Qasym Máýlenov: Cyrbaıdyń uly ekenimdi maqtan etemin

– Syrbaı Máýlenov balalaryna arnaǵan bir óleńinde «Meniń jeti balam bar, Jeti arqa tirer asqarym bar, Meniń jeti dalam bar, Meniń jeti aspanym bar», dep jyrlaǵan. Endi aqynnyń ómirin jalǵaǵan sol jeti balasy týraly bilgimiz keledi?

– Biz – jeti aǵaıyndymyz, úlkenimiz – Dúısen kezinde eli­mizdiń Qarjy jáne jergilik­ti ónerkásip mınıstrlikterinde aby­roıly qyzmet atqardy. Odan keıingi aǵam Jeńistiń mamandyǵy ınjener. О́kinishke qaraı, osy eki aǵam da ómirden ótip ketti. 2014 jyly zań ǵylymdarynyń doktory, professor, polısııa polkovnıgi, tanymal krımınolog, otbasymyzdyń kenjesi Ǵazız inimnen aıyryldyq. Qa­zir tórteýmiz ǵana qaldyq. Aǵam Beıbit te kezinde Qazaq KSR-niń memlekettik bas josparlaý ko­mıtetinde eńbek etti. Búginde bız­nespen aınalysady. Úlken apam Baqytjamal da Bas jos­parlaý komıteti men Prezıdent apparatynda istedi. Sodan keıin­gi Saqypjamal ápkem ekonomıka ǵylymdarynyń kandıdaty, professor. Qazir jeteýmizden taraǵan áke-sheshemizdiń nemere­leri men shóbereleri de úlken áýletke aınaldy. Onyń esimi osy urpaqtarymen máńgi jasaıdy dep senemin.

– Ákeńizdiń otbasyndaǵy orny men tálim-tárıbesine toq­talsańyz?

– Ákem qarapaıym, minezi jumsaq, jaıly adam bolatyn. Balalaryn bázbireýlerdeı «óti­rik» jaqsy kórgen emes. Ja­san­­dylyqty unatpaıtyn. Bizge de­gen meıirimi erekshe edi. «Biz­­diń áýletten bir akade­mık shy­ǵar ma eken, osy», deıtini bar-tuǵyn. Sondaıda anam: «Nesi bar, aqyn bar, endi akademık te bo­lar», dep aıtatyn. Beı­bit aǵam ómir­ge kelgende ákem: «Tór aldynda ornym daıyn ba dep, jas Máýlenov keledi esik ashyp», dep «Máýlenovter kele jatyr» atty óleńin jazypty. Qysqasy, biz oǵan shabyt syılap, qanattandyrdyq. Tósek tartyp jatqanynda da: «Ajal shirkin berse de bir kún eles, Maǵan batyp kelýi múmkin emes. Jeti júrek ólýi múmkin emes, Jeti janar sónýi múmkin emes», dep rýhyn túsirgen emes. Baıqaýymyzsha, balalaryna ar­nalǵan súıispenshiliginen aǵyl-tegil jyr týatyn.

Ákem bizge barlyq adamǵa qaıyrymdy bolyp, qamyqqan jan­ǵa qamqorlyq tanytýdy úı­retti. Sondaı-aq jastarǵa jyly sóılep, olardy kóter­melep otyratyn. Onyń boıy­myzǵa sińirgen adamı asyl qasıet­teri ómirimizdi áli kúnge deıin nurlandy­ryp keledi. Otan, ult, el sekildi ula­ǵatty uǵym­dardy bárinen bıik ustady. Qalam­dastary bas qos­qan­da olardy kúlkige kómip, aına­lasyna shýaq shashyp júretin.

– Shyǵarmashylyqpen qaı kezde aınalysýshy edi?

