Hırýrgtiń kásibı sheberligi

«Áleýmettik medısınalyq saq­tandyrý qory» KeAQ Astana qalasy boıynsha fılıalynyń baspasóz qyzmeti habarlaǵandaı, balanyń ata-anasy aýrýdyń alǵashqy belgilerin náresteniń qatty mazasyzdyǵy men sylbyrlyǵynan, álsizdiginen keıin baıqaǵan. Sonymen qatar náresteniń basynyń úlkeıip, eńbeginiń isingeni baıqalady. Osydan keıin balanyń anasy nevropatologke barady. Ári qaraı dáriger mıdyń neırosonografııasyna jáne KT-ǵa jiberip, onda gıdrosefalııa belgileri, ortasha klınıkalyq dekompensasııa satysynda mıdyń oń jaq qarynshasynyń kólemdi isigi anyqtalady.

Sábıge alǵashqy «Ventrıkýlope­rı­tonealdy shýnttaý» operasııasy Almatydaǵy №2 qalalyq balalar aýrýhanasynda jasaldy. Dárigerler konsılıýmynda ekinshi operasııany Ulttyq neırohırýrgııa ortalyǵynda jasaý josparlanǵan bolatyn.

Balalar neırohırýrgııasy bólim­shesiniń meńgerýshisi Ǵabıt О́leńbaı operasııanyń kúrdeliligi, osy jas­ta­ǵy bala úshin isiktiń jetkilikti dá­rejede úlken (4*3 sm) jáne fýnk­sıo­naldy mańyzdy aımaqta bol­ǵan­dyǵynda ekenin jetkizdi. So­ny­men qatar operasııa kezinde qan joǵal­tý qaýpi joǵary, sońy aýyr as­qynýlarǵa, tipti ólimge deıin aparýy múmkin boldy. Isik týa bitken já­ne náreste qursaqta jatqanda paı­­d­a bolǵan. Bul – sırek kezdesetin qubylys. 

«Biz mıkrohırýrgııalyq aralasý júrgizdik, oń jaq qarynshanyń artqy múıiziniń qarynshaishilik isigin alyp tastadyq. Bul jerde barlyq zamanaýı ádis qoldanyldy. Sondaı-aq qyzmetkerlerdiń joǵary biliktiligi men bizdiń Ortalyqtyń operasııa bloginiń zamanaýı jab­dyq­ta­lýy operasııanyń sátti aıaqta­lýynda mańyzdy ról atqardy. Neırohırýrgııalyq navıgasııalyq júıeniń baqylaýymen isikke asa dáldikpen shyǵyp, ony tolyǵymen alyp tastadyq», dedi neırohırýrg dáriger Ǵabıt Ilııasuly.

Anestezıolog dárigerlerdiń de joǵary kásibı deńgeıin atap ótken jón. Mundaı kishkentaı jasta operasııa árdaıym anestezııa berýdiń úlken qıyndyqtarymen qatar jú­redi. Qan aınalymy men tynys alýdy muqııat baqylaý, anestezııany óte muqııat esepteý – balanyń ómiri úshin úlken jaýapkershilik. Osynyń bári Neırohırýrgııa ortalyǵynyń kópsalaly komandasynyń moınyna tústi.

Operasııany joǵary sanatty bilikti neırohırýrg-dáriger, Balalar neırohırýrgııasy bólim­shesiniń meńgerýshisi, «UǴO» AQ professory Ǵabıt О́leńbaı men neırohırýrg-dáriger Saparbek Seıt­bekov jasady. Sondaı-aq ope­ra­sııa barysynda anestezıolog-reanımatolog dáriger Aıgúl Jan­deldınova, transfýzıolog dáriger Erbol Qýanyshev jáne operasııa meıirgeri Mádına Rahmatýllaqyzy qatysty.