Fransııa quramasy óz tarıhynda tuńǵysh ret álem chempıonattarynda qatarynan alty oıynda jeńiske jetti. Buǵan deıin olar 2018 jyly Reseıde ótken jarystyń pleı-off saıystarynda Argentına (4;3), Ýrýgvaı (2:0), Belgııa (1:0) jáne Horvatııany (4:2) esebimen utqan edi. Al Qatardaǵy dodanyń alǵashqy eki týrynda fransýzdar Aýstralııa (4:1) men Danııadan (2:1) basym tústi. 2010 jyly Ispanııanyń fýtbolshylary da dál osyndaı kórsetkishke qol jetkizgen edi.
Argentına men Meksıka arasyndaǵy básekeniń 64-mınýtynda Lıonel Messı esep ashty. Osylaısha, ol Argentınanyń aty ańyzǵa aınalǵan fýtbolshysy Dıego Maradonamen teńesti. Ulttyq qurama sapynda ekeýi de segiz goldan soqty. Biraq Messı áli de Gabrıel Batıstýtaǵa jete alǵan joq. «Batıgol» degen janama esimge ıe bolǵan ataqty shabýylshy 10 ret mergendik tanytqan edi.
Saýd Arabııasynyń «Ál-Nasr» klýby Portýgalııa quramasynyń eń úzdik oıynshysy Krıshtıaný Ronaldýdy óz qatarynan kórgisi keledi. CBS Sports agenttiginiń habarlaýynsha, atalǵan komandanyń qojaıyndary Ronaldýǵa úsh jylda 216 mıllıon eýro shamasynda jalaqy tóleýge daıar.
Ispanııa men Germanııa arasyndaǵy kezdesý 1:1 esebimen aıaqtalǵany belgili. Bul matchta nemisterdiń qaqpasyn Manýel Noıer qorǵady. Bul – 36 jastaǵy Noıerdiń álem chempıonatynda 18-ret jasyl alańǵa shyǵýy. Sóıtip, ol óziniń otandasy Zepp Maıer men brazılııalyq Klaýdıo Taffareldiń kórsetkishin qaıtalady.