– Ol kisi bir orynda otyryp daǵdylanbaǵan adam edi. Uzaq oılanyp júredi de bir kúni aqtarylyp jazyp tastaıdy. Ondaı sátterde tordaǵy arys­tan­daı teńselip, úıdi jalǵyz ózi toltyryp otyratyn. Sol kezde óleń taýdan aqqan tas bulaq­taı tógiledi. О́lendi ekpinde­tip, tasqyndatyp oqıtyn. «Qazaq ádebıeti» gazetinde Álııa degen mashınıstka istedi, sony sha­qy­ryp dıktovka jasaıtyn. Men ol kezde 6-7 jastaǵy balamyn. Úıdegilerdiń bári meni qyzyq kórip sóıletedi. Álııa apaıdyń tóbesi anadaıdan kóringen­nen «raz, dva, zapıataıa apaı kele jatyr» dep aldynan júgirip shyǵamyn. Shyǵarmashylyqpen tynymsyz aınalysty. Keıde jazǵan óleńi unamasa jyrtyp tastaıtyn. Anam sol jyrtylǵan qaǵazdy jınap alyp, ony erinbeı bir-birine jelimdep, biraz kúnder ótkesin ákeme kórsetedi. Shyn máninde, ákem óleńderiniń alǵashqy synshysy anam boldy. Onyń shesheme túnde jazǵan óleńin oqyp otyrǵanyn bala kúnimizde talaı kórdik. Biz osyndaı bir-birin qadirlep, aıalaǵan ata-ananyń meıirimine qanyp óstik.

– Syraǵań týraly este­lik­terde onyń kópshil, aqjar­qyn, ázilqoı bolǵandyǵy baıan­dalady. Ákeńizdiń aralasqan ortasy men jaqyn dostary jaıynda aıtsańyz?

 –Ata-anamyz Almatyǵa 1953 jyly kóship kelgen. Ol kezde bizdiń otbasymyzda bes balamen birge Almagúl ájemiz turǵan. Bas-aıaǵy segiz adamǵa tirshiligi qaınaǵan qaladan bas­pana ońaı bolmaıdy. Biraq alǵan beti­nen qaıtpaı­tyn anam Nıkolsk bazary ma­ńyndaǵy burynǵy Mech­nıkov kóshesinde ornalasqan jer úıdiń jertólesinen oryn tabady. Úıdiń ıesi Katıa esimdi apaı. Biz osynda on jylǵa jýyq tur­dyq. 1955 jyly sol jertólede men ómirge kelsem, 1958 jyly kenje inim Ǵazız dúnıe esigin ashty. Buryn munda sazger Ábilahat Espaev turǵan kórinedi. Esim endi kire bastaǵannan kóz aldymda qandaı oqıǵalar qaldy degende, ár aptanyń sońyna qa­raı, ıaǵnı juma saıyn ákem­niń dostary – Muzafar Álim­baev, Ádı Sháripov, Juban Mol­daǵalıev, Ábý Sársenbaev, Qýan­dyq Shańǵytbaev, Sadyq­bek Adambekov, Balǵabek Qydyr­bekuly, Ǵabbas Jumabaev, Safýan Sháımerdenov, Qasym Toǵy­zaqov, Serik Qırabaev, Muqa­ǵalı Maqataev, Jumeken Nájimedenov, Qabdykárim Ydy­rysov, Ǵafý Qaıyrbekov, Járdem Tilekov, Ánýar Álim­janov, Tumanbaı Moldaǵalıev, Sherhan Murtaza jáne taǵy bas­qa qalamgerler bizdiń úıge qo­naqqa keledi. Tipti keıbiri dúı­senbige deıin qonyp qalady. Anam olardyń jeıdesin jýyp, aıaq kıimin tazalap, al biz shalbaryn útiktep, dúısenbide jumysqa shyǵaryp salamyz. Anamnyń jaıǵan dastarqany­nan dám tatqan osy aqyn-jazý­shylardyń kóbi keıin qazaq áde­bıetiniń klassıkterine aınaldy. Ol Torǵaı óńirinen ózinen keıin shyqqan jas qalamgerler­ge janashyr boldy. Týǵan jeri de Syraǵań dep tóbesine kóte­rip, qadir tutty. Tirlikte dú­nıe emes, dos jınap, ómirdiń ólshemi men qadirin dostyqpen baǵalady. Sonyń arqasynda úıi­mizden halqymyzdyń jaqsy-jaı­sańdary úzilgen emes. So­lardyń qoldaryna sý quıyp ós­tik. Odan jaman bolǵanymyz joq. Biz úshin bul ónege, taǵylym mektebi boldy. Budan asqan ýnıversıtet joq der edim. Qazaqtyń tuǵyrly tulǵalarynyń batasyn alǵanymyzdy maqtanysh kóremin. Búginde ákemiz jaqqan otty óshirmeı kele jatqanymyz solardyń sharapaty dep oılaımyn.

– Tuǵyrly tulǵanyń shy­ǵarmashylyqpen alańsyz aınalysýyna anańyz úlken úles qosty. Ol kisi de tekti jerden shyqqany málim.

