldete túsedi. Saýytbek ABDRAHMANOV, «Egemen Qazaqstan» RG» AQ prezıdenti: – Bizdiń aldymyzdan baıtaq bazar ashylǵaly otyr. Onyń kólemi qa­zirgi bizdegiden on ese ar­tyq. Aıtalyq, elimiz hal­qynyń sany 17 mln. bolsa, endigi ry­nok­tyń aýma­ǵy 170 mln. bol­maq­shy. Munyń ózi biz­diń kásipkerlerimizge, taýar óndirýshilerge mol múmkindik beredi. Eń bastysy, úsh eldiń basshylary da biraýyzdan bul odaqtyń tek ekono­mıkalyq maqsatta qury­lyp jatqanyn atap ótti. Ekonomıkalyq odaq­tyń el egemendigine esh nuqsan keltirmeıtinin anyq bildirdi. Rozaqul HALMURADOV, Parlament Májilisiniń depýtaty: – 2015 jyldyń 1 qań­tarynan bastap kúshine enetin Eýrazııalyq ekono­mıkalyq odaq týraly shartqa Astanada qol qoıylýy elimizdiń osy Odaqtyń beldi de bedeldi múshesi bolatynyn aıǵaq­taıdy. Osydan 20 jyl buryn aıtylǵan Elbasy Nu