Turaqty birinshiliktegi keıingi tórt oıynyn óz aıdynynda ótkizgen Andreı Skabelka shákirtteri sonyń tek bireýinde ǵana jeńiske jetip, úsh matchta qarsylastaryna jol berdi. Buǵan deıin «Amýr» men «Ak Barstan» ońbaı utylǵan jerlesterimiz sońǵy básekesinde «Spartakty» jeńe almady. «Barys» úshin bul kezdesý sátti bastalǵan edi. Birinshi kezeńniń jetinshi mınýtynda Nıkıta Mıhaılıs mergendigimen kózge túsip, «Barysty» esepte alǵa shyǵardy. Alaıda arada 11-mınýt ótkende qonaqtar san basymdyǵyn tıimdi paıdalanyp, tarazy basyn teńestirip ketti. Goldyń avtory – Sheın Prıns.
Úzilisten keıin de qonaqtardyń alǵashqy bestigi «Barys» qaqpasynyń mańaıynda biraz qaýipti shabýyl uıymdastyrdy. Nátıjesinde, Prıns qatarynan eki márte Iýlıýs Gýdachektiń qaqpasynan sańylaý taýyp, tablodaǵy kórsetkishti 3:1-ge jetkizdi. Al úshinshi kezeńniń alǵashqy mınýtynda máskeýlikterden Aleksandr Hohlachıov oıynnyń núktesin qoıdy – 4:1.
«Barys» kelesi oıynyn búgin Ekaterınbýrgte jergilikti «Avtomobılıstpen» ótkizedi.
