Búgingi kúni elimizde 89 psıhologııalyq-medısınalyq-pedagogıkalyq konsýltasııa, 208 psıhologııalyq-pedagogıkalyq túzetý kabıneti, 13 ońaltý ortalyǵy jumys isteıdi.
«Oqý-aǵartý mınıstrligi 2025 jylǵa deıin PMPK jelisin 50 000 balaǵa shaqqanda 1 PMPK esebinen 125-ke deıin keńeıtýdi josparlap otyr. PMPK jáne túzetý kabınetteriniń sany jyl saıyn artyp kele jatqanyn atap ótkim keledi. Qaraǵandy, Aqtaý, Shymkent qalalarynda, Mańǵystaý jáne Almaty oblysynda psıhologııalyq-medısınalyq-pedagogıkalyq konsýltasııalar ashyldy. Túzetý kabınetteri men ońaltý ortalyqtarynyń sany da artyp keledi. Sońǵy eki jylda 13 túzetý kabıneti ashyldy. Iаǵnı balalardy arnaıy psıhologııalyq-pedagogıkalyq qoldaýmen qamtý aıtarlyqtaı keńeıip jatyr. Bul balalar múgedektiginiń aldyn alýǵa jáne azaıtýǵa yqpal etedi», dedi QR Oqý-aǵartý mınıstrligi Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń dırektory Áıgerim Kýderınova.
Sonymen qatar elimizde arnaıy bilim beretin uıymdardyń sany da ósti. Balalar jylynda elimizde Taraz, Oral jáne Qaraǵandy qalalarynda aýtızmmen aýyratyn balalarǵa arnalǵan úsh qoldaý ortalyǵy ashyldy.