– Durys aıtasyz. Ákem óleń jazýdan basqa úıdiń tirshiligine qol ushyn tıgizgen emes. Barly­ǵyn mamamyz atqardy. Anamyz Kúljamal ákemmen tanysqanda Qostanaıdaǵy Y.Altynsarın atyndaǵy mekteptiń 10-synybynda oqıtyn on jeti jas­taǵy qyz, papam Qostanaı oblystyq gazetiniń Fedorov aýda­nyndaǵy menshikti tilshisi bolypty. Ekeýi kóńil jarastyryp 1941 jyly shańyraq kóteredi. Kelesi jyly úıdiń tuńǵyshy Dúısen ómirge keldi. Sol jyly óz erkimen su­ranyp maıdanǵa attandy. Ákem qandaı qıyndyq kórse de ony mamamyz únemi qoldap otyr­dy. Ol ult ustazy Ahmet Baı­tur­synulynyń týǵan aǵasy Qalı­dyń uly Ámirdiń qyzy. Osy úshin ótken ǵasyrdyń 40-shy jylda­­ry ákemdi qaýipsizdik komıteti­niń qyzmetkerleri «halyq jaýy­nyń kúıeý balasy», degen jala jaýyp,­ biraz ábigerge salady. Báribir ol kisi óz ustanymynan aınymaıdy. О́ıtkeni onyń anama degen mahabbaty, qurmeti erekshe edi. Olar bir-birin óte jaqsy kórdi. Bala kúnimde ákem­nen atamyz Taı týraly kóp su­raı­tynmyn. Al sheshemniń ákesi, týǵan-týysy ja­ıynda ot­ba­symyzda artyq áńgime aıtyl­maı­tyn. Jabyq taqyryp sanal­dy. Naǵashy atam Ámir 1929 jyly Qostanaı okrýgindegi kó­teriliske qatysqany úshin túr­mege jabylǵan. Atamnyń odan keıingi taǵdyry qalaı bol­dy eken degen suraq meni jıi mazalady. Ámir Qalıevtiń aqtal­ǵandyǵyn rastaıtyn, 1997 jyl­dyń 29 qazanynda móri basylyp, bizdiń qolymyzǵa tıgen resmı qujatta onyń 1941 jyldyń 8 qa­rashasynda qamaýǵa alynǵa­ny, 1942 jyldyń 9 jeltoqsa­nyn­da KSRO-nyń NKVD janyn­daǵy erekshe keńes sheshimi boıyn­sha Qylmystyq kodekstiń 58-baby, 10-tarmaqshasymen eńbekpen túzeý lagerine (ITL) 10 jylǵa aıdalǵany, al 1943 jyldyń 16 mamyrynda NKVD-nyń Ivdelsk lagerine (Sverdlovsk oblysy) jer aýdarylǵany týraly ja­zylǵan. Biraq atam jazasy­nyń qysqartylǵanyn bilmesten, temir tordyń arǵy jaǵynda, ıaǵnı 1945 jyldyń 3 qańtarynda qaıtys boldy. Ámir atamyz qa­tysqan Qostanaı dalasyndaǵy kóterilis sol dáýirdegi keńes ókimetine baǵynǵysy kelmegen qazaqtyń rýhyn kórsetse kerek. Bul kóterilis Alash ardaqtysy Ahmet Baıtursynulynyń esi­mimen de tyǵyz baılanysty. 1934 jyly anamdy ata-anasy Qos­tanaıdan Almatyǵa jibe­redi. Sóıtip, sheshem 1937 jylǵa deıin Ahmet atamyzdyń qolynda turady. Syrqat Ahmet pen onyń zaıyby Badrısafanyń janynda bolyp, ekeýine kútim jasaıdy. Sheshem bala da bolsa sol kez­de­gi NKVD jendetteriniń ult us­tazynyń úıine jıi-jıi tintý júr­gizgenin keıin aıtyp otyratyn.

Anam barlyq sanaly ǵumyry men júreginiń jylýyn ákem men balalaryna ǵana arnady. Ol kisi ákemmen otasqan 52 jyl ishinde tek qana qurmet kórdi deı alamyn. Ákemniń arqasynda baspaǵan taýy, barmaǵan jeri joq. Anamnyń dastarqanynan qazaqtyń aqyn-jazýshylary ǵana emes, S.Noravchatov, S.Mıhalkov, N.Tıhonov, V.Kojevnıkov, G.Nekrasov, M.Kárim, S.Qudash, B.Kerbabaev, M.Tursynzade, D.Kýgýltınov sekildi sol kez­degi odaqqa tanymal ádebıet alyp­tary da dám tatty.

