Sonymen keleshek urpaqtyń densaýlyǵyn saqtaýǵa baǵyttalǵan bastamalardyń qaı-qaısysy qoldaý men nazar aýdarýdy qajet etetindikten, Almaty qalasyndaǵy №52 jalpy bilim beretin mektepte bas aspazben birge ótken sheberlik sabaǵyna keldik. Bul joly «Salaýatty tamaqtaný mektebi» bilim berý baǵdarlamasy aıasynda ótken dáriske 3-synyp oqýshylary ata-analarymen birge qatysty.
Aıtqandaı, is-sharaǵa 2030 jylǵa deıin dúnıejúzindegi 50 mıllıonǵa deıin balany durys tamaqtanýǵa daǵdylandyrýǵa bastamashy bolyp otyrǵan «Nestle Qazaqstan» men Almaty qalalyq Bilim berýdegi jańa tehnologııalar ǵylymı-ádistemelik ortalyǵy uıytqy boldy.
Almaty qalalyq bilim basqarmasynyń Bilim berýdegi jańa tehnologııalar qalalyq ǵylymı-ádistemelik ortalyǵynyń bólim basshysy Tatıana Ejova balalardyń durys tamaqtanýǵa ádettendirý týraly aıta kele: «Baǵdarlama barynsha jeńil bolǵandyqtan, balalar negizgi qorektik zattar, paıdaly taǵamdar, dárýmender, dıeta qurý negizderin bilýge yqylaspen umtylady», deıdi.
Al «Nestle» bilim berý baǵdarlamalary bóliminiń basshysy, pedagogıka ǵylymdarynyń kandıdaty Aleksandra Makeeva «Salaýatty tamaqtaný mektebi» bilim berý baǵdarlamasy óziniń 10 jyldyǵyna qadam basyp kele jatqanyna toqtala kele: «Osy aýqymdy jobanyń aıasynda taǵy bir qosymsha bastamany qolǵa aldyq. Balalar konkýrs aıasynda sabaqtan tys ýaqytta mektepte nemese úıde bas aspazdar júrgizgen onlaın sheberlik-dáristeri arqyly densaýlyqqa paıdaly taǵamdar ázirlep, arnaıy platformaǵa ornalastyrady. Birinshiden, bul taǵamdardyń daıyndalýy óte qarapaıym, ekinshiden óte paıdaly, úshinshiden dámdi ári kóńildi. Kýlınarlyq baıqaý baǵdarlamanyń dástúrli formatyna aınaldy. Keıin balalarǵa ómir boıy qajet bolatyn oıyn túrindegi konkýrs jeltoqsan aıynda aıaqtalady. Árıne, jeńimpazdar marapattalady. Eń qyzyǵy, baǵdarlamaǵa tartylǵan oqýshylar úıde áke-sheshelerin durys tamaqtana bilýge úıretedi eken», deıdi.
№52 jalpy bilim beretin mekteptiń bastaýysh synyp muǵalimi Ramıla Tenesheva: «Mektebimizdiń jobaǵa alǵashqylardyń biri bolyp qosylǵanyn maqtan tutamyz. Ásirese, biz úshin óte mańyzdy jetistik – mektep pen otbasynyń baılanysyn atap ótkim keledi. Ata-analar baǵdarlama mańyzdylyǵyn joǵary baǵalaıdy. Tipti osynyń arqasynda úıdegi ádetterin paıdaly jaǵyna ózgertkenderin moıyndady», deıdi.
Sonymen qazan aıynan beri Astana men Almaty qalalarynyń mektepterinde Bilim berýdegi jańa tehnologııalar ǵylymı-ádistemelik ortalyǵynyń qoldaýymen, bastaýysh synyp oqýshylaryna arnalǵan aspazdyq sheberlik baıqaýlary júrip jatqanyn aıta keteıik. Degenmen, bul jerdegi basty oqıǵa – baıqaý emes, keler urpaqtyń densaýlyǵy.
