Eýrazııalyq ekonomıkalyq odaq aıasynda alyp kásiporyn jumysy jandanbaq

ASTANA. 3 maýsym. Túrli qıyndyqtar kezdesse de jumysyn qojyratpaǵan Qostanaı oblysyndaǵy  «Sokolov-Sarybaı» kombınaty endi Eýrazııalyq ekonomıkalyq odaq aıasynda eńbek ónimdiligin arttyra túspek. Bul týraly «24kz» habarlady. «Sokolov-Sarybaı» birlestigi jylyna shamamen 16 mln. tonna temir keni shıkizatyn jáne daıyn temir jentekterin óndiredi. Sonyń basym bóligi Reseı men Qytaıǵa eksporttalady. Degenmen, álemdik daǵdarysqa baılanysty keıingi ýaqytta syrtqa satylatyn ónim birshama kemigen. Alaıda, Eýrazııalyq ekonomıkalyq odaqtyń qurylýy bul olqylyqtyń orynyn toltyratynyna senim mol. «Sokolov-Sarybaı» aksıonerlik qoǵamynyń prezıdenti Muhamedjan Turdahýnov: «Memleket basshysynyń tapsyrmasy boıynsha biz eýrazııalyq ıntegrasııanyń mán-mańyzyn halyqqa túsindirip, jetkizýimiz qajet. Bul elimizdiń, bizdiń kásiporynnyń, jalpy ónerkásip salasynyń damýyna serpin beredi. Negizgi tutynýshymyz Magnıtogorsk metallýrgııalyq kombınatymen baılanymyz nyǵaıa túsetin boldy. Biz úshin Reseı naryǵyna keń jol ashylady. Qazir kásiporyn ken óndirý oryndaryn keńeıtýdi kózdep otyr. Ásirese, temir shıkizatynyń sapaly jáne baı qory bar «Qashar» kenish ornyna úlken mańyz berilýde. «Sokolov-Sarybaı» birlestigine qarasty «Qashar» kenishiniń qory bir ǵasyrǵa jetedi. Qazirgi onyń tereńdigi – 420 metr. Joba boıynsha 800 metrge deıin qazylady. Bul kenish orynyna temirjol vagondary jáne aýyr júk kólikteri tartylǵan. Bolashaqta konveıermen ken shyǵarý júıesi iske qosylmaq. Kenish orynyndaǵy tehnıkalardyń barlyǵy jańa. Jaqynda taý-ken jumysyna arnalǵan Hitachi ekskavtorlary alyndy. Álemde mundaı tehnıkalar sanaýly. 180 tonnalyq alyp júk mashınasy qatary taıaýda 12 kólikke tolyqty», – dedi. Qazirgi tańda «Sokolov-Sarybaı» birlestiginiń jumysshylary Eýrazııalyq ekonomıkalyq odaq aıasynda kóptegen ıgilikterge qol jetkiziletin boldy dep sanaıdy. Joldybaı Bazar. Derekkóz: «24kz». Foto: kostanay.kz.