Jalpy, talantty adamdar ómir­­de qarapaıym, usaq-túıek­pen isi joq, pendeshilikten bıik turady. Sharýaǵa da onsha qyry bolmaıdy. Ákem dál sondaı edi. О́miri gazǵa ot jaǵyp, sháınek qo­ıyp kórmegen. Dúkenge de baryp, ózine bir kıim satyp almaǵan. Sonyń bárin sheshemiz istedi. Ony kúndelikti kúıbeń tirshilikke aralastyrǵan joq. Kórnekti jazýshy Sábıt Muqanovtyń úıindegi Márııam ájemiz kózi tirisinde anam týraly: «Kúljamal týraly aıtsam, júregim nurǵa tolyp ketedi. Ol áıeldiń áıeli ǵoı. Áıeldiń jaqsylyǵy – erkek­tiń baǵy. Eń aldymen sol baq ot­basynda ornaýy kerek. Otba­syńnyń ómiri qalpynda bolmasa, meıli sen patsha bolsań da eshqashan baǵyń janbaıdy. Kim ólmeıdi deısiz. Biraq sonyń ornyn ustap otyratyn ormannyń ıesiniń bári Kúljamaldaı bolsaıshy. Sol úshin de Kúljamalǵa alǵysym sheksiz», dep aıtqan sózinen anamyzdyń qandaı jan bolǵandyǵyn bilesiz.

– Aqyn poezııasynda soǵys taqyryby keńirek qamtylǵan. Ákeńizben maıdandaǵy kúnderi týraly áńgimelestińiz be?

– Ol kisiniń ómiri jeńil bol­dy deı almaımyn. Túrli qıyndyqty basynan ótkerdi. Onyń zamandastarynyń jas­ty­ǵyn soǵys jalyny sharpydy. Biraq soǵys týraly syr ashpaı­tyn. Ofıserlik kýrstan ót­ken soń ony saıası nusqaýshy she­nimen Volhov maıdanyna, qorshaýda qalǵan Lenıngradty azat etýge jiberedi. Ákemniń shy­­ǵarmashylyǵynda maıdan lı­rı­kasy eń aldyńǵy oryndarda turdy. Onyń birqatar poemalary sol soǵys dalasynda, naqtyraq aıtsaq, Lenıngrad túbindegi Sınıavın maıdanynda jazyldy. 1987 jyly Sverdlovsk qalasyna (qazirgi Ekaterınbýrg) kandıdattyq dıssertasııamdy qor­­­ǵaýǵa bara jatqanymda: «Múm­kindik bolsa Aq ózenge barýǵa ýaqyt tap, naq sol ózen­niń bo­ıyn­da bizdiń bólimshe qu­ryl­ǵan», degeni bar-dy.

Ákem Volhov maıdanynda soǵysyp, Lenıngradty qorǵaý­ǵa atsalysty. Atqyshtar rotasy komandıriniń orynbasary, ke­ıinirek saıası jetekshi qyz­metin atqardy. Urys kezinde qat­ty ja­raqattanǵan. Birde onyń ar­hıvinen 1942 jyldyń 22 qazany dep kórsetilgen hat taýyp aldym. Maıdanda júrgende keńes ádebıetiniń klassıgi Nıkolaı Tıhonovqa hat jazypty. Sol hatqa kelgen jaýap eken. «Men jap-jas qazaqtyń aqyny qo­lyna qarý alyp, bizdiń súıikti Lenıngradty qorǵap júrgenine qýanyshtymyn. Biz sizbenen áli-aq qorshaýdan bosatylǵan qa­lada kezdesip, fashızmmen bolǵan soǵys týraly ótken shaqta áńgimelep, óleń oqyp otyratyn bolamyz», – depti Nıkolaı Tıhonov.

Ákem sol bir japyraq qa­ǵazdy soǵys jyldary tós qal­tasynan tastamapty. Osy tildeı hat ofıserdiń jaýǵa qarsy kúsh-qaı­ratyn eselep, yntasyn qaı­raǵan sekildi. Keýdesin qýanysh kernegen ákem klassıkten kelgen hatty batalon komıssary Aleksandr Lıýbımovqa kórsetedi. О́ziniń aıtýynsha, sonda komıssar qatty qýanypty.

