Gvadalaharada Jansel Denız (+73 kılo), Smaıyl Dúısebaı (87 kılo) jáne Rýslan Japarov (+87 kılo) syndy saqa sportshylarǵa úlken úmit artqan edik. Olar osyǵan deıingi birqatar baıraqty básekede tabysty óner kórsetip, jarqyn jeńisterimen qazaq jankúıerlerin qýantqan bolatyn. Biraq jyldyń basty jarysynda jerlesterimiz bilgenderinen jańylyp, senim údesinen shyǵa almady. Sondaı-aq Temirlan Tileýles (54 kılo), Samırhon Ababákirov (58 kılo), Kamran Nuradınov (63 kılo), Almat Qojahmet (68 kılo), Nurqanat Qojahmet (74 kılo), Raqym Ádilhanov (80 kılo), Rıta Bákisheva (46 kılo), Botagóz Qapanova (49 kılo), Ázıza Qaradjanova (53 kılo), Kámıla Aımuqasheva (57 kılo), Jadyra Haırýllına (62 kılo) jáne Nuraı Qusaıynova (67 kılo) da jarty jolǵa jetpeı súrindi.
Atalǵan jarysta Meksıka sportshylarynyń mereıi ústem boldy. 3 altyn, 1 kúmis jáne 2 qola medal oljalaǵan olar jalpykomandalyq esepte kósh bastady. Meksıkalyqtar arasynan Danıela Soýza (48 kılo), Leslı Soltera (67 kılo) jáne Karlos Sansores (+87 kılo) qarsylas shaq keltirmeı, jeńis tuǵyrynyń eń bıik satysyna kóterildi. «Batystyń injý-marjany» atalǵan shaharda Qytaı (2 altyn+3 kúmis+1 qola), Ońtústik Koreıa (2+2+1) jáne Serbııanyń (2+1+2) ánurany eki retten shyrqaldy. Aspanasty eli ókilderi arasynan Lý Zonshı (57 kılo) men Lıan Iýshaıdyń (63 kılo) asyǵy alshysynan tústi. Koreılerdiń qataryndaǵy Kvon-Do Iýn (68 kılo) men Park Vý Hektiń (80 kılo) qarqynyna eshkim shydaı almady. Qart qurlyqtyń órenderi arasynda Nadıka Bozanıch (73 kılo) pen Mehdı Hodabakshıdiń (87 kılo) mereıi ústem boldy. Sondaı-aq bas júlde alǵandardyń qatarynda ıspanııalyq Danıel Kýasada ( 74 kılo), ózbekstandyq Svetlana Osıpova (+73 kılo), horvatııalyq Lena Stoıkovıch (46 kılo), belgııalyq Sara Shaarı (62 kılo), majarstandyq Omar Salım (58 kılo), ıtalııalyq Vıto Dell’Akýıla (54 kılo) jáne amerıkalyq Makaıla Grınfýýd (53 kılo) bar.
Bir aıta keterligi, osy jarysta О́zbekstan quramasy qazaqstandyqtarǵa qaraǵanda áldeqaıda jaqsy óner kórsetti. Altynnan alqa taqqan Svetlana Osıpovadan bólek, Nııaz Pýlatov (63 kılo) kúmis medaldy enshiledi. Al Ferýza Sadyqova (62 kılo) men Nıkıta Rafalovıch (87 kılo) qolaǵa qol sozdy. Osy nátıjeniń arqasynda ózbekter jalpy esepte altynshy orynǵa turaqtady.
1993-2019 jyldar aralyǵynda Qazaqstannyń taekvondoshylary álem chempıonatyna 14 ret qatysty. Sonyń altaýynda ǵana jeńis tuǵyryna kóterilý baqyty buıyrdy. Tarqatyp aıtsaq, 1999 jyly (1 qola), 2003 jyly (1 qola), 2007 jyly (3 qola), 2009 jyly (1 qola), 2017 jyly (1 qola) jáne 2019 jyly (1 qola). Barlyǵy – 8 júlde. Al segiz jarystan qorjynymyz bos qaıtty. Mine, solardyń qataryna kúni keshe ǵana Meksıkada aıaqtalǵan dúbirli doda enip otyr. Bul – otandyq daıan sheberleriniń toǵyzynshy sátsizdigi.
