Sport • 23 Qarasha, 2022

Myqtylar Almatyda anyqtalady

250 ret

kórsetildi

2 mın

oqý úshin

9-11 jáne 16-18 jeltoqsan aralyǵynda Almatydaǵy «Halyq Arenada» short-trekten Álem kýboginiń úshinshi jáne tórtinshi kezeńdik saıystary ótedi. Bul jarysqa 30-dan asa memleketten kelgen 250 sportshy qatysady dep kútilýde. Solardyń qatarynda Olımpııa oıyndary, álem chempıonaty jáne basqa da baıraqty básekelerde atoı salǵan sportshylar bar.

Ǵalym SÚLEIMEN

Kúni keshe ǵana atalǵan jarysta Qazaqstannyń týy astynda kimderdiń óner kórsetetini belgili boldy. Erler arasynda Abzal Ájiǵalıev, Ádil Ǵalıahmetov, Denıs Nıkısha, Nurtilek Qajyǵalı, Erkebulan Shamuhanov jáne Sanjar Janysov el namysyn qorǵasa, áıelder saıysynda Olga Tıhonova, Iаna Han, Mádına Janbosynova, Anastasııa Astrahanseva, Alına Ájiǵalıeva jáne Alıona Volkovıskaıa óner kórsetedi. Olardyń deni – halyqaralyq iri jarystarda júlde alyp júrgen saqa sportshylar. Sol sebepti de biz Alataý baýraıynda ótetin asa jaýapty jarysta óz jerlesterimizden jarqyn jeńister kútemiz.

Esterińizge sala keteıik, Álem kýboginiń alǵashqy kezeńi bıyl Kanadanyń Monreal qalasynda ótti. Úıeńki japyraqtar elinde Qazaqstannyń erler quramasy komandalyq estafetada kúmis medaldy ıelendi. Ekinshi kezeńdi AQSh-tyń Solt-Leık-Sıtı qalasy qabyldady. Ol jerde úsh birdeı órenimiz jeńis tuǵyryna kóterildi. Atap aıtsaq, Abzal Ájiǵalıev (500 metr) pen Denıs Nıkısha (500 metr) kúmis alsa, Ádil Ǵalıahmetov (1000 metr) qola medal ıelendi.

Atalǵan jarystyń besinshi kezeńi 3-5 aqpan aralyǵynda Germanııanyń Drezden qalasynda uıymdastyrylady. Sodan dál bir apta ótken soń Nıderlandtyń Dordreht shaharynda fınaldyq saıystar ótedi. Al 10 naýryzda Ońtústik Koreıanyń astanasynda álem chempıonatynyń jalaýy jelbireıdi.