Komandalyq álem chempıonatynyń fınalyna shyǵý úshin jerlesterimiz álemdik reıtıngte 21-orynda turǵan Chılı quramasymen kezdesedi. Match 4-5 aqpan kúnderi Chılıde ótedi dep josparlanǵan. Devıs kýboginiń irikteý matchtary tórt jekeleı jáne bir juptyq kezdesýden turady. Ár matchta úzdik shyqqan 12 komanda týrnırdiń fınaldyq kezeńine joldama alady. Olarǵa 2022 jylǵy Devıs kýboginiń fınalısteri, sondaı-aq arnaıy shaqyrtý (wild card) alǵan Italııa men Ispanııa qosylady. Bıylǵy Devıs kýboginde Kanada quramasy jeńimpaz atandy. «Úıeńki japyraqtar eliniń» ókilderi fınalda Aýstralııadan basym tústi.
Sondaı-aq Italııadaǵy chellendjer týrnıriniń fınalynda óner kórsetken qazaqstandyq Mıhaıl Kýkýshkın bas júldeni ıelene almady. Jerlesimiz fınalda álemniń 197-raketkasy shveısarııalyq Leandro Reıdlmen kortqa shyǵyp, eki sette – 7:6, 6:3 esebimen jeńilip qaldy. Tartysty órbigen birinshi partııada 20 jastaǵy shveısarııalyq sportshy taı-breıkte ábjildik tanytty – 7:6 (7:4). Ol ekinshi sette de 2:0 esebimen alǵa ketip, sol basymdyǵyn saqtap qaldy – 6:3.