Ol 1949 jyly Máskeýde Nıkolaı Tıhonovpen júzdesedi. Soǵys aıaqtalǵasyn Máskeýde qazaq ádebıeti men óneriniń apta­lyǵy ótedi. Oǵan elimizden Muh­tar Áýezov, Sábıt Muqanov, Ǵabıt Músirepov, Ǵabıden Mus­tafın jáne jas aqyn Syrbaı Máýlenov bastaǵan aqyn-ja­zý­shy­lar delegasııasy barady. Más­keý bizdiń zııaly qaýym ókil­derin jyly qarsy alady. Olar­men birge únemi Leonıd Sobo­lev, Nıkolaı Tıhonov, Ser­geı Shıpachev, Platon Vershı­gora bolady. Ádebıet pen óner aptalyǵynyń bir kúninde qa­lam­gerler teplohodpen serýen­ge shyǵady. Arqaly óner adam­dary ózara áńgime-dúken qu­ryp, shabyttana óleń oqyp, shyǵar­mashylyq sáttiń kórigin qyz­dyrady. Ákem Muhtar Áýezov pen Sábıt Muqanovtyń janynda otyrǵan Nıkolaı Tıhonovtyń qasyna barýǵa birazǵa deıin batyly jetpeı, aqyry jaqyndap baryp, ózin baıaǵy hat jazǵan soldatpyn dep tanystyryp, maıdan hatyn usynady.

– Tiri ekensiń ǵoı, soldat! – degen Nıkolaı Tıhonov ornynan turyp, qýanyshtan ushqyn atqan janaryn kópke buryp, álgi hatty bárine kórsetedi. – Sen úshin qýanyshtymyn! Sondaı ot-sýdy keship ótip, búgingi kún­ge aman-esen jetkeniń úshin qýanysh­tymyn! Jáne myna hatty da saqtapsyń.

Tıhonov sál únsiz qalyp, sosyn:

– Hatymdy sonsha ýaqyt kó­zińniń qarashyǵyndaı saqtaǵan ekensiń, ózińe qaıtaraıyn. Meniń ózińe degen syılyǵymdy da qosa al, – dep sol jyly jaryq kórgen «Grýzın kóktemi» atty kitabyn syılaǵan.

– Ákeńizdiń qandaı asyl qasıetterin jıi esińizge alasyz?

– Men ákemmen óte rýha­nı jaqyn boldym. Ol meni Qazaq­stannyń halyq jazýshysynyń kó­mekshisi dep ataıtyn. Soǵystan al­ǵan jaraqatynan sol qoly múlde jaramsyz bolatyn. Son­dyqtan segiz jasymnan bastap saqalyn qyryp berdim. Keıde ázildep meni «sevılskıı sırıýlnık» dep te aıtatyn. Ol maǵan kez kelgen oıdy qaǵazǵa shashyratpaı ádemi túsire bilýdi úıretti. Ýnıversıtette alǵash sabaq bere bastaǵanda tarıhqa qatysty, maǵan qajet derekterdi izdestirip, ádebı málimetter men siltemelerdi taýyp berip otyrdy. Birde «seniń kandıdat­tyq dıssertasııań qansha betten turady» dep surady. 195 bet ekenin aıttym. Sonda ázildep: «Sen 195 betti kitaphanada oty­­ryp, ǵylymı kitaptar men áde­bıetterdiń kómegimen úsh jyl jazasyń, al men eshteńesi joq taza ústeldiń ústinde oty­ryp-aq bir kúnde 25-30 bet ja­zyp tastaımyn», – degen-di jyly jymıyp. Árıne, ol me­niń kez kelgen ǵyly­mı ju­mysyma, ǵylym jolynda­ǵy je­tis­tikterime qýanatyn. Ekeý­miz Brıtan kitaphanasy týraly ­jıi áńgimelesetinbiz. Sonyń áseri­men birde Londonǵa barǵa­­nym­da aldymen áıgili kitaphana­ǵa jazyldym. Ondaǵy ótken bir aı merzim ishinde ákem ylǵı janymda menimen birge qolǵa alǵan kitaptarymnyń bárin paraqtap otyrǵandaı áserde júrdim. Ol – Baırondy, Geteni, Shıller men Mıskevıchti, Pýshkın men Ler­montovty, Nekrasov pen basqa da álemdik deńgeıdegi klassıkterdi ana tilimizge móldiretip aýdardy. Búginde Syrbaı Máýlenovtiń kitaptary AQSh Kongresi men Brıtan kitaphanalarynyń sóre­sinde tur. Ákemniń ómirden ótke­nine otyz jyl bolsa da onymen ja­nymnyń egiz bolǵandyǵy son­shalyq, áli kúnge eske alyp, kó­zime jas alamyn. Bir sózben aıt­qanda, qazaqtyń aqyny Syr­baıdyń uly ekenimdi maqtan etemin!

