Alǵashqy kúnniń qorytyndysynda daıyndalǵandar dara shyǵyp,
óte shyǵamyn degender ókinip qaldy
Altyn uıa mektepke tarydaı bolyp kelip, taýdaı bolyp shyqqan mektep túlekteriniń alǵan bilimin sarapqa salǵan bıylǵy Ulttyq biryńǵaı testileýdiń alǵashqy kúngi qorytyndysy tómendegideı bolyp otyr. Emtıhanǵa elimiz boıynsha alǵashqy kúni ótinish bergen 27 670 túlektiń 26 134-i, ıaǵnı 94,5 paıyzy qatysqan. Testileý qalalar men aýdan ortalyqtaryndaǵy jan-jaqty jabdyqtalǵan 61 pýnkt bazasynda ótkizilgen. Túrli joldarmen synaqtan múdirmeı «ótýdiń» jolyn aldyn ala oılastyrǵan úmitkerlerdiń 5962-sinen uıaly telefon, 1783-inen shpargalka, 121-inen kalkýlıator, 6-ynan fotoapparat, 2-ýinen rasııa tabylǵan. Sóıtip, olar eskertý alǵan. Al on bir jyl boıy top jaryp, UBT-ǵa óziniń bilimine, biligine, daıyndyǵyna senip kelgen Almaty qalasyndaǵy № 178 lıseıdiń túlegi Aıǵanym Baqytqyzy Ábdijappar myńdardyń ishinen top jaryp, alaman báıgede eń joǵary 125 baldy qanjyǵasyna baılap, mańdaıy jarqyrady. Sol sekildi 3797 túlek (14,5 paıyz) 100-den astam ball jınapty. Bul kórsetkish ótken jyly 14 paıyzdy quraǵanyn eske sala ketelik. Birinshi kúngi synaqtyń orta baly – 76,6 bolsa, 2013 jyly 75,5 eken.
Joǵarydaǵydaı jetistikpen qatar, eń tómengi kórsetkish qandaı boldy degenge keletin bolsaq, aǵymdaǵy jyly joǵary oqý oryndaryna túsý úshin belgilengen 50 baldy da jııa almaǵandar – 6 233 (23,8 paıyz) bolǵan. О́tken jyly ondaı tómengi kórsetkish – 6 368, ıaǵnı 26,4 paıyz edi. Sonymen, myqtylardyń mereıin ósirgen, kóppen kórgen uly toı, óte shyǵamyz degenderdi ókindirgen UBT-nyń alǵashqy kúngi nátıjesi osylaı aıaqtaldy.
Súleımen MÁMET,
«Egemen Qazaqstan».