– Bıylǵy halqymyzdyń bir­týar perzentiniń 100 jyl­dyq mereıtoıy aıasynda ótken mazmundy is-sharalardy aıta ketseńiz?

– Ákem 1993 jyly dúnıe­den ozdy. Onyń barlyq ádebı murasyna anam bas-kóz boldy. Tuǵyrly tulǵa esimin el esin­de máńgilik saqtaý úshin anam Qa­zaqstan Úkimetine hat joldady. Sol jyldyń 22 qarashasynda Mınıstrler kabınetiniń «Halyq jazýshysy Syrbaı Máýlenov­ti máńgilik este saqtaý týraly» qaýlysy shyqty. Nátıjesinde, elimizdiń tórt qalasynda, atap aıtsam, Almaty, Qostanaı, Arqa­­lyq jáne Qyzylordadan ákem­niń esimine kóshe berildi. So­nymen qatar Qostanaı oblysy Jangeldın aýdany Mılisaı aýylyndaǵy orta mektep jáne Qostanaı qalasyndaǵy №24 or­ta mektep pen Astanadaǵy №37 mektep-gımnazııasy Syr­baı Máýlenov atyn ıelendi. Osy qýanyshty anamyz kózimen kórip, saltanatty jıyndar­dyń tórinde otyrdy. Ol kisi atal­ǵan mektepterdiń ishinen aqyn atyn­daǵy mýzeıdiń ashylýyna uıytqy boldy. Jaryq kórmegen shyǵarmalaryn toptastyryp, kitap etip shyǵardy. Ákemniń atyn ulyqtaý – bizdiń paryzymyz. Ákem qaıtys bolǵan jyly onyń atynan qor qurdyq. Ony ózim basqaramyn. Qordyń emblemasynan ákemniń «Lashyn» (qus) degen búrkenshik ataýy oryn aldy. Búginde ózimde keıbir jekelegen ǵylymı maqalalaryma «Lashyn» dep qol qoıamyn.

Bıyl arqaly aqynnyń 100 jyl­dyq mereıtoıy jer-jer­de qal-qaderinshe atalyp ótil­di. Ásirese týǵan jeri – Qos­ta­naıda «Jyr tulpary, syr suńqary – Syraǵań» at­ty ǵy­lymı-konferensııa ótip, oǵan aqyn, Qazaqstan Jazýshy­lar oda­ǵy­nyń tóraǵasy, Mem­le­kettik syı­lyqtyń laýreaty Ulyqbek Es­dáýlet pen ákemniń kózin kórgen zııaly qa­ýym ókilderi qatysty. Odan ke­ıin Astanadaǵy Syrbaı Máýlen­ov atyndaǵy №37 mektep-lı­se­ıinde «О́leńim – ómirim me­niń» atty respýblıkalyq ǵy­ly­mı-tájirıbelik konferensııa uıym­dastyryldy. Jýyrda Al­ma­­ty­daǵy Ulttyq kitaphanada «Syr­shyl lırıkanyń sulta­ny» atty ádebı kesh ótti. Osy is-sha­ra­lardyń barlyǵyna qatysyp, papam týraly esteliktermen bó­lis­tim. Búginde Syrbaı Máýlenov esimin ıelengen mektep-gımnazııalarda tárbıelik, ulaǵattyq sharalar júrgizemin. Sol bilim uıalarynyń oqýshylary respýb­lıkalyq, halyqaralyq bilim baı­qaýlarynda top jaryp júr­ge­ni qýantady. Aldaǵy tańda osy mek­tep­terdiń sheteldegi bilim berý ordalarymen áriptestik baı­lanys ornatýdy kózdep otyrmyn. Ákeme qatysty kez kel­gen mádenı is-sharadan qalmaýǵa tyrysamyn. О́ıtkeni ózimdi áli kúnge ákemmen birge júrgendeı sezinemin...

 – Áńgimeńizge rahmet.

Áńgimelesken

Azamat Esenjol,

«Egemen Qazaqstan»